ഷാര്‍ജ: പ്രാദേശിക സംഘര്‍ഷങ്ങളെ തുടര്‍ന്ന് വിമാന സര്‍വീസുകള്‍ തടസ്സപ്പെടുകയും ഇന്ധന വില റെക്കോര്‍ഡ് ഉയരത്തിലെത്തുകയും ചെയ്തതോടെ, യു.എ.ഇയുടെ ബജറ്റ് എയര്‍ലൈനായ എയര്‍ അറേബ്യയുടെ 2026-ലെ ആദ്യ പകുതിയിലെ അറ്റാദായം 51 ശതമാനം കുറഞ്ഞ് 374 ദശലക്ഷം ദിര്‍ഹമായി. ഷാര്‍ജ ആസ്ഥാനമായി പ്രവര്‍ത്തിക്കുന്ന ഈ ലോങ് കോസ്റ്റ് കാരിയര്‍ ജൂണ്‍ 30-ല്‍ അവസാനിച്ച ആറുമാസക്കാലയളവില്‍ 3.48 ബില്യണ്‍ ദിര്‍ഹം വരുമാനമാണ് രേഖപ്പെടുത്തിയത്. കഴിഞ്ഞ വര്‍ഷം ഇതേ കാലയളവില്‍ ഇത് 3.52 ബില്യണ്‍ ദിര്‍ഹമായിരുന്നു (1 ശതമാനം കുറവ്).

യാത്രക്കാരുടെ എണ്ണത്തില്‍ ഇടിവ്; ശക്തമായ സീറ്റ് ഒക്യുപന്‍സി നിലനിര്‍ത്തി

ഈ വര്‍ഷത്തെ ആദ്യ പകുതിയില്‍ എയര്‍ അറേബ്യയുടെ വിവിധ ഹബുകള്‍ വഴിയുള്ള യാത്രക്കാരുടെ എണ്ണം 8.7 ദശലക്ഷമാണ്. മുന്‍ വര്‍ഷത്തെ അപേക്ഷിച്ച് ഇത് 14 ശതമാനത്തിന്റെ കുറവാണ്. തുടര്‍ന്നുകൊണ്ടിരിക്കുന്ന പ്രാദേശിക സംഘര്‍ഷങ്ങള്‍ മൂലം പ്രവര്‍ത്തന ശേഷി കുറഞ്ഞതാണ് യാത്രക്കാരുടെ എണ്ണത്തില്‍ ഇടിവുണ്ടാകാന്‍ കാരണം. യാത്രക്കാരുടെ എണ്ണത്തില്‍ കുറവുണ്ടായെങ്കിലും, ശരാശരി 83 ശതമാനം സീറ്റ് ലോഡ് ഫാക്ടര്‍ നിലനിര്‍ത്താന്‍ കമ്പനിക്ക് സാധിച്ചു. ലഭ്യമായ സീറ്റുകളില്‍ യാത്രക്കാര്‍ യാത്ര ചെയ്ത അനുപാതമാണിത്. ഇതിലൂടെ എയര്‍ അറേബ്യയുടെ നെറ്റ്വര്‍ക്കില്‍ യാത്രാ ആവശ്യം താരതമ്യേന ശക്തമായി തുടരുന്നു.

ഫെബ്രുവരിയില്‍ ആരംഭിച്ച സംഘര്‍ഷം വ്യോമാതിര്‍ത്തി അടച്ചുപൂട്ടലുകള്‍, താല്‍ക്കാലിക നിയന്ത്രണങ്ങള്‍, കുറഞ്ഞ പ്രവര്‍ത്തന ശേഷി എന്നിവയിലൂടെ എയര്‍ലൈന്‍ പ്രവര്‍ത്തനങ്ങളെ സാരമായി ബാധിച്ചു. ഈ കാലയളവില്‍ റെക്കോര്‍ഡ് ഉയര്‍ന്ന ഇന്ധന വിലയും എയര്‍ അറേബ്യ നേരിടേണ്ടി വന്നു.

ഈ ആഘാതം ആഗോള വ്യോമയാന മേഖലയെയാകെ ബാധിച്ചിട്ടുണ്ട്. 2026-ന്റെ ആദ്യ പകുതിയില്‍ ഓസ്ട്രിയന്‍ എയര്‍ലൈന്‍സിന് 93 ദശലക്ഷം യൂറോയുടെ നഷ്ടമാണ് നേരിടേണ്ടി വന്നത്. മിഡില്‍ ഈസ്റ്റ് സംഘര്‍ഷം കാരണം മുന്‍ വര്‍ഷത്തേക്കാള്‍ 60 ദശലക്ഷം യൂറോയിലധികം ഇന്ധനച്ചെലവാണ് കമ്പനിക്ക് വര്‍ധിച്ചത്. പെഗാസസ് എയര്‍ലൈന്‍സും രണ്ടാം പാദത്തില്‍ പ്രവര്‍ത്തന നഷ്ടത്തിലേക്ക് കൂപ്പുകുത്തി. ഫിലിപ്പൈന്‍ എയര്‍ലൈന്‍സ് ആദ്യ പകുതിയില്‍ 25.1 ദശലക്ഷം ഡോളറിന്റെ അറ്റനഷ്ടമാണ് റിപ്പോര്‍ട്ട് ചെയ്തത്.

മിഡില്‍ ഈസ്റ്റ് എയര്‍ലൈന്‍സിന്റെ ലാഭം 2025-ലെ 7.2 ബില്യണ്‍ ഡോളറില്‍ നിന്ന് 2026-ല്‍ 4.3 ബില്യണ്‍ ഡോളര്‍ നഷ്ടത്തിലേക്ക് കൂപ്പുകുത്തുമെന്നാണ് അന്താരാഷ്ട്ര വ്യോമയാന സംഘടനയായ ഐ.എ.ടി.എ (IATA) പ്രവചിക്കുന്നത്. വ്യോമയാന മേഖല നേരിടുന്ന ശക്തമായ പ്രതിസന്ധിയാണ് ഇത് സൂചിപ്പിക്കുന്നത്.