ദമ്മാം: സൗദി അറേബ്യയിലെ പ്രമുഖ ജീവകാരുണ്യ പ്രവര്ത്തകനും ദമ്മാം കെ.എം.സി.സി നേതാവുമായ കബീര് കൊണ്ടോട്ടി (52) നാട്ടില് നിര്യാതനായി. വ്യാഴാഴ്ച വൈകിട്ട് ആറുമണിയോടെ കൊണ്ടോട്ടിയിലെ സ്വകാര്യ ആശുപത്രിയിലായിരുന്നു അന്ത്യം.
സ്വവസതിയില് വെച്ച് ശാരീരിക അസ്വസ്ഥത അനുഭവപ്പെട്ടതിനെത്തുടര്ന്ന് ഉടന് തന്നെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. മൂന്ന് പതിറ്റാണ്ടോളമായി ദമ്മാമില് ബിസിനസ് രംഗത്ത് സജീവമായിരുന്ന കബീര്, പ്രവാസലോകത്തെ സാമൂഹിക-സാംസ്കാരിക മേഖലകളിലെ നിറസാന്നിധ്യമായിരുന്നു.
പ്രവാസലോകത്ത് വെച്ച് മരണപ്പെടുന്ന ഒട്ടനവധി പ്രവാസികളുടെ മൃതദേഹങ്ങള് നിയമനടപടികള് പൂര്ത്തിയാക്കി നാട്ടിലെത്തിക്കുന്നതിനും സൗദിയില് ഖബറടക്കുന്നതിനും നിസ്വാര്ത്ഥമായി പ്രവര്ത്തിച്ചിരുന്ന അദ്ദേഹത്തിന്റെ വിയോഗം പ്രവാസി സമൂഹം വലിയ ഞെട്ടലോടെയാണ് ശ്രവിച്ചത്. സൗദി കിഴക്കന് പ്രവിശ്യാ കെ.എം.സി.സി സെക്രട്ടറി, മാപ്പിള കലാ അക്കാദമി ദമ്മാം ചാപ്റ്റര് പ്രസിഡന്റ് എന്നീ നിലകളില് പ്രവര്ത്തിച്ചുവരികയായിരുന്നു. ദമ്മാം കെ.എം.സി.സി സെന്ട്രല് കമ്മിറ്റി മുന് പ്രസിഡന്റ് കൂടിയായിരുന്നു അദ്ദേഹം.
കൊണ്ടോട്ടി പാലക്കോടന് മുഹമ്മദ് - മറിയുമ്മ ദമ്പതികളുടെ മകനാണ്. ഭാര്യ: ഹസീന. മക്കള്: ഫര്ഹാന്, ഫര്ഹാന, ഫര്ഹ, ഫരിഹ.
കബീര് കൊണ്ടോട്ടിയുടെ ആകസ്മിക നിര്യാണത്തില് കെ.എം.സി.സിയുടെ വിവിധ ഘടകങ്ങളും ദമ്മാമിലെ വിവിധ പ്രവാസി സംഘടനകളും അനുശോചിച്ചു. ഖബറടക്കം വെള്ളിയാഴ്ച രാവിലെ പത്ത് മണിക്ക് കൊണ്ടോട്ടി കോടങ്ങാട് ജുമാ മസ്ജിദ് ഖബറിസ്ഥാനില് നടക്കും.
Related News
