ജിദ്ദ: ​ജോലിചെയ്ത കമ്പനിയുടെ പരാതിയിൽ നാലുമാസമായി സൗദിയിൽ ജയിലിൽ കഴിഞ്ഞിരുന്ന പറവൂർ വെടിമറ സ്വദേശി ഷിജുമോൻ ഇന്ന് വൈകിട്ട് സൗദി സമയം 5 മണിക്ക് നാട്ടിലേക്ക് തിരിക്കും. സൗദി എയർലൈൻസിന്റെ മുംബൈ വിമാനത്തിലാണ് നാട്ടിലേക്ക് തിരിക്കുന്നതെന്ന് കെ എം സി സി ഗ്ലോബൽ കമ്മിറ്റി ജനറൽ സെക്രട്ടറി നാസർ എടവനക്കാട് അറിയിച്ചു.

പറവൂരിലെ മുസ്ലിം ലീഗ് നേതാവ് അബ്ദുള്ളയാണ് ഷിജുമോൻ ജയിലിലുള്ള കാര്യം ശ്രദ്ധയിൽപ്പെടുത്തിയത്.
​കമ്പനിയിൽനിന്ന് വാഹനം വാടകയ്ക്കെടുത്തു ടാക്സി ഓടിച്ച വകയിൽ മൂന്നരലക്ഷം ഇന്ത്യൻ രൂപ കൊടുക്കാൻ കഴിയാതെ വന്നതാണ് കേസിനാസ്പദമായ സംഭവം. ഞാൻ നേതൃത്വം നൽകുന്ന 'സേവ' മുൻകയ്യെടുത്ത് കോടതിയിൽ അടയ്ക്കാനുള്ള തുക ശേഖരിക്കാൻ ശ്രമം നടന്നു. കെ.എം.സി.സി സൗത്ത് സോൺ, ജിദ്ദ ആലുവ കൂട്ടായ്മ, മുസിരിസ് പ്രവാസി ഫോറം എന്നിവരുടെ സഹകരണത്തോടെ കോടതിയിൽ പണമടച്ച് ജയിൽമോചനം കാത്തിരിക്കുന്നതിനിടയിൽ ഷിജുമോന്റെ പിതാവ് മരണപ്പെട്ടു.
​മരണവാർത്ത ജയിൽ അധികാരികളെയും ജിദ്ദ ഇന്ത്യൻ കോൺസുലേറ്റിനെയും അറിയിച്ചു. അവരുടെ ശ്രമഫലമായി ഷിജുമോന്റെ മോചനം വേഗത്തിലായി.

ഇന്ന് മൂന്നുമണിയോടെ മക്കയിലുള്ള തൻ്റെ സൗദി സുഹൃത്ത് അബു സിയാദിനെ ജയിൽ അധികൃതർ മോചനവാർത്ത അറിയിക്കുകയായിരുന്നു. മകന്റെ മോചനം കാണാൻ കാത്തുനിൽക്കാതെയുള്ള പിതാവിന്റെ വേർപാട് ഒരു നോവായി ഈ സന്തോഷവേളയിലും ബാക്കിയാകുന്നുവെന്ന് നാസർ പറഞ്ഞു.