കണ്ണൂര്‍: വിവാദ പ്രസ്താവനകള്‍ പരസ്യമായി നടത്തുന്ന കോണ്‍ഗ്രസ് നേതാക്കള്‍ക്ക് മുന്നറിയിപ്പുമായി കെ.പി.സി.സി പ്രസിഡന്റ് സണ്ണി ജോസഫ്. പാര്‍ട്ടിയുടെ പ്രതിച്ഛായയെ ബാധിക്കുന്ന തരത്തിലുള്ള അഭിപ്രായപ്രകടനങ്ങള്‍ നേതാക്കളും പ്രവര്‍ത്തകരും ഒഴിവാക്കണമെന്നും അഭിപ്രായങ്ങള്‍ അറിയിക്കേണ്ടത് പാര്‍ട്ടി വേദികളിലൂടെയാണെന്നും അദ്ദേഹം വ്യക്തമാക്കി.
പാര്‍ട്ടിയുടെ ആഭ്യന്തര വിഷയങ്ങളിലും രാഷ്ട്രീയ നിലപാടുകളിലും നേതാക്കള്‍ പരസ്യമായി അഭിപ്രായപ്രകടനം നടത്തുന്നത് സംഘടനാപരമായ അച്ചടക്കത്തിന് വിരുദ്ധമാണെന്ന നിലപാടിലാണ് കെപിസിസി നേതൃത്വം. അച്ചടക്കലംഘനമായി കണക്കാക്കാവുന്ന ഇത്തരം പ്രസ്താവനകള്‍ക്കെതിരെ നടപടി സ്വീകരിക്കുമെന്ന മുന്നറിയിപ്പും നേതൃത്വത്തിന്റെ ഭാഗത്തുനിന്നുണ്ട്.
നേതാക്കള്‍ക്കും പാര്‍ട്ടി ഘടകങ്ങള്‍ക്കും അഭിപ്രായവ്യത്യാസങ്ങളോ നിര്‍ദേശങ്ങളോ ഉണ്ടെങ്കില്‍ അവ നേതൃത്വത്തെ അറിയിക്കാം. എന്നാല്‍ മാധ്യമങ്ങളിലൂടെയും സാമൂഹികമാധ്യമങ്ങളിലൂടെയും പരസ്യമായ തര്‍ക്കങ്ങളിലേക്ക് നീങ്ങുന്നത് അംഗീകരിക്കാനാവില്ലെന്നാണ് പാര്‍ട്ടി നേതൃത്വത്തിന്റെ നിലപാട്.
പാര്‍ട്ടിക്കുള്ളിലെ അഭിപ്രായവ്യത്യാസങ്ങള്‍ പൊതുചര്‍ച്ചയാകുന്നത് ഒഴിവാക്കാനും സംഘടനാപരമായ ഐക്യം നിലനിര്‍ത്താനുമാണ് മുന്നറിയിപ്പിലൂടെ നേതൃത്വം ലക്ഷ്യമിടുന്നത്.
അടൂര്‍ പ്രകാശിന് മറുപടിയില്ല. വിവാദ പ്രസ്താവനകള്‍ ഒഴിവാക്കാന്‍ നേതാക്കള്‍ ബാധ്യസ്ഥരാണ്. നേതൃത്വം അത് ഇഷ്ടപ്പെടുന്നില്ല. പ്രതികരണം അവരെ നേരിട്ട് അറിയിക്കും. അഭിപ്രായങ്ങള്‍ പറയാനുള്ള വേദികളുണ്ട് -അദ്ദേഹം വ്യക്തമാക്കി.
മുന്‍ മുഖ്യമന്ത്രിക്കെതിരെ എഫ്.ഐ.ആര്‍ വൈകിയതു മുതലാക്കി നേതൃത്വത്തിനെതിരെ ചില കോണ്‍ഗ്രസ് നേതാക്കള്‍ രംഗത്തെത്തിയിരുന്നു. ആണുങ്ങളുടെ സര്‍ക്കാരാണെങ്കില്‍ പിണറായിക്കെതിരെ നടപടി വേണമെന്ന് കെ. സുധാകരന്‍ പറഞ്ഞിരുന്നു. കെ.പി.സി.സി പ്രസിഡന്റായിരുന്ന കെ സുധാകരനെ പുകച്ചു പുറത്തുചാടിച്ചതു പോലെ തന്നെ പുറത്തുചാടിക്കാന്‍ ശ്രമമുണ്ടെന്ന് അടൂര്‍ പ്രകാശും പറഞ്ഞിരുന്നു.