കൊച്ചി: രാജ്യാന്തര ക്വട്ടേഷന്‍ സംഘമായ ലോറന്‍സ് ബിഷ്ണോയ് ഗ്രൂപ്പിന്റെ പേരിലുള്ള ടെലിഗ്രാം ചാറ്റുകളുടെയും അന്താരാഷ്ട്ര ക്രിപ്റ്റോ കറന്‍സി ഇടപാടുകളുടെയും നിഴലില്‍ എറണാകുളം കടവുംഭാഗം സിനഗോഗ് തീയിട്ട കേസ് കേരളത്തില്‍ പുതിയ സുരക്ഷാ ആശങ്കകള്‍ ഉയര്‍ത്തുന്നു. മുംബൈയില്‍ ടൈഗര്‍ ഷ്റോഫിന് നേരെ നടന്ന വെടിവയ്പ്പിന്റെ ഉത്തരവാദിത്തം ഏറ്റെടുത്ത അതേ ലോറന്‍സ് ബിഷ്ണോയ് ഗ്രൂപ്പിന്റെ പേരിലുള്ള ടെലിഗ്രാം ഗ്രൂപ്പിലെ 'ബോസ്' എന്ന ഐഡിയുടെ നിര്‍ദേശപ്രകാരമാണ് ജൂത ആരാധനാലയത്തിന് നേരെ പ്രതി എബിന് ബി. പോള്‍ തീയിട്ടതെന്നാണ് പൊലീസിന്റെ പ്രാഥമിക കണ്ടെത്തല്‍. പ്രത്യേകിച്ചും, 2023 ല്‍ എട്ടു പേരുടെ മരണത്തിനും നിരവധി പേരുടെ പരിക്കിനും ഇടയാക്കിയ കേരളത്തെ നടുക്കിയ കളമശേരി സ്ഫോടനക്കേസിലെ പ്രതി ഡൊമിനിക് മാര്‍ട്ടിന്‍ സ്ഫോടനത്തിന് ഉപയോഗിച്ച ഗുണ്ടുകള്‍ വാങ്ങിയ അതേ കടയില്‍ നിന്ന് തന്നെയാണ് ഈ കേസിലെ പ്രതിയായ എബിനും സിനഗോഗിന് തീയിടാന്‍ ആവശ്യമായ കരിമരുന്ന് വാങ്ങിയെന്ന ഞെട്ടിക്കുന്ന യാദൃശ്ചികതയും അന്വേഷണത്തില്‍ പുറത്തുവന്നിട്ടുണ്ട്.
എറണാകുളം മാര്‍ക്കറ്റിലെ ചരിത്രപ്രധാനമായ കടവുംഭാഗം സിനഗോഗിന് മുന്നില്‍ തീയിട്ട സംഭവത്തില്‍ അറസ്റ്റിലായ എബിന് ബി. പോളിന്റെ ഡിജിറ്റല്‍ ഉപകരണങ്ങളില്‍ നിന്നാണ് നിര്‍ണായക വിവരങ്ങള്‍ ലഭിച്ചത്. ലോറന്‍സ് ബിഷ്ണോയ് ഗ്രൂപ്പ് ഓഫീഷ്യല്‍ ഉള്‍പ്പെടെ നിരവധി ടെലിഗ്രാം ഗ്രൂപ്പുകളില്‍ അംഗമായ എബിന്, ഗ്രൂപ്പിലെ 'ബോസ്' മുഖേനയാണ് ക്രിമിനല്‍ നിര്‍ദേശങ്ങള്‍ ലഭിച്ചത്.
നേരത്തെ മൂവാറ്റുപുഴ വാളകത്തെ വീട്ടിലും യൂസ്ഡ് കാര്‍ ഷോറൂമിലും പെട്രോള്‍ ബോംബ് എറിഞ്ഞതിന് 5000 രൂപയ്ക്ക് തുല്യമായ ക്രിപ്റ്റോ കറന്‍സി പ്രതിഫലമായി എബിന് ലഭിച്ചിരുന്നു. തുടര്‍ന്ന് സിനഗോഗിന് തീയിട്ടതിന് രണ്ടു ലക്ഷം രൂപ മൂല്യമുള്ള ക്രിപ്റ്റോ കറന്‍സിയാണ് ഇയാള്‍ സ്വീകരിച്ചത്.
'കൊച്ചിന്‍ ബ്ലോസംസ് നഴ്സറി' എന്നു മാത്രമാണ് സ്ഥലത്തെക്കുറിച്ച് ചാറ്റില്‍ പരാമര്‍ശിച്ചിരുന്നത്. സിനഗോഗിനാണ് തീയിടുന്നതെന്ന കാര്യം പ്രതിക്ക് കൃത്യമായി അറിയാമായിരുന്നില്ല. രണ്ട് വ്യത്യസ്ത അക്കൗണ്ടുകളില്‍ നിന്നാണ് ചാറ്റുകള്‍ വന്നെങ്കിലും രണ്ടും 'ബോസിന്റേത്' തന്നെയാണെന്നാണ് പൊലീസിന്റെ നിഗമനം.
വീട്ടില്‍ മുറിയില്‍ അടച്ചിരുന്ന് ആരുമായും കൂട്ടുകൂടാതെ കഴിഞ്ഞിരുന്ന എബിന്, പണമുണ്ടാക്കാനുള്ള ആഗ്രഹം കൊണ്ടാണ് ഇത്തരം ആക്രമണങ്ങള്‍ നടത്തിയതെന്ന് ചോദ്യം ചെയ്യലില്‍ സമ്മതിച്ചിട്ടുണ്ട്.
അഞ്ച് ദിവസത്തെ കസ്റ്റഡി കാലാവധിക്ക് ശേഷം റിമാന്‍ഡ് ചെയ്ത പ്രതിയെ വീണ്ടും കസ്റ്റഡിയില്‍ വാങ്ങി ചോദ്യം ചെയ്യാന്‍ പൊലീസ് ഏജന്‍സികള്‍ ഒരുങ്ങുന്നുണ്ട്. സിനഗോഗ് പരിസരം, തൃപ്പൂണിത്തുറയിലെ പടക്കം/ലൈറ്റര്‍ വാങ്ങിയ കട, പുത്തന്‍കുരിശിലെ പെട്രോള്‍ പമ്പ്, മൂവാറ്റുപുഴയിലെ ആക്രമണ സ്ഥലങ്ങള്‍ എന്നിവിടങ്ങളില്‍ പ്രതിയെ എത്തിച്ച് തെളിവെടുപ്പ് നടത്തി. വ്യാപാരശാലകളിലെ ജീവനക്കാര്‍ പ്രതിയെ തിരിച്ചറിഞ്ഞിട്ടുണ്ട്.
എബിന്റെ ഫോണും മറ്റ് ഉപകരണങ്ങളും ഫൊറന്‍സിക് പരിശോധനയ്ക്ക് വിധേയമാക്കിയിട്ടുണ്ട്. ടെലിഗ്രാം ചാറ്റുകളെക്കുറിച്ചുള്ള ഔദ്യോഗിക വിവരങ്ങള്‍ക്കായി ടെലിഗ്രാം കമ്പനിക്ക് കേരള പൊലീസ് കത്തയച്ചിട്ടുണ്ട്. രാജ്യാന്തര ക്വട്ടേഷന്‍ ബന്ധം സംശയിക്കുന്നതിനാല്‍ എന്‍.ഐ.എ., ഐ.ബി. തുടങ്ങിയ കേന്ദ്ര ഏജന്‍സികളുമായി കൂടിയാലോചിച്ചാണ് അന്വേഷണം മുന്നോട്ട് കൊണ്ടുപോകുന്നത്.
കളമശേരി സ്ഫോടനക്കേസുമായുള്ള ഞെട്ടിക്കുന്ന സമാനതകള്‍
കേരളത്തില്‍ വലിയ സുരക്ഷാ ചര്‍ച്ചകള്‍ക്ക് വഴിവെച്ച 2023 ഒക്ടോബര്‍ 29-ലെ കളമശ്ശേരി സാമ്ര ഇന്റര്‍നാഷണല്‍ കണ്‍വെന്‍ഷന്‍ സെന്റര്‍ സ്ഫോടന പരമ്പരയുമായി ഈ കേസിന് ചില ഞെട്ടിക്കുന്ന സാദൃശ്യങ്ങളുണ്ട്. യഹോവയുടെ സാക്ഷികളുടെ സമ്മേളനത്തിനിടയില്‍ ടിഫിന്‍ ബോക്‌സുകളില്‍ ഐ.ഇ.ഡി വെച്ച് നടത്തിയ ആ സ്ഫോടനത്തില്‍ ഒരു കുട്ടിയടക്കം എട്ട് പേര്‍ മരണപ്പെടുകയും അമ്പതിലധികം പേര്‍ക്ക് പരിക്കേല്‍ക്കുകയും ചെയ്തിരുന്നു. അന്നത്തെ പ്രതി ഡൊമിനിക് മാര്‍ട്ടിന്‍ തൃശൂര്‍ കൊടകര സ്റ്റേഷനില്‍ കീഴടങ്ങുകയായിരുന്നു.
നിലവിലെ പ്രതിയായ എബിന് സിനഗോഗിന് തീയിടാന്‍ ആവശ്യമായ കമ്പിത്തിരിയും കരിമരുന്നും വാങ്ങിയത്, കളമശ്ശേരി സ്ഫോടനക്കേസിലെ പ്രതി ഡൊമിനിക് മാര്‍ട്ടിന്‍ സ്ഫോടനത്തിനായി ഗുണ്ടുകള്‍ വാങ്ങിയ അതേ കടയില്‍ നിന്നുതന്നെയാണെന്ന് അന്വേഷണത്തില്‍ തെളിഞ്ഞിട്ടുണ്ട്. ഇത് കേരളത്തിലെ ചില കുറ്റകൃത്യങ്ങളുടെ രീതികളിലെ യാദൃശ്ചികതകളെയും ആയുധം/സ്ഫോടകവസ്തു വില്‍പ്പന കേന്ദ്രങ്ങളിലെ സുരക്ഷാ വീഴ്ചകളെയും ഗൗരവത്തോടെ കാണാന്‍ അധികാരികളെ പ്രേരിപ്പിക്കുന്നു.
പ്രാദേശികതലത്തില്‍ ഒറ്റപ്പെട്ട് ജീവിക്കുന്ന വ്യക്തികളെ ടെലിഗ്രാം പോലുള്ള നവമാധ്യമങ്ങള്‍ വഴി സ്വാധീനിച്ച് രാജ്യാന്തര ക്രിമിനല്‍ സംഘങ്ങള്‍ ക്വട്ടേഷന്‍ ജോലികള്‍ക്കായി ഉപയോഗപ്പെടുത്തുന്നു എന്നതിന്റെ വ്യക്തമായ ഉദാഹരണമാണ് ഈ കേസ്. ഡിജിറ്റല്‍ ഫൊറന്‍സിക് ഫലങ്ങളും ടെലിഗ്രാം മറുപടികളും വരുന്നതോടെ 'ബോസ്' ആരെന്നതിനെക്കുറിച്ചുള്ള കൂടുതല്‍ വിവരങ്ങള്‍ പുറത്തുവരുമെന്നാണ് പ്രതീക്ഷിക്കുന്നത്.
