തെഹ്റാന്‍/കൊളംബോ: ശ്രീലങ്കന്‍ തീരത്തിന് സമീപം ഇന്ത്യന്‍ മഹാസമുദ്രത്തില്‍ വെച്ച് അമേരിക്കന്‍ നാവികസേന ഇറാനിയന്‍ യുദ്ധക്കപ്പലായ 'ഐ.ആര്‍.ഐ.എസ്. ദെന'യെ ആക്രമിച്ചു തകര്‍ത്തത് ജീവനക്കാരെ കൊന്നൊടുക്കുക എന്ന ലക്ഷ്യത്തോടെയാണെന്ന് അതിജീവിച്ച നാവികന്‍ വെളിപ്പെടുത്തി. ആക്രമണത്തില്‍ പരിക്കേറ്റ ഹമീദ് മൊമേനയാണ് തസ്‌നീം വാര്‍ത്താ ഏജന്‍സിയോട് ഞെട്ടിക്കുന്ന വിവരങ്ങള്‍ പങ്കുവെച്ചത്.

കഴിഞ്ഞ മാസം പുലര്‍ച്ചെ 3:00-നും 3:30-നും ഇടയിലാണ് സംഭവം നടന്നതെന്ന് ഹമീദ് പറയുന്നു. 'അതൊരു യുദ്ധമേഖലയായിരുന്നില്ല. അന്താരാഷ്ട്ര സമുദ്രനിയമങ്ങള്‍ കാറ്റില്‍പ്പറത്തിയായിരുന്നു അമേരിക്കയുടെ നീക്കം. യാതൊരുവിധ മുന്നറിയിപ്പും നല്‍കാതെ ഒരു അന്തര്‍വാഹിനിയില്‍ നിന്നാണ് ആക്രമണം ഉണ്ടായത്. ആദ്യത്തെ ടോര്‍പിഡോ പതിക്കുമ്പോള്‍ കപ്പലിലെ 104 ജീവനക്കാരും തങ്ങളുടെ ജോലിയിലായിരുന്നു,' അദ്ദേഹം പറഞ്ഞു.

കപ്പലിന് കേടുപാടുകള്‍ വരുത്തുക എന്നതിലുപരി ജീവനക്കാരെ മുഴുവന്‍ ഇല്ലാതാക്കുകയായിരുന്നു അമേരിക്കയുടെ പദ്ധതിയെന്ന് ഹമീദ് ആരോപിച്ചു. 'ദെന ഞങ്ങള്‍ക്ക് ഇറാന്റെ മണ്ണുപോലെയാണ്. കപ്പല്‍ ഉപേക്ഷിച്ചു പോകുന്നതിനെക്കുറിച്ച് ഞങ്ങള്‍ ചിന്തിച്ചതേയില്ല. സൈനികര്‍ രാത്രി 11 മണി വരെ കപ്പലില്‍ തന്നെ നിലയുറപ്പിച്ചു. അതിനുശേഷം മറ്റ് വഴികളില്ലാതെ വന്നപ്പോഴാണ് കടലില്‍ നീന്തി ശ്രീലങ്കന്‍ തീരത്തോട് അടുത്തത്,' അദ്ദേഹം കൂട്ടിച്ചേര്‍ത്തു.

ഇന്ത്യയുടെ അന്താരാഷ്ട്ര നാവികാഭ്യാസമായ 'മിലാനി'ല്‍ പങ്കെടുത്ത ശേഷം മടങ്ങുകയായിരുന്നു ഐ.ആര്‍.ഐ.എസ്. ദെന. മാര്‍ച്ച് 4-ന് ശ്രീലങ്കയിലെ ഗാലിന് സമീപം 40 നോട്ടിക്കല്‍ മൈല്‍ അകലെ വെച്ചാണ് അമേരിക്കന്‍ സമുദ്രസേനയുടെ എം.കെ-48 ടോര്‍പിഡോ കപ്പലില്‍ പതിച്ചത്.

ആക്രമണത്തില്‍ 104 ജീവനക്കാര്‍ കൊല്ലപ്പെട്ടതായാണ് റിപ്പോര്‍ട്ട്. ഇതിനകം 87 മൃതദേഹങ്ങള്‍ വീണ്ടെടുത്തിട്ടുണ്ട്. 32 നാവികരെ രക്ഷപ്പെടുത്തി. ഇറാനും അമേരിക്കയും തമ്മിലുള്ള ബന്ധം അതീവ വഷളായ പശ്ചാത്തലത്തിലാണ് ഈ വെളിപ്പെടുത്തല്‍ പുറത്തുവരുന്നത്.