കല്‍പ്പറ്റ: വയനാട് മേപ്പാടി പുത്തുമലയില്‍ കാട്ടാനയുടെ ആക്രമണത്തില്‍ സ്‌കൂട്ടര്‍ യാത്രക്കാരിയായ വീട്ടമ്മ കൊല്ലപ്പെട്ടു. മേപ്പാടി പുത്തുമല കാശ്മീര്‍ സ്വദേശിനി ജെസ്സി (45) ആണ് മരിച്ചത്. ഇന്ന് രാവിലെ ആറേകാലോടെ മേപ്പാടി - ചൂരല്‍മല റൂട്ടിലെ കള്ളാടി ഭാഗത്തുവെച്ചായിരുന്നു അപകടം. മൂപ്പന്‍സ് മെഡിക്കല്‍ കോളേജിലെ സെക്യൂരിറ്റി ജീവനക്കാരനായ ഭര്‍ത്താവ് ഷാജിയോടൊപ്പം ജോലിസ്ഥലത്തേക്ക് പോവുകയായിരുന്നു ജെസ്സി.

റോഡില്‍ പെട്ടെന്ന് പ്രത്യക്ഷപ്പെട്ട രണ്ട് കാട്ടാനകളെ കണ്ട് ഇവര്‍ സ്‌കൂട്ടര്‍ നിര്‍ത്തി ഓടി രക്ഷപ്പെടാന്‍ ശ്രമിച്ചെങ്കിലും, പുറകെ വന്ന ആന ജെസ്സിയെ ആക്രമിക്കുകയായിരുന്നു. കൂടെയുണ്ടായിരുന്ന ഭര്‍ത്താവ് ഷാജി പരിക്കേല്‍ക്കാതെ രക്ഷപ്പെട്ടെങ്കിലും കടുത്ത മാനസികാഘാതത്തിലാണ്. ഇടുങ്ങിയതും ഇരുവശങ്ങളിലും കുന്നുകളുള്ളതുമായ റോഡായതിനാല്‍ ഇവര്‍ക്ക് വശങ്ങളിലേക്ക് മാറി ഓടാന്‍ സാധിച്ചില്ലെന്ന് പ്രദേശവാസികള്‍ പറയുന്നു.

തുടര്‍ച്ചയായ പ്രകൃതിദുരന്തങ്ങള്‍ക്ക് ശേഷം ജനങ്ങള്‍ വലിയ യാത്രാദുരിതം നേരിടുന്ന മേഖലയാണിത്. കള്ളാടി, തൊള്ളായിരംകണ്ടി, പുത്തുമല ഭാഗങ്ങളില്‍ വന്യമൃഗശല്യം രൂക്ഷമാണെന്നും, റോഡരികിലെ കാട് വെട്ടിത്തെളിക്കാനും ജനങ്ങള്‍ക്ക് സുരക്ഷയൊരുക്കാനും അടിയന്തര നടപടി വേണമെന്നും ആവശ്യപ്പെട്ട് നാട്ടുകാര്‍ രംഗത്തെത്തിയിട്ടുണ്ട്.