വാഷിംഗ്ടണ്/ഇസ്ലാമാബാദ്: അമേരിക്കയും ഇറാനും തമ്മിലുള്ള ഭിന്നതകള് പരിഹരിക്കാനും ഏപ്രിലില് പ്രഖ്യാപിച്ച താല്ക്കാലിക വെടിനിര്ത്തല് ദീര്ഘിപ്പിക്കാനുമുള്ള രണ്ടാംഘട്ട ചര്ച്ചകള്ക്ക് ഇസ്ലാമാബാദ് വീണ്ടും വേദിയായേക്കും. പാകിസ്താനില് നടന്ന ആദ്യഘട്ട ചര്ച്ചകള് കരാറിലെത്താതെ പിരിഞ്ഞെങ്കിലും, സമാധാന ശ്രമങ്ങളുമായി മുന്നോട്ട് പോകാന് ഇരുവിഭാഗവും ധാരണയിലെത്തിയതായി ബ്ലൂംബെര്ഗ് റിപ്പോര്ട്ട് ചെയ്തു.
നിലവിലെ വെടിനിര്ത്തല് കാലാവധി ഈ മാസം 22ന് അവസാനിക്കാനിരിക്കെ, അതിനുമുമ്പ് തന്നെ ഉന്നതതല കൂടിക്കാഴ്ച നടത്താനാണ് ആലോചന. മേഖലയിലെ സംഘര്ഷം വീണ്ടും മൂര്ച്ഛിക്കുന്നത് തടയുക എന്ന ലക്ഷ്യത്തോടെയാണ് ഈ നീക്കം.
അമേരിക്കയ്ക്കും ഇറാനും ഇടയിലുള്ള നിര്ണ്ണായക മധ്യസ്ഥ രാജ്യമായി പാകിസ്താന് മാറിയിരിക്കുകയാണ്. രണ്ടാംഘട്ട ചര്ച്ചകള്ക്കും ആതിഥേയത്വം വഹിക്കാന് ഇസ്ലാമാബാദ് സന്നദ്ധത അറിയിച്ചിട്ടുണ്ട്. വെടിനിര്ത്തല് കാലാവധി തീരുന്നതിന് മുന്പ് നയതന്ത്ര പ്രക്രിയ പുനരുജ്ജീവിപ്പിക്കാന് ഇരുരാജ്യങ്ങളുമായും നിരന്തരം സമ്പര്ക്കം പുലര്ത്തുന്നുണ്ടെന്ന് പാക് ഉദ്യോഗസ്ഥര് വ്യക്തമാക്കി.
ആദ്യഘട്ട ചര്ച്ചകളില് സമഗ്രമായ ഉടമ്പടിയില് എത്താന് കഴിഞ്ഞിരുന്നില്ല. മേഖലയിലെ അസ്ഥിരത ആഗോള ഊര്ജ്ജ വിപണിയെയും സാമ്പത്തിക വ്യവസ്ഥയെയും ദോഷകരമായി ബാധിച്ചിട്ടുണ്ട്. വെടിനിര്ത്തല് അവസാനിച്ചാല് സംഘര്ഷം പടരാനുള്ള സാധ്യത കണക്കിലെടുത്ത് അതീവ ജാഗ്രതയോടെയാണ് നയതന്ത്ര പ്രതിനിധികള് കരുക്കള് നീക്കുന്നത്.
ചര്ച്ചകള് തുടരാന് ഇരുപക്ഷവും സന്നദ്ധത പ്രകടിപ്പിച്ചത് വരാനിരിക്കുന്ന ദിവസങ്ങളില് ശുഭപ്രതീക്ഷയ്ക്ക് വകനല്കുന്നു. ഇതിനായുള്ള കൃത്യമായ തീയതിയും വേദിയും സംബന്ധിച്ച ഔദ്യോഗിക പ്രഖ്യാപനം ഉടനുണ്ടാകുമെന്നാണ് സൂചന.
Related News
