ബുറൈദ- സ്വന്തം ഉമ്മയെ വെടിവെച്ചുകൊല്ലുകയും മൃതദേഹത്തോട് അനാദരവ് കാട്ടുകയും സഹോദരിയെ വധിക്കാന്‍ ശ്രമിക്കുകയും ചെയ്ത കേസില്‍ കുറ്റക്കാരിയായ യുവതിയുടെ വധശിക്ഷ ഖസിം മേഖലയില്‍ നടപ്പാക്കിയതായി ആഭ്യന്തര മന്ത്രാലയം അറിയിച്ചു.

സഹര്‍ ബിന്‍ത് ഫൈസല്‍ ബിന്‍ ഫയ്യാദ് അല്‍-ഹുനൈനി അല്‍-ഹര്‍ബി എന്ന സൗദി യുവതിയാണ് മാതാവായ അമാല്‍ ബിന്‍ത് തുലൈഹാന്‍ ബിന്‍ സനൂന്‍ അല്‍-ഹര്‍ബിയെ വെടിവെച്ച് കൊലപ്പെടുത്തിയത്. കൂടാതെ സഹോദരിയെ വധിക്കാനും ഇവര്‍ ശ്രമിച്ചിരുന്നതായി മന്ത്രാലയം വ്യക്തമാക്കി.

സംഭവത്തിന് ശേഷം സുരക്ഷാ വിഭാഗത്തിന്റെ പിടിയിലായ പ്രതിക്കെതിരെയുള്ള കുറ്റങ്ങള്‍ അന്വേഷണത്തില്‍ തെളിയുകയും, തുടര്‍ന്ന് കോടതിയില്‍ ഹാജരാക്കിയപ്പോള്‍ കുറ്റം സ്ഥിരീകരിക്കുകയും ചെയ്തു. മാതാവിനെതിരെ ചെയ്തത് ഏറ്റവും വലിയ കുറ്റവും ഗുരുതരമായ പാപവുമാണെന്ന് വിലയിരുത്തിയ കോടതി, ഹീനമായ ഈ കൃത്യത്തിന് വധശിക്ഷ വിധിക്കുകയായിരുന്നു. അപ്പീല്‍ കോടതിയും സുപ്രീം കോടതിയും ഈ വിധി ശരിവയ്ക്കുകയും, തുടര്‍ന്ന് രാജകല്‍പ്പന പ്രകാരം ഞായറാഴ്ച ശിക്ഷ നടപ്പാക്കുകയുമായിരുന്നു.

ഇത്തരം ക്രൂരകൃത്യങ്ങള്‍ ചെയ്യുന്നവരോട് യാതൊരു ദയയും കാണിക്കില്ലെന്നും, നിരപരാധികളുടെ ജീവനും സുരക്ഷയ്ക്കും ഭീഷണി സൃഷ്ടിക്കുന്നവര്‍ക്കെതിരെ കര്‍ശന നിയമനടപടികള്‍ തുടരുമെന്നും ആഭ്യന്തര മന്ത്രാലയം മുന്നറിയിപ്പ് നല്‍കി.