ദുബായ്: ദുബായില് നിന്ന് തെല് അവീവിലേക്ക് പുറപ്പെട്ട ഫ്ലൈദുബായ് വിമാനത്തില് സഹപൈലറ്റുമായി കോക്ക്പിറ്റില് ഏറ്റുമുട്ടിയ ക്യാപ്റ്റന് ഇന്ത്യക്കാരനാണെന്ന് ഇസ്രായേല് മാധ്യമം റിപ്പോര്ട്ട് ചെയ്തു. ഒമാന് പൗരനായ കോപൈലറ്റ് വിമാനം തകര്ക്കാന് ശ്രമിച്ചതായാണ് ഇസ്രായേല് ഔദ്യോഗിക കേന്ദ്രങ്ങളെ ഉദ്ധരിച്ചുള്ള റിപ്പോര്ട്ടുകള് വ്യക്തമാക്കുന്നത്. വിമാനം പിന്നീട് സൗദി അറേബ്യയില് അടിയന്തരമായി ഇറക്കി.
വിമാനം തകര്ക്കുന്നത് തടയാന് ക്യാപ്റ്റന് ഇന്ത്യന് പൗരനായ സ്മിത് മച്ചാര് സഹപൈലറ്റുമായി മല്ലിട്ടതായും, തുടര്ന്ന് ഇസ്രായേലി യാത്രക്കാരുടെ കൂടി സഹായത്തോടെ അക്രമിയായ സഹപൈലറ്റിനെ കീഴ്പ്പെടുത്തിയതായും റിപ്പോര്ട്ടില് പറയുന്നു. വിമാനത്തിലുണ്ടായിരുന്ന മുഴുവന് യാത്രക്കാരെയും വന് ദുരന്തത്തില് നിന്ന് രക്ഷിച്ച ഈ ഹീറോകളെ സല്യൂട്ട് ചെയ്യുന്നതായി ഇസ്രായേല് പ്രധാനമന്ത്രി ബെഞ്ചമിന് നെതന്യാഹു പറഞ്ഞു.
യാത്രാമധ്യേ ഇസ്രായേലിനോട് അടുത്തപ്പോള് പൈലറ്റുമാരില് ഒരാള് മറ്റേയാളെ കുത്തുകയും യാത്രക്കാരുമായി വിമാനം ഇടിച്ചിറക്കാന് ശ്രമിക്കുകയും ചെയ്തതായി നെതന്യാഹു പ്രസ്താവനയില് പറഞ്ഞു. വിമാനം കൂപ്പുകുത്താന് തുടങ്ങിയപ്പോള് യാത്രക്കാരും ജീവനക്കാരും ചേര്ന്ന് കോക്ക്പിറ്റില് അതിക്രമിച്ചു കയറി അക്രമിയെ കീഴടക്കുകയായിരുന്നു. മറ്റൊരു ജീവനക്കാരന് കൂടി എത്തിയാണ് വിമാനത്തിന്റെ നിയന്ത്രണം വീണ്ടെടുത്ത് സുരക്ഷിതമായി ലാന്ഡ് ചെയ്തത്.
സൗദി അറേബ്യയിലെ തബൂക്ക് എയര്പോര്ട്ടില് വിമാനം സുരക്ഷിതമായി ലാന്ഡ് ചെയ്തതായും, പരിക്കേറ്റ പൈലറ്റുമാരെ ആശുപത്രിയില് പ്രവേശിപ്പിച്ചതായും അധികൃതര് അറിയിച്ചു. കുറ്റകൃത്യം നടത്തിയ പൈലറ്റിനെ അറസ്റ്റ് ചെയ്യുകയും സൗദി അധികൃതര് ചോദ്യം ചെയ്തുവരികയാണെന്നും നെതന്യാഹു പറഞ്ഞു.
ദുബായില് നിന്ന് തെല് അവീവിലേക്ക് പോയ FZ1073 ഫ്ലൈദുബായ് വിമാനത്തില് 27 കുട്ടികള് ഉള്പ്പെടെ 174 യാത്രക്കാരാണ് ഉണ്ടായിരുന്നത്. വിമാനം അഞ്ച് മിനിറ്റിനുള്ളില് 34,000 അടി ഉയരത്തില് നിന്ന് പെട്ടെന്ന് താഴേക്ക് പതിക്കുകയും തുടര്ന്ന് ഗതിമാറി തബൂക്കിലേക്ക് പോവുകയുമായിരുന്നു. വിമാനത്തില് ഭീകരമായ നിലവിളികളായിരുന്നുവെന്നും മൂന്നോ അഞ്ചോ പേര് ചേര്ന്ന് കോക്ക്പിറ്റില് ഇരച്ചുകയറി അക്രമിയെ കീഴ്പ്പെടുത്തുകയായിരുന്നുവെന്ന് ഒരു യാത്രക്കാരി വെളിപ്പെടുത്തി.
Related News
