തബൂക്ക്: അടിയന്തര ലാന്‍ഡിംഗിന് വിധേയമായ ഫ്‌ലൈദുബായ് FZ1073 വിമാനത്തിലെ യാത്രക്കാരെല്ലാം മറ്റൊരു വിമാനത്തില്‍ തങ്ങളുടെ ലക്ഷ്യസ്ഥാനത്തേക്ക് യാത്രതിരിച്ചതായി തബൂക്കിലെ പ്രിന്റ് സുല്‍ത്താന്‍ ബിന്‍ അബ്ദുല്‍ അസീസ് അന്താരാഷ്ട്ര വിമാനത്താവളം അറിയിച്ചു. ബുധനാഴ്ച വൈകീട്ട് 5:40-നാണ് പകരമായെത്തിയ വിമാനം പുറപ്പെട്ടത്.

സെപ്റ്റംബര്‍ 30 ബുധനാഴ്ച രാവിലെ പ്രാദേശിക സമയം 8:44-നാണ് തബൂക്ക് വിമാനത്താവളത്തില്‍ അടിയന്തരമായി ഇറങ്ങാന്‍ അനുമതി തേടി ഫ്‌ലൈദുബായ് വിമാനം സന്ദേശം അയച്ചത്. തുടര്‍ന്ന് വിമാനത്താവളത്തില്‍ അടിയന്തരാവസ്ഥ പ്രഖ്യാപിക്കുകയും, വിമാനത്തിന് ആവശ്യമായ സഹായങ്ങള്‍ നല്‍കാനുള്ള ഒരുക്കങ്ങള്‍ പൂര്‍ത്തിയാക്കുകയും ചെയ്തു. രാവിലെ 9:45-ഓടെ വിമാനം സുരക്ഷിതമായി ലാന്‍ഡ് ചെയ്തു.

വിമാനത്തിന്റെ പൈലറ്റിനും കോ-പൈലറ്റിനും പരിക്കേറ്റതായി കണ്ടെത്തിയതിനെ തുടര്‍ന്ന് ഇരുവരെയും വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റി. ടെര്‍മിനലില്‍ വെച്ച് യാത്രക്കാര്‍ക്ക് ആവശ്യമായ പരിചരണം നല്‍കിയതോടൊപ്പം, മറ്റൊരു വിമാനം ക്രമീകരിക്കുന്നതിനായി എയര്‍ലൈന്‍ അധികൃതരുമായി വിമാനത്താവള അധികൃതര്‍ ഏകോപനം നടത്തുകയും ചെയ്തു.

വിമാനത്താവളത്തിന്റെയും യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുന്നതിനായി അന്താരാഷ്ട്ര കരാറുകള്‍ക്കും വ്യവസ്ഥകള്‍ക്കും ഒപ്പം ജനറല്‍ അതോറിറ്റി ഓഫ് സിവിലിയന്‍ ഏവിയേഷന്റെ ചട്ടങ്ങളും കര്‍ശനമായി പാലിക്കുമെന്ന് വിമാനത്താവള അധികൃതര്‍ വ്യക്തമാക്കി. സംഭവത്തില്‍ പ്രഗത്ഭരായ അധികാരികളുടെ നേതൃത്വത്തിലുള്ള അന്വേഷണം പുരോഗമിക്കുകയാണെന്നും അവര്‍ അറിയിച്ചു.

അതേസമയം, വിമാനത്തിലുണ്ടായിരുന്ന ഡ്യൂട്ടിയിലുള്ള ക്രൂ അംഗങ്ങളുടെ സമയോചിതമായ ഇടപെടലിലൂടെ വിമാനം വിജയകരമായി സുരക്ഷിതമാക്കുകയും തബൂക്ക് വിമാനത്താവളത്തില്‍ ഇറക്കാന്‍ സാധിക്കുകയും ചെയ്തതായി ഫ്‌ലൈദുബായ് പ്രസ്താവനയില്‍ വ്യക്തമാക്കി. സംഭവത്തിന് പിന്നിലെ യഥാര്‍ത്ഥ കാരണം ഇതുവരെ വ്യക്തമല്ലെന്നും, ഇത് ഔദ്യോഗിക അന്വേഷണത്തിന് വിധേയമാണെന്നും എയര്‍ലൈന്‍ അറിയിച്ചു.