മസ്‌കത്ത്: മസ്‌കത്തിലെ അല്‍ ഖുവൈറില്‍ ഫ്‌ലാറ്റിന്റെ ടെറസില്‍ നിന്ന് വീണ് പാലക്കാട് സ്വദേശി മരിച്ചു. പാലക്കാട് ഒറ്റപ്പാലം പാലപ്പുറം കയറംപാറ ഹലോ നഗര്‍ 'ശ്രീലയത്തില്‍' മുത്തോടി ശ്രീധരന്‍ (69) ആണ് മരിച്ചത്. ഒമാനിലെ ബിഷാറയില്‍ സര്‍വിസ് എന്‍ജിനീയറായി വിരമിച്ച ഇദ്ദേഹം കഴിഞ്ഞ ബുധനാഴ്ച വൈകീട്ട് 6.30-ഓടെയാണ് അപകടത്തില്‍പ്പെട്ടത്. താമസസ്ഥലത്തെ ടെറസില്‍ വൈകുന്നേരത്തെ വ്യായാമത്തിന് പോയതായിരുന്നു.

1990 മുതല്‍ ഒമാനില്‍ പ്രവാസിയായിരുന്ന ശ്രീധരന്റെ ഭാര്യ ഒമാന്‍ യുനൈറ്റഡ് ഇന്‍ഷുറന്‍സില്‍ സീനിയര്‍ മാനേജരായ ലത കുമാരന്‍ നായരാണ്. ബംഗളൂരുവില്‍ എന്‍ജിനീയര്‍മാരായ രാഹുല്‍ ശ്രീധരന്‍, രോഹിത് ശ്രീധരന്‍ എന്നിവര്‍ മക്കളും സി. നന്ദന, സ്വാതി രാജ എന്നിവര്‍ മരുമക്കളുമാണ്.

സംഭവസ്ഥലത്തെത്തിയ റോയല്‍ ഒമാന്‍ പൊലീസ് പ്രാഥമിക നടപടികള്‍ പൂര്‍ത്തിയാക്കി. കെ.എം.സി.സി കെയര്‍ വിങ്ങിന്റെ സഹകരണത്തോടെ മൃതദേഹം നാട്ടിലെത്തിക്കാനുള്ള ശ്രമങ്ങള്‍ പുരോഗമിക്കുന്നു. നിലവില്‍ മെഡിക്കല്‍ സിറ്റി ഹോസ്പിറ്റല്‍ മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം നാട്ടിലെത്തിച്ച ശേഷം തിരുവില്വാമല ഐവര്‍ മഠം ശ്മശാനത്തില്‍ സംസ്‌കരിക്കും.