ജിദ്ദ: ശനിയാഴ്ച ജിദ്ദ സൂപ്പര്‍ഡോമില്‍ നടക്കുന്ന 'ദി കംബാക്ക്' (The Comeback) ഹെവിവെയ്റ്റ് ബോക്‌സിംഗ് മത്സരത്തിന് മുന്നോടിയായുള്ള ഔദ്യോഗിക ഭാരപരിശോധനയില്‍ മുന്‍ ലോക ചാമ്പ്യന്‍ ആന്റണി ജോഷ്വ 251 പൗണ്ടും എതിരാളി ക്രിസ്റ്റ്യന്‍ പ്രെംഗ 261.4 പൗണ്ടും രേഖപ്പെടുത്തി. ചെങ്കടല്‍ തീരത്തെ ജിദ്ദ സൂപ്പര്‍ഡോമില്‍ നടന്ന ചടങ്ങില്‍ പ്രീ-ഫൈറ്റ് നടപടിക്രമങ്ങള്‍ പൂര്‍ത്തിയാക്കാന്‍ നിരവധി ബോക്‌സിംഗ് ആരാധകരാണ് എത്തിച്ചേര്‍ന്നത്.

രണ്ട് തവണ ഹെവിവെയ്റ്റ് ലോക ചാമ്പ്യനായിട്ടുള്ള ആന്റണി ജോഷ്വ, താന്‍ വേദിയിലേക്ക് കയറുന്നതിന് മുന്‍പ് എതിരാളിയെ പിന്തുണയ്ക്കാന്‍ ആരാധകരോട് ആവശ്യപ്പെട്ടത് സദസ്സില്‍ വലിയ ആവേശമുണ്ടാക്കി. ഇരുതാരങ്ങളും തമ്മിലുള്ള പരസ്പര ബഹുമാനം വ്യക്തമാക്കുന്നതായിരുന്നു ഈ പ്രവൃത്തി. ഇത് ആരാധകരുടെ വലിയ കയ്യടി നേടുകയും ചെയ്തു.

'ഞങ്ങള്‍ നല്ല ആത്മവിശ്വാസത്തിലാണ്' എന്ന് ആരാധകരോട് പറഞ്ഞ ജോഷ്വ, സദസ്സിലെ ആവേശം കൂടുതല്‍ വാനോളം ഉയര്‍ത്തി. അതേസമയം, ബഹുമാനങ്ങള്‍ നിലനില്‍ക്കെ തന്നെ ജോഷ്വയ്ക്ക് ശക്തമായ മുന്നറിയിപ്പാണ് പ്രെംഗ നല്‍കിയത്. 'ഞാന്‍ ജോഷ്വയെ നോക്ക് ഔട്ട് ചെയ്യും' എന്നായിരുന്നു പ്രെംഗയുടെ വെല്ലുവിളി.

തുടര്‍ന്ന് ഇരുവരും അവസാനമായി മുഖാമുഖം നോക്കി നില്‍ക്കുകയും (സ്റ്റെയര്‍ഡൗണ്‍) വേദി വിടുകയും ചെയ്തതോടെ മത്സരത്തിനുള്ള ഒരുക്കങ്ങള്‍ പൂര്‍ത്തിയായി. സൗദി ബോക്‌സിങ് താരങ്ങള്‍ ഉള്‍പ്പെടെ ആകെ 13 മത്സരങ്ങളാണ് ഇന്നത്തെ ബോക്‌സിങ് കാര്‍ഡില്‍ ഉള്‍പ്പെടുത്തിയിരിക്കുന്നത്.