ന്യൂദല്ഹി: ഇറാനില് നിന്നുള്ള അസംസ്കൃത എണ്ണയുടെ ആദ്യ ശേഖരം ഈ ആഴ്ച ഇന്ത്യയിലെത്തുമെന്ന് കപ്പല് ഗതാഗത വിവരങ്ങള് പുറത്തുവിടുന്ന എല്.എസ്.ഇ.ജി, കെപ്ലര് എന്നിവര് അറിയിച്ചു. വിതരണ തടസ്സങ്ങള് കുറയ്ക്കുന്നതിനായി ഇറാനിയന് എണ്ണയ്ക്കും സംസ്കരിച്ച ഉല്പ്പന്നങ്ങള്ക്കും മേലുള്ള ഉപരോധം താല്ക്കാലികമായി നീക്കാന് അമേരിക്ക തീരുമാനിച്ചതിന് പിന്നാലെയാണിത്. കഴിഞ്ഞ ഏഴ് വര്ഷത്തിനിടെ ആദ്യമായാണ് ഇന്ത്യയിലേക്ക് ഇറാനിയന് എണ്ണ എത്തുന്നത്.
കുറക്കാവോയില് രജിസ്റ്റര് ചെയ്ത 'ജയ' എന്ന ഭീമന് എണ്ണക്കപ്പലാണ് ഇന്ത്യയ്ക്കുള്ള ചരക്കുമായി എത്തുന്നത്. ഇന്ത്യന് പൊതുമേഖലാ എണ്ണക്കമ്പനി വാങ്ങിയ ഈ എണ്ണ നിലവില് ഇന്ത്യയുടെ കിഴക്കന് തീരത്തേക്ക് നീങ്ങിക്കൊണ്ടിരിക്കുകയാണ്. ലണ്ടന് സ്റ്റോക്ക് എക്സ്ചേഞ്ച് ഗ്രൂപ്പിന്റെ കണക്കുകള് പ്രകാരം, കപ്പല് ആദ്യം തെക്കുകിഴക്കന് ഏഷ്യന് തീരത്തേക്ക് പോയെങ്കിലും പിന്നീട് ഇന്ത്യ ലക്ഷ്യമാക്കി ദിശ മാറ്റുകയായിരുന്നു. 'ജോര്ദാന്' എന്ന് പേരുള്ള മറ്റൊരു കപ്പലും ഇന്ത്യയിലേക്ക് എണ്ണയുമായി വരുന്നുണ്ടെന്ന് സൂചനകളുണ്ട്.
ലോകത്തിലെ ഏറ്റവും വലിയ മൂന്നാമത്തെ എണ്ണ ഉപഭോക്താവായ ഇന്ത്യ, 2019 മെയ് മാസത്തിന് ശേഷം ഇറാനില് നിന്ന് എണ്ണ വാങ്ങിയിട്ടില്ല. ഇറാനില്നിന്നുള്ള വ്യാപാരം പൂര്ണ്ണമായും അവസാനിപ്പിക്കാന് അമേരിക്ക നല്കിയ കടുത്ത സമ്മര്ദ്ദത്തെ തുടര്ന്നായിരുന്നു ഇത്. എന്നാല് സമീപകാലത്ത് യു.എസ്-ഇസ്രായേല് യുദ്ധത്തെ തുടര്ന്നുണ്ടായ വിതരണ തടസ്സങ്ങള് ഇന്ത്യയുള്പ്പെടെയുള്ള ദക്ഷിണേഷ്യന് രാജ്യങ്ങളെ വലിയ സാമ്പത്തിക പ്രതിസന്ധിയിലേക്ക് നയിച്ചിരുന്നു.
ഹോര്മുസ് കടലിടുക്ക് വഴിയുള്ള ചരക്കുനീക്കം തടസ്സപ്പെട്ടതോടെയാണ് ഇറാനില്നിന്ന് എണ്ണ വാങ്ങുന്നതിലേക്ക് രാജ്യത്തെ റിഫൈനറികള് തിരിഞ്ഞതെന്ന് ഇന്ത്യന് പെട്രോളിയം മന്ത്രാലയം കഴിഞ്ഞ ആഴ്ച അറിയിച്ചിരുന്നു. വിതരണ ശൃംഖലയിലുണ്ടായ വിള്ളലുകള് പരിഹരിക്കാന് ഈ നീക്കം അത്യന്താപേക്ഷിതമാണെന്ന് മന്ത്രാലയം വ്യക്തമാക്കി. ഊര്ജ്ജ സുരക്ഷ ഉറപ്പാക്കുന്നതിന്റെ ഭാഗമായാണ് ഈ താല്ക്കാലിക മാറ്റം. ഇറാനില് നിന്ന് വാങ്ങുന്ന എണ്ണയുടെ പണമടയ്ക്കല് നടപടികളില് നിലവില് റിഫൈനറികള്ക്ക് തടസ്സങ്ങളൊന്നുമില്ലെന്നും മന്ത്രാലയം സ്ഥിരീകരിച്ചു. ഉപരോധങ്ങളില് ലഭിച്ച ഇളവുകള് വ്യാപാര ഇടപാടുകള് സുഗമമാക്കിയിട്ടുണ്ട്. വരും ദിവസങ്ങളില് കൂടുതല് കപ്പലുകള് ഇറാനില് നിന്ന് ഇന്ത്യയിലേക്ക് എത്തുമെന്നാണ് എണ്ണ വിപണിയിലെ വിദഗ്ധര് വിലയിരുത്തുന്നത്.
Related News
