അബുദാബി: യുഎഇ പ്രതിരോധ സേന ആകാശത്തുവെച്ച് തകര്‍ത്ത ബാലസ്റ്റിക് മിസൈലിന്റെ അവശിഷ്ടങ്ങള്‍ പതിച്ച് അബുദാബിയില്‍ രണ്ട് പേര്‍ കൊല്ലപ്പെട്ടു. ഒരു ഇന്ത്യന്‍ പൗരനും ഒരു പാകിസ്ഥാന്‍ പൗരനുമാണ് മരിച്ചതെന്ന് അധികൃതര്‍ സ്ഥിരീകരിച്ചു. സ്വീഹാന്‍ സ്ട്രീറ്റിലാണ് മിസൈല്‍ അവശിഷ്ടങ്ങള്‍ വീണത്. സംഭവത്തില്‍ മൂന്ന് പേര്‍ക്ക് പരിക്കേല്‍ക്കുകയും നിരവധി വാഹനങ്ങള്‍ക്ക് നാശനഷ്ടങ്ങള്‍ സംഭവിക്കുകയും ചെയ്തിട്ടുണ്ട്.

ഇറാന്‍ വിക്ഷേപിച്ച നിരവധി മിസൈലുകളെയും ഡ്രോണുകളെയും യുഎഇ വ്യോമ പ്രതിരോധ സേന ഇന്ന് രാവിലെ വിജയകരമായി തകര്‍ത്തു. സാഹചര്യം സൂക്ഷ്മമായി നിരീക്ഷിച്ചു വരികയാണെന്നും ഔദ്യോഗിക സ്രോതസ്സുകളില്‍ നിന്നുള്ള വിവരങ്ങള്‍ മാത്രം വിശ്വസിക്കണമെന്നും അധികൃതര്‍ ജനങ്ങളോട് നിര്‍ദ്ദേശിച്ചു. മാര്‍ച്ച് 25-ന് ഇറാനില്‍ നിന്നുള്ള ഒമ്പത് ഡ്രോണുകളെയും പ്രതിരോധ സംവിധാനം തകര്‍ത്തിരുന്നു. മേഖലയില്‍ സംഘര്‍ഷം ആരംഭിച്ചത് മുതല്‍ യുഎഇ പ്രതിരോധ സേന 357 ബാലസ്റ്റിക് മിസൈലുകളും 1,815 ഡ്രോണുകളും തകര്‍ത്തു.

മിസൈല്‍, ഡ്രോണ്‍ അവശിഷ്ടങ്ങള്‍ പതിച്ചുണ്ടായ അപകടങ്ങളില്‍ യുഎഇയില്‍ ഇതുവരെ മരിച്ചവരുടെ എണ്ണം 11 ആയി. ഇന്നത്തെ രണ്ട് മരണങ്ങള്‍ക്ക് പുറമെ, നേരത്തെയുണ്ടായ ആക്രമണങ്ങളില്‍ മൂന്ന് യുഎഇ സൈനികരും പാകിസ്ഥാന്‍, നേപ്പാള്‍, ബംഗ്ലാദേശ്, പലസ്തീന്‍ എന്നിവിടങ്ങളില്‍ നിന്നുള്ള ആറ് വിദേശ പൗരന്മാരും കൊല്ലപ്പെട്ടിരുന്നു. വിവിധ സംഭവങ്ങളിലായി ഇതുവരെ 166 പേര്‍ക്ക് പരിക്കേറ്റിട്ടുണ്ട്.

അടിയന്തര സേവന വിഭാഗങ്ങള്‍ സംഭവസ്ഥലത്ത് ക്യാമ്പ് ചെയ്യുന്നുണ്ട്. അഭ്യൂഹങ്ങള്‍ പ്രചരിപ്പിക്കരുതെന്നും ഔദ്യോഗിക അറിയിപ്പുകള്‍ക്കായി കാത്തിരിക്കണമെന്നും പ്രതിരോധ മന്ത്രാലയം ഓര്‍മ്മിപ്പിച്ചു.