മംഗളൂരു: കര്ണാടകയിലെ ശിവമോഗ്ഗ താവരെക്കൊപ്പ മൃഗശാലയില് വെച്ച് ഹിപ്പോപ്പൊട്ടാമസിന്റെ ആക്രമണത്തില് ഗുരുതരമായി പരിക്കേറ്റ വെറ്ററിനറി സര്ജന് മരിച്ചു. ഡോ. സമീക്ഷ റെഡ്ഡി (27) ആണ് ചികിത്സയിലിരിക്കെ മരിച്ചത്. അടുത്തിടെയാണ് ഇവര് മൃഗശാലയില് കരാറടിസ്ഥാനത്തില് ജോലിയില് പ്രവേശിച്ചത്.
വ്യാഴാഴ്ച രാത്രി 11.30-ഓടെയാണ് ഗര്ഭിണിയായ ഹിപ്പോപ്പൊട്ടാമസിനെ പരിശോധിക്കുന്നതിനിടെ ഡോക്ടര്ക്ക് കടിയേറ്റത്. സാരമായി പരിക്കേറ്റ സമീക്ഷയെ ഉടന് തന്നെ ശിവമോഗ്ഗയിലെ ആശുപത്രിയില് പ്രവേശിപ്പിച്ചെങ്കിലും വെള്ളിയാഴ്ചയോടെ മരണം സംഭവിക്കുകയായിരുന്നു. സംഭവത്തില് വനം-പരിസ്ഥിതി മന്ത്രി ഈശ്വര് ബി. ഖന്ദ്രെ അനുശോചനം രേഖപ്പെടുത്തി. സംഭവത്തെക്കുറിച്ച് വിശദമായ അന്വേഷണം നടത്തി ഏഴ് ദിവസത്തിനകം റിപ്പോര്ട്ട് സമര്പ്പിക്കാന് മന്ത്രി ഉത്തരവിട്ടു.
മരിച്ച ഡോക്ടറുടെ കുടുംബത്തിന് അടിയന്തരമായി നഷ്ടപരിഹാരം നല്കാന് ഉദ്യോഗസ്ഥര്ക്ക് നിര്ദ്ദേശം നല്കിയിട്ടുണ്ടെന്നും സര്ക്കാര് കുടുംബത്തിനൊപ്പമുണ്ടെന്നും മന്ത്രി അറിയിച്ചു. മൃഗശാലയിലെ സുരക്ഷാ മാനദണ്ഡങ്ങളില് വീഴ്ചയുണ്ടായോ എന്നതടക്കമുള്ള കാര്യങ്ങള് അന്വേഷണ പരിധിയില് വരും.
Related News
