റിയാദ്- സൗദി അറേബ്യയുടെ അപ്പാച്ചെ ഹെലികോപ്റ്റര്‍ വെടിവെച്ചിട്ടെന്ന ഹൂത്തി മിലിഷ്യയുടെ അവകാശവാദങ്ങള്‍ തള്ളി യമനിലെ സഖ്യസേന വക്താവ് മേജര്‍ ജനറല്‍ തുര്‍ക്കി അല്‍-മാലിക്കി. അപ്പാച്ചെ ഹെലികോപ്റ്ററുകള്‍ ഉടന്‍ തന്നെ യുദ്ധക്കളത്തില്‍ പ്രവേശിക്കുമെന്നും, ഹൂത്തി വക്താവ് അതിന്റെ രൂപം ഓര്‍ത്തു വെക്കുന്നത് നന്നായിരിക്കുമെന്നും അല്‍-മാലിക്കി പറഞ്ഞു.

'ബ്ലാക്ക് ഫെയറി' എന്നറിയപ്പെടുന്ന അപ്പാച്ചെ ഹെലികോപ്റ്ററുകള്‍, ആധുനിക യുദ്ധരംഗത്തെ ഏറ്റവും പ്രശസ്തവും ശക്തവുമായ ആക്രമണ വിമാനങ്ങളിലൊന്നാണ്. ശത്രുക്കളുടെ ടാങ്കുകളും സൈനിക വാഹനങ്ങളും തകര്‍ക്കുന്നതിനും ഏത് പ്രതികൂല കാലാവസ്ഥയിലും കരസേനയ്ക്ക് വ്യോമ പിന്തുണ നല്‍കുന്നതിനുമാണ് ഇത് രൂപകല്പന ചെയ്തിരിക്കുന്നത്. സൗദി റോയല്‍ ലാന്‍ഡ് ഫോഴ്സ് ഉള്‍പ്പെടെ ലോകത്തെ പ്രമുഖ സൈന്യങ്ങളുടെ പ്രധാന യുദ്ധോപകരണങ്ങളില്‍ ഒന്നാണിത്.

അമേരിക്കന്‍ സൈന്യത്തിന്റെ 'അഡ്വാന്‍സ്ഡ് അറ്റാക്ക് ഹെലികോപ്റ്റര്‍' പ്രോഗ്രാമിന്റെ ഭാഗമായി വികസിപ്പിച്ച അപ്പാച്ചെ, 1975-ലാണ് ആദ്യമായി പറന്നത്. പിന്നീട് ബോയിംഗ് കമ്പനി ഇതിന്റെ നിര്‍മ്മാണവും വികസനവും ഏറ്റെടുത്തു. 30ാാ എം.230 ഓട്ടോമാറ്റിക് പീരങ്കി, ഹെല്‍ഫയര്‍ ഗൈഡഡ് മിസൈലുകള്‍, ഹൈഡ്ര 70 മിസൈലുകള്‍ എന്നിവയാണ് ഇതിന്റെ പ്രധാന ആയുധങ്ങള്‍.

രാത്രിയെന്നോ പകലെന്നോ വ്യത്യാസമില്ലാതെ ലക്ഷ്യങ്ങള്‍ കണ്ടെത്താനും പിന്തുടരാനും സഹായിക്കുന്ന റഡാറുകളും അത്യാധുനിക സെന്‍സറുകളും അപ്പാച്ചെയുടെ പ്രത്യേകതയാണ്. കനത്ത ആക്രമണങ്ങളെ ചെറുത്തുനില്‍ക്കാന്‍ ശേഷിയുള്ള ബോഡി ഡിസൈനും, കഠിനമായ ചൂടുള്ള കാലാവസ്ഥയിലും ഉയര്‍ന്ന കാര്യക്ഷമത നല്‍കുന്ന ടര്‍ബോപ്രോപ്പ് എഞ്ചിനുകളുമാണ് ഇതിലുള്ളത്.

1991-ലെ ഗള്‍ഫ് യുദ്ധത്തിന് ശേഷമാണ് അപ്പാച്ചെ ഹെലികോപ്റ്ററുകള്‍ സൗദി അറേബ്യന്‍ സൈന്യത്തിന്റെ ഭാഗമാകുന്നത്. നിലവില്‍ ഏകദേശം 90 അപ്പാച്ചെ ഹെലികോപ്റ്ററുകളുള്ള സൗദി അറേബ്യ, അമേരിക്കക്ക് ശേഷം ലോകത്ത് ഏറ്റവും കൂടുതല്‍ അപ്പാച്ചെ വിമാനങ്ങള്‍ ഉപയോഗിക്കുന്ന രണ്ടാമത്തെ രാജ്യമാണ്. അതിര്‍ത്തി സംരക്ഷണത്തിലും കൃത്യതയാര്‍ന്ന സൈനിക ദൗത്യങ്ങളിലും സൗദി അറേബ്യ ഈ ഹെലികോപ്റ്ററുകള്‍ വിജയകരമായി ഉപയോഗിച്ചു വരുന്നു.