​
​ദോഹ: ഖത്തറും ഇന്ത്യയും തമ്മിലുള്ള വ്യാപാര-നിക്ഷേപ സഹകരണം കൂടുതൽ ശക്തിപ്പെടുത്തുന്നതിന്റെ ഭാഗമായി ഉന്നതതല ചർച്ചകൾ നടന്നു. ഖത്തർ വാണിജ്യ വ്യവസായ മന്ത്രാലയത്തിലെ വിദേശവ്യാപാര ചുമതലയുള്ള സഹമന്ത്രി ഡോ. അഹമ്മദ് ബിൻ മുഹമ്മദ് അൽ സയ്യിദ്, ഇന്ത്യൻ ധനകാര്യ-കോർപ്പറേറ്റ് കാര്യ മന്ത്രി നിർമ്മല സീതാരാമനുമായി കൂടിക്കാഴ്ച നടത്തി. ചൊവ്വാഴ്ച ദോഹയിലായിരുന്നു കൂടിക്കാഴ്ച.
​ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം മെച്ചപ്പെടുത്തുന്നതിനൊപ്പം വ്യാപാരം, നിക്ഷേപം എന്നീ മേഖലകളിലെ സഹകരണം വിപുലമാക്കുന്നതിനെക്കുറിച്ചും പൊതുതാൽപ്പര്യമുള്ള വിവിധ വിഷയങ്ങളെക്കുറിച്ചും നേതാക്കൾ ചർച്ച ചെയ്തു. ഖത്തറിലെയും ഇന്ത്യയിലെയും നിക്ഷേപകർക്കും കമ്പനികൾക്കും പുതിയ പങ്കാളിത്ത അവസരങ്ങൾ സൃഷ്ടിക്കുന്നതും സാമ്പത്തിക സഹകരണം ഉറപ്പാക്കുന്നതും കൂടിക്കാഴ്ചയിൽ വിഷയമായി. ഇരു രാജ്യങ്ങളിലും ലഭ്യമായ ബിസിനസ് സാധ്യതകൾ പരമാവധി പ്രയോജനപ്പെടുത്താൻ കമ്പനികളെയും നിക്ഷേപകരെയും പ്രോത്സാഹിപ്പിക്കാനും ചർച്ചയിൽ തീരുമാനമായി.
​ഇന്ത്യയിൽ നടപ്പിലാക്കാൻ ഉദ്ദേശിക്കുന്ന 10 ശതകോടി ഡോളറിന്റെ നിക്ഷേപ പദ്ധതികളെക്കുറിച്ചും ഉഭയകക്ഷി നിക്ഷേപ കരാറിന് അന്തിമരൂപം നൽകുന്നതിനെക്കുറിച്ചും കേന്ദ്ര ധനമന്ത്രി നിർമ്മല സീതാരാമൻ അലി ബിൻ അഹമ്മദ് അൽ കുവാരിയുമായി നടന്ന കൂടിക്കാഴ്ചയിൽ ചർച്ച ചെയ്തു. ദോഹയിൽ നടക്കുന്ന ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ബാങ്കിന്റെ (AIIB) 11-ാമത് വാർഷിക യോഗത്തിനിടെയായിരുന്നു ഈ സുപ്രധാന ചർച്ച.
​ഇന്ത്യയുടെ യു.പി.ഐ (UPI) ഡിജിറ്റൽ പേയ്മെന്റ് സേവനങ്ങൾ ഖത്തറിലുടനീളം വ്യാപിപ്പിക്കുന്നതും, ഇന്ത്യയുടെ നാഷണൽ ഇൻഫ്രാസ്ട്രക്ചർ ആൻഡ് ഇൻവെസ്റ്റ്‌മെന്റ് ഫണ്ടുമായുള്ള (NIIF) ഖത്തറിന്റെ സഹകരണവും യോഗത്തിൽ വിഷയമായി. വ്യാപാര-നിക്ഷേപ മേഖലകളിലെ സഹകരണം കൂടുതൽ ശക്തമാക്കുന്നതിനായി ഇരട്ട നികുതി ഒഴിവാക്കൽ കരാറിനെക്കുറിച്ചും (DTAA) ഇരു നേതാക്കളും സംസാരിച്ചു.
​സന്ദർശനവേളയിൽ ഖത്തറിലെ ഇന്ത്യൻ സമൂഹത്തിന്റെ മികച്ച സേവനങ്ങളെ ഖത്തർ ധനമന്ത്രി അഭിനന്ദിച്ചു. AIIB-യിലെ രണ്ടാമത്തെ വലിയ ഓഹരിയുടമ എന്ന നിലയിൽ ഇന്ത്യയെ പ്രതിനിധീകരിച്ചാണ് കേന്ദ്ര ധനമന്ത്രി മൂന്ന് ദിവസത്തെ സന്ദർശനത്തിനായി ഖത്തറിലെത്തിയത്. സമ്മേളനത്തിനിടെ സ്വിറ്റ്‌സർലൻഡ്, അൾജീരിയ, സൗദി അറേബ്യ, നേപ്പാൾ തുടങ്ങിയ രാജ്യങ്ങളിലെ ധനമന്ത്രിമാരുമായും AIIB പ്രസിഡന്റുമായും അവർ ഉഭയകക്ഷി ചർച്ചകൾ നടത്തി.
​ഖത്തറി ബിസിനസ്സ്മെൻ അസോസിയേഷൻ (QBA) സംഘടിപ്പിച്ച റൗണ്ട് ടേബിൾ സമ്മേളനത്തിലും കേന്ദ്ര ധനമന്ത്രി നിർമ്മല സീതാരാമൻ പങ്കെടുത്തു. ആഗോള സാമ്പത്തിക അനിശ്ചിതത്വങ്ങൾക്കിടയിലും ഇന്ത്യ കൈവരിക്കുന്ന കരുത്തുറ്റ സാമ്പത്തിക വളർച്ചയും പുതിയ നിക്ഷേപ സാധ്യതകളും യോഗത്തിൽ ധനമന്ത്രി വിശദീകരിച്ചു.
​2025-26 സാമ്പത്തിക വർഷത്തിന്റെ ആദ്യ പാദത്തിൽ ഇന്ത്യയുടെ യഥാർത്ഥ ജി.ഡി.പി (Real GDP) വളർച്ച 7.8 ശതമാനമായി ഉയർന്നതായും, നിക്ഷേപ മേഖലയിൽ 11.9 ശതമാനം വളർച്ച രേഖപ്പെടുത്തിയതായും ധനമന്ത്രാലയം വ്യക്തമാക്കി. ജപ്പാൻ ക്രെഡിറ്റ് റേറ്റിംഗ് ഏജൻസി (JCR) ഇന്ത്യയുടെ ദീർഘകാല ഇഷ്യൂവർ റേറ്റിംഗ് 'BBB+' ൽ നിന്ന് 'A-' ആയി ഉയർത്തിയത് രാജ്യത്ത് നടപ്പിലാക്കുന്ന ഘടനാപരമായ പരിഷ്കാരങ്ങൾക്കുള്ള അംഗീകാരമാണെന്ന് യോഗത്തിൽ ചൂണ്ടിക്കാണിക്കപ്പെട്ടു.
​കൂടാതെ, 2025-26 സാമ്പത്തിക വർഷത്തിൽ കഴിഞ്ഞ 15 വർഷത്തിനിധയിലെ ഏറ്റവും ഉയർന്ന വാർഷിക വിദേശ നേരിട്ടുള്ള നിക്ഷേപമാണ് (FDI) ഇന്ത്യ നേടിയത് — 94.53 ശതകോടി യു.എസ് ഡോളർ. ഇരുരാജ്യങ്ങളും തമ്മിലുള്ള ഉഭയകക്ഷി സാമ്പത്തിക ബന്ധം കൂടുതൽ ശക്തമാക്കുന്നതിന് ഇന്ത്യയിലെ വ്യവസായ-വ്യാപാര മേഖലകളിൽ സജീവമായി പങ്കാളികളാകാൻ ഖത്തറിലെ പ്രമുഖ വ്യവസായികളെ കേന്ദ്ര ധനമന്ത്രി ക്ഷണിച്ചു.