ജിദ്ദ- നഗരത്തിലെ റോഡ് ശൃംഖലയുടെ കാര്യക്ഷമത വര്‍ദ്ധിപ്പിക്കുന്നതിനും ഗതാഗതക്കുരുക്ക് ഒഴിവാക്കുന്നതിനുമായി ജിദ്ദ മുനിസിപ്പാലിറ്റി പ്രിന്‍സ് മജീദ് റോഡിന്റെ ഒരു ഭാഗം വികസിപ്പിച്ച് നവീകരിക്കുന്നതിനുള്ള പദ്ധതിക്ക് തുടക്കമിട്ടു. പഴയ മക്കാ റോഡ് ജംഗ്ഷന്‍ മുതല്‍ അല്‍-ഫലാഹ് റോഡ് ജംഗ്ഷന്‍ വരെയുള്ള 1.9 കിലോമീറ്റര്‍ ദൂരത്തിലാണ് നവീകരണ പ്രവര്‍ത്തനങ്ങള്‍ നടക്കുന്നത്.

പദ്ധതിയുടെ ഭാഗമായി റോഡിന്റെ വീതി 52 മീറ്ററായി ഉയര്‍ത്തും. ഇരുവശങ്ങളിലുമായി നാല് വീതം ആകെ എട്ട് ലെക്ലുകളായാണ് റോഡ് വികസിപ്പിക്കുന്നത്. ഇത് വാഹനങ്ങളുടെ യാത്ര സുഗമമാക്കാനും പ്രധാന റോഡുകളിലേക്കുള്ള കണക്റ്റിവിറ്റി വര്‍ദ്ധിപ്പിക്കാനും സഹായിക്കും.

ജിദ്ദയുടെ വടക്കും തെക്കും ഭാഗങ്ങളെ തമ്മില്‍ ബന്ധിപ്പിക്കുന്ന പ്രധാന പാതകളിലൊന്നാണ് പ്രിന്‍സ് മജീദ് റോഡ്. കിംഗ് അബ്ദുല്‍ അസീസ് അന്താരാഷ്ട്ര വിമാനത്താവളം, കായിക സമുച്ചയങ്ങള്‍ തുടങ്ങിയ സുപ്രധാന കേന്ദ്രങ്ങളിലേക്ക് എളുപ്പത്തില്‍ എത്തിച്ചേരാന്‍ ഈ പദ്ധതി സഹായിക്കും. മധ്യ-തെക്കന്‍ ജിദ്ദയില്‍നിന്ന് വിമാനത്താവളത്തിലേക്കുള്ള ഗതാഗതം കൂടുതല്‍ വേഗത്തിലാക്കാന്‍ ഇതിലൂടെ സാധിക്കും.

റോഡ് നവീകരണത്തോടൊപ്പം അടിസ്ഥാന സൗകര്യങ്ങള്‍ മെച്ചപ്പെടുത്തലും മനോഹരമായ നഗരക്കാഴ്ച ഉറപ്പാക്കലും പദ്ധതിയുടെ ഭാഗമായി നടപ്പിലാക്കുന്നുണ്ട്. സൗദി വിഷന്‍ 2030-ന്റെ ലക്ഷ്യങ്ങളുടെയും 'ക്വാളിറ്റി ഓഫ് ലൈഫ്' പ്രോഗ്രാമിന്റെയും ഭാഗമായാണ് ജിദ്ദ മുനിസിപ്പാലിറ്റി ഈ വികസന പദ്ധതികള്‍ നടപ്പാക്കുന്നത്.