ബെര്‍ലിന്‍: ജര്‍മനിയിലെ പടിഞ്ഞാറന്‍ നഗരമായ ബോഹുമില്‍ റെസിഡന്‍ഷ്യല്‍ അപ്പാര്‍ട്മെന്റിലുണ്ടായ വന്‍ തീപിടിത്തത്തില്‍ കൊല്ലപ്പെട്ട മൂന്ന് പേരും മലയാളികളാണെന്ന് സ്ഥിരീകരിച്ചു. കൊല്ലം ചാമക്കാട് സ്വദേശിനി അഞ്ജലി ഷീല ജോയ് (25), കാലടി സ്വദേശിനി സ്വിന്‍ ജോണി (27), ഇടുക്കി, കട്ടപ്പന സ്വദേശി നോവ സാബു (26) എന്നിവരാണ് വിഷപ്പുകയും തീയും ശ്വസിച്ച് മരിച്ചത്. അഞ്ചുപേര്‍ക്ക് പരിക്കേറ്റു. സംഭവവുമായി ബന്ധപ്പെട്ട് ഇതേ കെട്ടിടത്തില്‍ താമസിക്കുന്ന 41 കാരനായ സ്വദേശിയെ പൊലീസ് കൊലപാതക കുറ്റത്തിന് കസ്റ്റഡിയിലെടുത്തു. ഹോമിസൈഡ് സ്‌ക്വാഡ് ഇയാളെ വിശദമായി ചോദ്യം ചെയ്തുവരികയാണ്.

ചൊവ്വാഴ്ച പുലര്‍ച്ചെ 4.15ഓടെയായിരുന്നു നാടിനെ നടുക്കിയ ദുരന്തം. ബോഹും ഹോഫ്സ്റെറഡെ മേഖലയിലെ പോസ്ററ്സ്ട്രാസെയിലുള്ള ബഹുനില കെട്ടിടത്തിന്റെ താഴത്തെ നിലയിലെ ഇടനാഴിയില്‍ സൂക്ഷിച്ചിരുന്ന കുട്ടികളുടെ സ്ട്രോളറുകള്‍ക്ക് തീവച്ചതാകാമെന്നാണ് പ്രാഥമിക നിഗമനം. തുടര്‍ന്ന് മുകളിലേക്ക് കയറാനുള്ള തടികൊണ്ടുള്ള കോവണിയിലേക്ക് തീ ആളിപ്പടരുകയായിരുന്നു. രണ്ടാഴ്ച മുമ്പ് മാത്രമാണ് മരിച്ചവര്‍ ഈ കെട്ടിടത്തിന്റെ രണ്ടാം നിലയില്‍ താമസത്തിനെത്തിയത്.

കെട്ടിടത്തില്‍ നിന്നുള്ള ഏക രക്ഷാമാര്‍ഗമായ തടികൊണ്ടുള്ള കോവണി പൂര്‍ണമായി കത്തിയമരുകയും ഇടനാഴിയിലാകെ കനത്ത വിഷപ്പുകയും കൊടുംചൂടും പടരുകയും ചെയ്തതോടെ മുകള്‍ നിലകളിലെ താമസക്കാര്‍ക്ക് പുറത്തിറങ്ങാനായില്ല. പലരും ജനലുകള്‍ വഴി സഹായം അഭ്യര്‍ഥിച്ച് നിലവിളിച്ചു. സ്ഥലത്തെത്തിയ അഗ്നിശമന സേന ടേണ്‍ടേബിള്‍ ലാഡറുകളും പോര്‍ട്ടബിള്‍ കോവണികളും ഉപയോഗിച്ച് സാഹസികമായാണ് നാല് പേരെ താഴെയിറക്കിയത്. ഒരാള്‍ ജീവന്‍ രക്ഷിക്കാന്‍ അഗ്നിശമന സേന താഴെ വിരിച്ച സേഫ്റ്റി കുഷ്യനിലേക്ക് ജനലിലൂടെ എടുത്തുചാടുകയായിരുന്നു. പരുക്കേറ്റ അഞ്ച് പേര്‍ വിവിധ ആശുപത്രികളില്‍ ചികിത്സയിലാണ്.

ഫോറന്‍സിക് വിദഗ്ധരുടെ പരിശോധനയില്‍ ഷോര്‍ട്ട് സര്‍ക്യൂട്ട് പോലുള്ള സാങ്കേതിക തകരാറുകള്‍ ഒന്നുമില്ലെന്ന് വ്യക്തമായിട്ടുണ്ട്. മനഃപൂര്‍വം തീവച്ചതാണെന്ന നിഗമനത്തെ തുടര്‍ന്നാണ് കൊലപാതക കുറ്റത്തിന് കേസെടുത്തത്. തീപിടിത്തത്തിന് തലേദിവസം ഉച്ചയ്ക്ക് ഇതേ കെട്ടിടത്തില്‍ താമസക്കാര്‍ തമ്മില്‍ തര്‍ക്കമുണ്ടായതിനെത്തുടര്‍ന്ന് പൊലീസ് സംഘം സ്ഥലത്തെത്തിയിരുന്നു. ഈ തര്‍ക്കത്തിന് സംഭവവുമായി ബന്ധമുണ്ടോയെന്നത് അന്വേഷണ സംഘം ഗൗരവമായി പരിശോധിക്കുന്നുണ്ട്. ബോഹും നഗരം കഴിഞ്ഞ ഏതാനും ദശാബ്ദങ്ങള്‍ക്കിടയില്‍ കണ്ട ഏറ്റവും വലിയ ദുരന്തമാണിതെന്ന് നഗര മേയര്‍ യോര്‍ഗ് ലൂക്കാറ്റ് അനുശോചന സന്ദേശത്തില്‍ പറഞ്ഞു. അപകടം നടന്ന കെട്ടിടം പൊലീസ് സീല്‍ ചെയ്തിരിക്കുകയാണ്.