ദമ്മാം: പെരിന്തല്മണ്ണ എന്.ആര്.ഐ ഫോറവും പീപ്പിള്സ് ബ്ലഡ് ഡോണേഷന് ആര്മിയും സംയുക്തമായി സൗദി ആരോഗ്യ മന്ത്രാലയത്തിന്റെ സഹകരണത്തോടെ രക്തദാന ക്യാമ്പ് സംഘടിപ്പിച്ചു. ദമ്മാം ഒതൈം മാളിലെ ബ്ലഡ് ഡോണേഷന് സെന്ററില് നടന്ന ക്യാമ്പില് പ്രവാസി സമൂഹത്തിന്റെ വലിയ പങ്കാളിത്തമാണ് ഉണ്ടായത്.
വനിതകള് ഉള്പ്പെടെ നിരവധി പേര് ക്യാമ്പില് സന്നദ്ധരായി എത്തിയത് ശ്രദ്ധേയമായി. റമദാന് മാസത്തിന് ശേഷം രക്തശേഖരണത്തില് ഉണ്ടാകുന്ന കുറവ് പരിഹരിക്കാന് ഇത്തരം ക്യാമ്പുകള് വലിയ സഹായമാകുന്നുണ്ടെന്ന് സംഘാടകര് അറിയിച്ചു.
പെന്റിഫ് പ്രസിഡന്റ് റഷീദ് നാലകത്ത്, ജനറല് സെക്രട്ടറി മുഹമ്മദ് ഹനീഫ പെരിഞ്ചീരി, നൗഷാദ് പെരിന്തല്മണ്ണ എന്നിവര് ക്യാമ്പിന് നേതൃത്വം നല്കി. പി.ബി.ഡി.എ സൗദി അറേബ്യ ചീഫ് കോഓര്ഡിനേറ്റര് ഷിനാജ് ക്യാമ്പിന്റെ ഏകോപനം നിര്വഹിച്ചു. ക്യാമ്പ് സുഗമമായി നടത്തുന്നതിനായി നിരവധി വളന്റിയര്മാര് പ്രവര്ത്തിച്ചു.
രക്തദാനത്തിനായി എത്തിയവര്ക്ക് ആവശ്യമായ വാഹന സൗകര്യം ഉള്പ്പെടെയുള്ള ക്രമീകരണങ്ങള് സംഘാടകര് ഒരുക്കിയിരുന്നു. ദാതാക്കളുടെ ആരോഗ്യ സുരക്ഷ ഉറപ്പാക്കുന്നതോടൊപ്പം അവര്ക്കായി റിഫ്രഷ്മെന്റുകളും സജ്ജമാക്കിയിരുന്നു. സമൂഹത്തില് രക്തദാനത്തിന്റെ പ്രാധാന്യം ഉയര്ത്തിക്കാട്ടുന്നതിനും കൂടുതല് ആളുകളെ ഈ മഹത്തായ സേവനത്തിലേക്ക് ആകര്ഷിക്കുന്നതിനും ഭാവിയിലും ഇത്തരം പ്രവര്ത്തനങ്ങള് ശക്തമാക്കുമെന്ന് ഭാരവാഹികള് വ്യക്തമാക്കി.
Related News
