ഈസ്റ്റ് റദര്ഫോര്ഡ്: 2026 ലോകകപ്പ് ഫൈനലില് സ്പെയിനിനോട് പരാജയപ്പെട്ടതിന് പിന്നാലെ, തങ്ങളേക്കാള് മികച്ച ടീം സ്പെയിന് തന്നെയായിരുന്നുവെന്ന് അര്ജന്റീന പരിശീലകന് ലയണല് സ്കലോണി. മെറ്റ്ലൈഫ് സ്റ്റേഡിയത്തില് നടന്ന ആവേശകരമായ ഫൈനലില് അധികസമയത്തിന്റെ രണ്ടാം പകുതിയില് പകരക്കാരനായി ഇറങ്ങിയ ഫെറാന് ടോറസാണ് സ്പെയിനിന്റെ വിജയഗോള് നേടിയത്. പത്തുപേരായി ചുരുങ്ങിയ അര്ജന്റീനയെ മറികടന്നാണ് സ്പെയിന് കിരീടമുയര്ത്തിയത്. 1962-ന് ശേഷം ലോകകപ്പ് നിലനിര്ത്തുന്ന ആദ്യ ടീമാവാമെന്ന അര്ജന്റീനയുടെ സ്വപ്നമാണ് ഇതോടെ അവസാനിച്ചത്.
'സ്പെയിന് മികച്ച ടീമായിരുന്നു - അതാണ് സത്യം. എന്നാല്, എന്റെ ടീം നേടിയെടുത്ത നേട്ടങ്ങളും ഫൈനല് വരെ എത്തിയതിന്റെ മൂല്യവും ഞാന് എന്നും ഓര്ക്കും,' സ്കലോണി പറഞ്ഞു. 'ഇത്രയും കഠിനമായ അധ്വാനത്തിന് ശേഷം എത്തിയ ഈ ഘട്ടം വലിയ വിലമതിപ്പുള്ളതാണ്.' വിജയങ്ങളെ ആഘോഷിക്കുന്ന അതേ അന്തസ്സോടെ തോല്വിയും ഉള്ക്കൊള്ളണമെന്ന് സ്കലോണി ഓര്മ്മിപ്പിച്ചു. 'ജയിക്കുമ്പോള് കാണിക്കുന്ന അതേ മാന്യത തോല്ക്കുമ്പോഴും കാണിക്കണം. തോല്ക്കാന് ഞങ്ങള്ക്കും അറിയാമെന്ന് ഇന്ന് തെളിയിച്ചു.' 'ഞങ്ങള് മത്സരം തോറ്റു, അത് ഞങ്ങള് അംഗീകരിക്കുന്നു. എന്നാല് അതുകൊണ്ട് ജീവിതം അവസാനിക്കുന്നില്ല, ഇവിടം വരെ എത്താന് ഞങ്ങള് നടത്തിയ പരിശ്രമങ്ങള് മറക്കുന്നില്ല,' അദ്ദേഹം കൂട്ടിച്ചേര്ത്തു. ടൂര്ണമെന്റിലുടനീളം തങ്ങള് നല്കിയ അവിശ്വസനീയമായ പിന്തുണയ്ക്ക് ആരാധകര്ക്ക് അദ്ദേഹം നന്ദി പറഞ്ഞു.
'കളിക്കാരും രാജ്യവും എല്ലാം നല്കിയാണ് പോരാടിയത്. കളിക്കളത്തില് എല്ലാം നല്കി പോരാടുമ്പോള്, അത് നമ്മുടെ ജനങ്ങള്ക്കും രാജ്യത്തിനും വലിയൊരു മാതൃകയാണ്. നമ്മള് വീണ്ടും എഴുന്നേല്ക്കണം, മറ്റൊരു വഴിയില്ല,' അദ്ദേഹം പറഞ്ഞു.
തുടര്ച്ചയായി രണ്ടാം തവണയും ഫൈനലില് എത്തിയ ടീമിന്റെ നേട്ടത്തിന് അര്ഹമായ അംഗീകാരം ലഭിക്കണമെന്ന് 48-കാരനായ സ്കലോണി അഭിപ്രായപ്പെട്ടു. 'രണ്ടാം സ്ഥാനം ലഭിച്ചതിനെ ഞാന് വിലമതിക്കുന്നു. ഫൈനല് വരെ എത്താന് വലിയ പ്രയത്നം ആവശ്യമാണ്, അത് വലിയ അംഗീകാരം അര്ഹിക്കുന്നുണ്ട്.'
'ജയിക്കണമെന്നുതന്നെയായിരുന്നു ആഗ്രഹം. പക്ഷേ, ആത്യന്തികമായി എനിക്ക് തോന്നുന്നത് നന്ദിയാണ്. അതോടൊപ്പം സ്വാഭാവികമായും ചെറിയൊരു സങ്കടവും. ടീം തങ്ങളുടെ പരമാവധി നല്കിയപ്പോള്, അവര് കളിച്ച രീതിയെക്കുറിച്ച് കുറ്റം പറയാന് കഴിയില്ല,' സ്കലോണി പറഞ്ഞു.
Related News
