റിയാദ്: കേരള നിയമസഭാ തിരഞ്ഞെടുപ്പില് യു.ഡി.എഫ്. വന് വിജയം കൈവരിക്കുമെന്ന് റിയാദ് ഒ.ഐ.സി.സി. സെന്ട്രല് കമ്മിറ്റി വിലയിരുത്തി. ഭരണത്തുടര്ച്ചയെന്ന പ്രതീക്ഷ നഷ്ടപ്പെട്ട എല്.ഡി.എഫ് പരാജയഭീതിയാല് സംസ്ഥാനത്ത് വ്യാപക അക്രമങ്ങള് നടത്തുന്നതായി യോഗം ആരോപിച്ചു. റിയാദിലെ ബത്ഹ സബര്മതിയില് സംഘടിപ്പിച്ച തിരഞ്ഞെടുപ്പ് വിശദീകരണ യോഗത്തിലായിരുന്നു ഈ അഭിപ്രായപ്രകടനം.
തിരഞ്ഞെടുപ്പ് ഫലം പുറത്തുവരുന്നതിന് മുന്പേ മുഖ്യമന്ത്രിയെ കുറിച്ചുള്ള ചര്ച്ചകള് ഉയരുന്നത് തികച്ചും അനാവശ്യമാണെന്ന് യോഗം വിമര്ശിച്ചു. കോണ്ഗ്രസ് അധികാരത്തില് എത്തുന്ന സാഹചര്യത്തില് മുഖ്യമന്ത്രിയെ തീരുമാനിക്കുന്നത് എ.ഐ.സി.സി. ആയിരിക്കും. അതുവരെ ഇത്തരം പ്രസ്താവനകള് നടത്തുന്നത് അണികളില് ആശയക്കുഴപ്പം സൃഷ്ടിക്കുമെന്നതിനാല് നേതാക്കള് അതില് നിന്ന് വിട്ടുനില്ക്കണമെന്നും യോഗം ആവശ്യപ്പെട്ടു.
കേരളത്തിലെ നിലവിലെ രാഷ്ട്രീയ സാഹചര്യം യു.ഡി.എഫിന് അനുകൂലമാണെന്നും പ്രവാസി സമൂഹത്തിന്റെ പൂര്ണ്ണ പിന്തുണ മുന്നണിക്കുണ്ടാകുമെന്നും യോഗത്തില് പങ്കെടുത്തവര് അഭിപ്രായപ്പെട്ടു. വ്യക്തമായ ഭൂരിപക്ഷത്തോടെ യു.ഡി.എഫ്. അധികാരത്തിലെത്തുമെന്ന് നേതാക്കള് ആത്മവിശ്വാസം പ്രകടിപ്പിച്ചു.
സെന്ട്രല് കമ്മിറ്റി പ്രസിഡന്റ് സലീം കളക്കര അധ്യക്ഷത വഹിച്ചു. ഭാരവാഹികളായ നവാസ് വെള്ളിമാട്കുന്ന്, സന്തോഷ് വിളയില്, അമീര് പട്ടണത്ത്, സജീര് പൂന്തുറ, സൈഫ് കായംകുളം, റഫീഖ് വെമ്പായം, ഹക്കീം പട്ടാമ്പി, അബ്ദുല് കരീം കൊടുവള്ളി, അഷ്റഫ് മേച്ചേരി, ബഷീര് കോട്ടക്കല് എന്നിവര് സംസാരിച്ചു. ജനറല് സെക്രട്ടറിമാരായ സുരേഷ് ശങ്കര് സ്വാഗതവും ഷംനാദ് കരുനാഗപ്പള്ളി നന്ദിയും രേഖപ്പെടുത്തി.
Related News
