ലക്നൗ: സിനിമയെ വെല്ലുന്ന ട്വിസ്റ്റുകളുമായി ഒരു ഉത്തരേന്ത്യന് കല്യാണം. ആദ്യരാത്രിയില് മധുരപലഹാരവും പാലുമായി എത്തിയ വധുവിനോട് കുശലാന്വേഷണം നടത്തിയ വരന് കേട്ടത് ഞെട്ടിക്കുന്ന ഡിമാന്ഡാണ്. 'ആദ്യരാത്രി ആഘോഷിക്കണമെങ്കില് 90 ലക്ഷം രൂപ അക്കൗണ്ടില് വരണം!'
തനിക്ക് ഈ വിവാഹത്തില് തരിമ്പും താല്പ്പര്യമില്ലെന്നും കേവലം സാമ്പത്തിക ലാഭം മാത്രമാണ് ലക്ഷ്യമെന്നും യുവതി തുറന്നടിച്ചതോടെ വരന്റെ സകല കിളികളും പറന്നു. 90 ലക്ഷത്തിന്റെ പേരിലുള്ള തര്ക്കം മൂത്തതോടെ വധു തന്റെ 'ക്വട്ടേഷന് സംഘത്തെ' (സ്വന്തം ബന്ധുക്കളെ) വിളിച്ചുവരുത്തി.
സ്ഥലത്തെത്തിയ വധുവിന്റെ വീട്ടുകാര് വെറുമൊരു അടിയുണ്ടാക്കി പിരിയുകയല്ല ചെയ്തത്. വരനെയും കുടുംബത്തെയും വീടിനുള്ളിലിട്ട് പൂട്ടിയ ശേഷം ഗ്യാസ് സിലിണ്ടര് തുറന്നുവിട്ട് വീട് മൊത്തമായി സ്ഫോടനത്തില് തകര്ക്കാന് നോക്കി! ഭാഗ്യം കൊണ്ട് അയല്ക്കാര് ഓടിയെത്തിയത് വരനും വീട്ടുകാര്ക്കും ജീവന് തിരിച്ചുകിട്ടാന് സഹായകമായി. അവസരം മുതലാക്കി അമ്മായിയമ്മയുടെ ആഭരണങ്ങളെല്ലാം തൂത്തുവാരിയാണ് വധുവും സംഘവും സ്ഥലം വിട്ടത്.
പരാതിയുമായി സ്റ്റേഷനില് ചെന്ന വരനെ പോലീസ് ആദ്യം മൈന്ഡ് ചെയ്തില്ലെങ്കിലും കോടതി ഇടപെട്ടതോടെ സംഗതി ഉഷാറായി. വധുവിനും പിതാവിനുമെതിരെ വധശ്രമത്തിനും കവര്ച്ചയ്ക്കും പോലീസ് കേസെടുത്തു. നവവധു ഇപ്പോള് ഒളിവിലാണ്.
Related News
