ജിദ്ദ: കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ സ്ഥാപക നേതാക്കളിലൊരാളായ സഖാവ് പി. കൃഷ്ണപിള്ളയുടെ ചരമദിനാചരണത്തിന്റെ ഭാഗമായി ജിദ്ദ നവോദയ അനുസ്മരണ സമ്മേളനം സംഘടിപ്പിച്ചു. നവോദയ സെന്‍ട്രല്‍ കമ്മിറ്റി ഓഫീസില്‍ നടന്ന ചടങ്ങ് ശ്രീകുമാര്‍ മാവേലിക്കര ഉദ്ഘാടനം ചെയ്തു. ഡിവൈഎഫ്‌ഐ പൊതുസമ്മേളനത്തില്‍ അവതരിപ്പിച്ച 'മിസ' എന്ന നാടകത്തിനെതിരെ അശ്ലീലമെന്ന പേരില്‍ നടക്കുന്ന തെറ്റായ ആക്ഷേപങ്ങളെയും വ്യാജപ്രചാരണങ്ങളെയും ഉദ്ഘാടന പ്രസംഗത്തില്‍ അദ്ദേഹം ശക്തമായി വിമര്‍ശിച്ചു. കിസ്മത്ത് മമ്പാട് അധ്യക്ഷത വഹിച്ചു.

കേരളത്തിലെ തൊഴിലാളിവര്‍ഗ്ഗ പ്രസ്ഥാനത്തെ പടുത്തുയര്‍ത്തുന്നതില്‍ സഖാവ് കൃഷ്ണപിള്ള വഹിച്ച സമാനതകളില്ലാത്ത പങ്കിനെക്കുറിച്ചും അദ്ദേഹത്തിന്റെ വിപ്ലവാവേശത്തെക്കുറിച്ചും യോഗത്തില്‍ മുനീര്‍ പാണ്ടിക്കാട് അനുസ്മരണ പ്രഭാഷണം നടത്തി. നാടിന്റെ വിമോചനത്തിനായി സ്വന്തം ജീവിതം തന്നെ സമര്‍പ്പിച്ച ധീരനായ സംഘാടകനായിരുന്നു 'സഖാവ്' എന്ന് ജനങ്ങള്‍ സ്‌നേഹത്തോടെ വിളിച്ച കൃഷ്ണപിള്ളയെന്ന് അദ്ദേഹം അനുസ്മരിച്ചു. സി. എം. അബ്ദുറഹ്‌മാന്‍ സ്വാഗതവും ഏരിയ ആക്ടിംഗ് സെക്രട്ടറി ശിഹാബ് കോഴിക്കോട് നന്ദിയും രേഖപ്പെടുത്തി.