വാഷിംഗ്ടണ്‍/ദുബായ്: അഞ്ച് ആഴ്ച പിന്നിട്ട ഇറാന്‍-യുഎസ് യുദ്ധം അവസാനിപ്പിക്കാന്‍ പാകിസ്താന്റെ മധ്യസ്ഥതയില്‍ രൂപീകരിച്ച സമാധാന പദ്ധതി അനിശ്ചിതത്വത്തില്‍. ഹോര്‍മുസ് കടലിടുക്ക് തുറക്കുന്നതുമായി ബന്ധപ്പെട്ട് അമേരിക്ക മുന്നോട്ടുവെച്ച താല്‍ക്കാലിക വെടിനിര്‍ത്തല്‍ നിര്‍ദ്ദേശം ഇറാന്‍ തള്ളി. മേഖലയില്‍ ശാശ്വതമായ സമാധാനമാണ് തങ്ങള്‍ ആഗ്രഹിക്കുന്നതെന്ന് ഇറാന്‍ വ്യക്തമാക്കി.

പാകിസ്താന്‍ വഴി അമേരിക്കയ്ക്ക് കൈമാറിയ മറുപടിയില്‍ ഇറാന്‍ പത്ത് പ്രധാന ആവശ്യങ്ങള്‍ മുന്നോട്ടുവെച്ചു. മേഖലയിലെ സൈനിക നടപടികള്‍ അവസാനിപ്പിക്കുക, ഹോര്‍മുസ് കടലിടുക്കിലൂടെയുള്ള സുരക്ഷിത യാത്രയ്ക്കായി പ്രത്യേക പ്രോട്ടോക്കോള്‍ രൂപീകരിക്കുക, ഉപരോധങ്ങള്‍ നീക്കുക, പുനര്‍നിര്‍മ്മാണ സഹായം ഉറപ്പാക്കുക എന്നിവയാണ് ഇതില്‍ പ്രധാനം. തങ്ങളുടെ നിലപാടുകള്‍ വിട്ടുവീഴ്ചയല്ലെന്നും പ്രതിരോധത്തിലുള്ള ആത്മവിശ്വാസമാണെന്നും ഇറാന്‍ വിദേശകാര്യ വക്താവ് ഇസ്മായില്‍ ബഗായ് പറഞ്ഞു.

ഇറാന്‍ സമര്‍പ്പിച്ച നിര്‍ദ്ദേശങ്ങള്‍ 'പര്യാപ്തമല്ല' എന്ന് വിശേഷിപ്പിച്ച യുഎസ് പ്രസിഡന്റ് ഡൊണാള്‍ഡ് ട്രംപ്, ചൊവ്വാഴ്ച രാത്രി 8 മണിക്ക് (ജി.എം.ടി അര്‍ദ്ധരാത്രി) മുന്‍പ് ഹോര്‍മുസ് കടലിടുക്ക് തുറന്നില്ലെങ്കില്‍ ഇറാന്‍ കനത്ത വില നല്‍കേണ്ടി വരുമെന്ന് മുന്നറിയിപ്പ് നല്‍കി. ഇറാന്റെ വൈദ്യുതി നിലയങ്ങള്‍ ആക്രമിക്കുന്നത് യുദ്ധക്കുറ്റമാകില്ലേ എന്ന മാധ്യമപ്രവര്‍ത്തകരുടെ ചോദ്യത്തിന്, 'ഇറാന്‍ ആണവായുധം നിര്‍മ്മിക്കാന്‍ അനുവദിക്കുന്നതാണ് യഥാര്‍ത്ഥ യുദ്ധക്കുറ്റം' എന്നായിരുന്നു ട്രംപിന്റെ മറുപടി.

മേഖലയില്‍ അക്രമം രൂക്ഷമായി തുടരുകയാണ്. ഇറാന്റെ റെവല്യൂഷണറി ഗാര്‍ഡ് ഇന്റലിജന്‍സ് തലവന്‍ മജീദ് ഖാദമി കൊല്ലപ്പെട്ടതായി ഇസ്രായേല്‍ സ്ഥിരീകരിച്ചു. ടെഹ്റാനിലെ ഷെരീഫ് സര്‍വകലാശാലയിലെ ഡാറ്റാ സെന്റര്‍ തകര്‍ത്തതായും ഇസ്രായേല്‍ അവകാശപ്പെട്ടു. ഇറാന്റെ പക്കലുള്ള 'പണപ്പെട്ടി' തകര്‍ക്കുമെന്നും ഇറാന്‍ ഭരണകൂടം എന്നത്തേക്കാളും ദുര്‍ബലമാണെന്നും ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു പറഞ്ഞു.

അതേസമയം, തിരിച്ചടിക്കാനുള്ള തങ്ങളുടെ ശേഷി കുറഞ്ഞിട്ടില്ലെന്ന് ഇറാന്‍ തെളിയിച്ചു. കുവൈറ്റ്, ബഹ്റൈന്‍, യുഎഇ എന്നിവിടങ്ങളിലെ ഇസ്രായേല്‍ ബന്ധമുള്ള കപ്പലുകള്‍ക്കും പെട്രോകെമിക്കല്‍ പ്ലാന്റുകള്‍ക്കും നേരെ ഇറാന്‍ ആക്രമണം നടത്തി. ലെബനനില്‍ നിന്നും ഇറാനില്‍ നിന്നും ഇസ്രായേലിലേക്ക് മിസൈല്‍ വര്‍ഷം തുടരുകയാണ്. ഹൈഫയില്‍ മിസൈല്‍ വീണ് നാല് പേര്‍ കൊല്ലപ്പെട്ടു.

അഞ്ച് ആഴ്ച പിന്നിട്ട യുദ്ധത്തില്‍ ഇതുവരെ ഇറാനില്‍ 244 കുട്ടികള്‍ ഉള്‍പ്പെടെ 3,540 പേര്‍ കൊല്ലപ്പെട്ടു. ലെബനനില്‍ 124 കുട്ടികള്‍ ഉള്‍പ്പെടെ 1,461 പേര്‍ കൊല്ലപ്പെട്ടു. ഇസ്രായേല്‍ ഇതുവരെ 23 മരണം സ്ഥിരീകരിച്ചു. അമേരിക്കയുടെ 13 സൈനികര്‍ കൊല്ലപ്പെടുകയും നൂറുകണക്കിന് പേര്‍ക്ക് പരിക്കേല്‍ക്കുകയും ചെയ്തു.

എണ്ണവില ബാരലിന് 109.60 ഡോളറിലേക്ക് ഉയര്‍ന്നത് ആഗോള സമ്പദ്വ്യവസ്ഥയെ ആശങ്കയിലാഴ്ത്തിയിട്ടുണ്ട്. സമാധാന ചര്‍ച്ചകള്‍ പരാജയപ്പെട്ടാല്‍ 'ഓപ്പറേഷന്‍ എപ്പിക് ഫ്യൂറി' എന്ന പേരില്‍ അമേരിക്ക ആക്രമണം ശക്തമാക്കുമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.


ഫോട്ടോ: ടെഹ്റാന്‍ നഗരമധ്യത്തില്‍ ഇറാന്റെ പരമോന്നത നേതാവ് ആയത്തുള്ള മുജ്തബ ഖാംനഇയുടെ ചിത്രം പ്രദര്‍ശിപ്പിച്ചിരിക്കുന്ന പരസ്യബോര്‍ഡിന് മുന്നിലൂടെ ആളുകള്‍ മോട്ടോര്‍ ബൈക്കില്‍ യാത്ര ചെയ്യുന്നു.