ന്യൂയോര്‍ക്ക് - ആര്‍.എസ്.എസ്. സര്‍സംഘചാലക് മോഹന്‍ ഭാഗവത് ന്യൂയോര്‍ക്കിലെ മാഡിസണ്‍ സ്‌ക്വയര്‍ ഗാര്‍ഡനില്‍ നടത്തിയ പ്രസംഗം ഒരേ സമയം അന്താരാഷ്ട്ര സമൂഹത്തിനുള്ള ഇന്ത്യയുടെ സന്ദേശവും ഇന്ത്യന്‍ ഭരണകൂട നയങ്ങള്‍ക്കെതിരായ താക്കീതുമായി. ആര്‍.എസ്.എസ് മേധാവിയുടെ വാക്കുകളും ഇന്ത്യയില്‍ അവര്‍ നിയന്ത്രിക്കുന്ന ഭരണകൂടത്തിന്റെ നടപടികളും ഇതോടെ ഗൗരവമായി ചര്‍ച്ച ചെയ്യപ്പെടുമെന്നുറപ്പായി.
ഇന്ത്യയില്‍ നിന്ന് മുസലിംകളെ പുറത്താക്കാമെന്ന് കരുതുന്ന ഹിന്ദു യഥാര്‍ഥ ഹിന്ദുവല്ലന്നും,
വൈവിധ്യത്തെ ആഘോഷിക്കുകയും അതിനുള്ളിലെ ഏകത തിരിച്ചറിയുകയും വേണമെന്നും, അനുസരിക്കുന്നവരെ മാത്രം സംരക്ഷിക്കുന്നവര്‍ രാക്ഷസന്മാരാണെന്നും ഭാഗവത് പ്രഖ്യാപിച്ചു. ഇന്ത്യ ലോകത്തെ ഉപദേശത്തിലൂടെയല്ല, മാതൃകയിലൂടെയാണ് നയിക്കേണ്ടതെന്ന് അദ്ദേഹം പറഞ്ഞു. വലിയ വിമര്‍ശനങ്ങള്‍ക്കിടെയാണ് ഭാഗവത് ന്യൂയോര്‍ക്കില്‍ പ്രസംഗിച്ചത്. ആര്‍.എസ്.എസ്. ശതാബ്ദി ആഘോഷങ്ങളുടെ പശ്ചാത്തലത്തില്‍ നടന്ന ഈ പ്രസംഗം അന്താരാഷ്ട്ര സമൂഹത്തിനും ഇന്ത്യയിലെ ഭരണകൂടത്തിനും ഒരുപോലെ നല്‍കുന്ന രാഷ്ട്രീയസാംസ്‌കാരിക സന്ദേശമായാണ് വിലയിരുത്തപ്പെടുന്നത്.
സമീപകാലത്ത് ആര്‍.എസ്.എസിനെതിരെ ഉയര്‍ന്നുവരുന്ന ഭൂരിപക്ഷവാദവും ന്യൂനപക്ഷ ആശങ്കകളും ലക്ഷ്യമിട്ടുള്ള മറുപടിയായിരുന്നു അദ്ദേഹത്തിന്റെ പ്രസംഗം. ന്യൂയോര്‍ക്ക് മേയര്‍ സുഹ്‌റാന്‍ മംദാനിയും വിവിധ മനുഷ്യാവകാശ സംഘടനകളും ആര്‍.എസ്.എസ്. പരിപാടിക്കെതിരെ രംഗത്തുവന്നിരുന്നു. തങ്ങള്‍ കണ്ടു വളര്‍ന്ന ഇന്ത്യ ബഹുസ്വരതയുടേതാണെന്നും ഒരു പ്രത്യേക വിശ്വാസം അടിച്ചേല്‍പിക്കുന്ന രീതിയാണ് ഇപ്പോഴത്തേതെന്നും അവര്‍ കുറ്റപ്പെടുത്തിയിരുന്നു.
ഈ സന്ദേശം ഇന്ത്യയിലെ ഭരണാധികാരികളിലേക്കും നീളുന്നുവെന്ന വിലയിരുത്തലും ശക്തമാണ്. മതസാമൂഹിക ധ്രുവീകരണവും വിദ്വേഷ പ്രസംഗങ്ങളും ന്യൂനപക്ഷങ്ങള്‍ ഉയര്‍ത്തുന്ന ആശങ്കകളും രാജ്യത്തിനകത്തും പുറത്തും വിമര്‍ശനത്തിന് ഇടയാക്കുന്ന ഘട്ടത്തിലാണ് 'വൈവിധ്യത്തില്‍ ഏകത'യും 'എല്ലാവരെയും ഒരുപോലെ സംരക്ഷിക്കണം' എന്ന സന്ദേശവും ഭാഗവത് മുന്നോട്ടുവെക്കുന്നത്. ഇന്ത്യയുടെ ആഗോള പ്രതിച്ഛായ മെച്ചപ്പെടണമെങ്കില്‍ ഭരണകൂടത്തിന്റെ പ്രവര്‍ത്തനങ്ങളിലും ആ നിലപാട് പ്രതിഫലിക്കണമെന്ന പരോക്ഷ ഓര്‍മ്മപ്പെടുത്തലായി ഇതിനെ കാണാം.
പ്രവാസി ഇന്ത്യക്കാരോട് അമേരിക്കയെ 'കര്‍മഭൂമി'യായി കണ്ട് ആദ്യം അവിടത്തെ പൗരധര്‍മ്മം നിറവേറ്റണമെന്ന ആഹ്വാനവും ശ്രദ്ധേയമാണ്. ദേശീയതയെ അന്ധമായ രാഷ്ട്രീയ പിന്തുണയായി കാണാതെ ഉത്തരവാദിത്തമുള്ള പൗരത്വവുമായി ബന്ധിപ്പിക്കാനുള്ള ശ്രമമാണത്.
പ്രസംഗത്തിലെ ആശയങ്ങളും രാജ്യത്തെ യാഥാര്‍ഥ്യ രാഷ്ട്രീയവും തമ്മിലുള്ള അന്തരം ചര്‍ച്ചയാകുമെന്നതും ഉറപ്പാണ്. അതുകൊണ്ടുതന്നെ ഭാഗവതിന്റെ പ്രസംഗത്തിന്റെ യഥാര്‍ത്ഥ വിലയിരുത്തല്‍ വാക്കുകളിലല്ല, ഭരണത്തിലും സാമൂഹിക ജീവിതത്തിലും ഈ ഉള്‍ക്കൊള്ളല്‍ എത്രത്തോളം പ്രതിഫലിക്കുന്നു എന്നതിലായിരിക്കും. അതാണ് അന്താരാഷ്ട്ര സമൂഹവും ഇന്ത്യന്‍ ജനാധിപത്യവും ഒരുപോലെ ഉറ്റുനോക്കുന്നത്.