റിയാദ്- നഗരങ്ങളിലെ പാര്‍ക്കിംഗ് മാനേജ്മെന്റ് മെച്ചപ്പെടുത്തുന്നതിനും, ഉയര്‍ന്ന ആവശ്യക്കാരുള്ള പ്രദേശങ്ങളില്‍ ദീര്‍ഘനേരമുള്ള പാര്‍ക്കിംഗ് ഒഴിവാക്കുന്നതിനുമായി പണമടച്ചുള്ള പാര്‍ക്കിംഗ് സംവിധാനം നിയന്ത്രിക്കുന്നതിനുള്ള കരട് രേഖ സൗദി മുനിസിപ്പല്‍, ഭവന കാര്യ മന്ത്രാലയം പുറത്തിറക്കി. പാര്‍ക്കിംഗ് ഫീസ്, ഗ്രേസ് പീരിയഡ്, റസിഡന്‍ഷ്യല്‍ സബ്സ്‌ക്രിപ്ഷനുകള്‍, ടോവിംഗ് ഫീസ്, ഡിജിറ്റല്‍ നിരീക്ഷണം എന്നിവയുമായി ബന്ധപ്പെട്ട സമഗ്രമായ നിര്‍ദ്ദേശങ്ങളാണ് കരടിലുള്ളത്.

അടിസ്ഥാന പാര്‍ക്കിംഗ് ഫീസ് മണിക്കൂറിന് 2 മുതല്‍ 3 റിയാല്‍ വരെയായി നിശ്ചയിച്ചു. തിരക്ക്, സീസണുകള്‍, പ്രത്യേക അവസരങ്ങള്‍ എന്നിവയ്ക്കനുസരിച്ച് ഈ നിരക്കില്‍ മാറ്റം വരുത്താന്‍ വ്യവസ്ഥയുണ്ട്.

റോഡരികിലെ പാര്‍ക്കിംഗിന് വാഹനം നിര്‍ത്തി 15 മിനിറ്റും, പാര്‍ക്കിംഗ് സമയം അവസാനിച്ച ശേഷം വാഹനം മാറ്റാന്‍ 10 മിനിറ്റും ഗ്രേസ് പീരിയഡ് അനുവദിക്കും. സ്വതന്ത്രവും ഓട്ടോമേറ്റഡ് ആയ പാര്‍ക്കിംഗില്‍ ആദ്യ 20 മിനിറ്റ് സൗജന്യമായിരിക്കും.

ഔദ്യോഗിക ഡ്യൂട്ടിയിലുള്ള അടിയന്തര, സുരക്ഷാ വാഹനങ്ങള്‍ക്ക് പാര്‍ക്കിംഗ് ഫീസില്‍ നിന്ന് ഇളവുണ്ടായിരിക്കും. ഈദുല്‍ ഫിത്ര്‍, ഈദുല്‍ അസ്ഹ, സൗദി ദേശീയ ദിനം, സ്ഥാപക ദിനം എന്നീ ദിവസങ്ങളില്‍ റോഡരികിലെ പാര്‍ക്കിംഗ് സൗജന്യമായിരിക്കും. സര്‍ക്കാര്‍ ഏജന്‍സികള്‍ക്കോ മുനിസിപ്പാലിറ്റി ജീവനക്കാരുടെ വാഹനങ്ങള്‍ക്കോ പ്രത്യേക ഇളവുകള്‍ അനുവദിക്കില്ല.

പ്രദേശത്ത് ഒഴിവുള്ള പാര്‍ക്കിംഗ് സ്ഥലങ്ങളുടെ ലഭ്യതയനുസരിച്ച് വ്യക്തികള്‍ക്ക് ആഴ്ചതോറുമുള്ളതോ പ്രതിമാസ/വാര്‍ഷിക സബ്സ്‌ക്രിപ്ഷനുകള്‍ നേടാം. റെസിഡന്‍ഷ്യല്‍ യൂണിറ്റുകളുടെ ഉടമകള്‍ക്കും വാടകക്കാര്‍ക്കും സന്ദര്‍ശകര്‍ക്കും സൗജന്യ പെര്‍മിറ്റുകളും നല്‍കും.

നമ്പര്‍ പ്ലേറ്റ് തിരിച്ചറിയുന്ന ക്യാമറകള്‍ വഴിയുള്ള ഓട്ടോമേറ്റഡ് സംവിധാനമാണ് നിയമലംഘനങ്ങള്‍ കണ്ടെത്താന്‍ ഉപയോഗിക്കുക. പാര്‍ക്കിംഗ് സമയം അവസാനിക്കുന്നതിന് മുന്‍പ് ഉപയോക്താക്കള്‍ക്ക് ഡിജിറ്റല്‍ അറിയിപ്പുകള്‍ ലഭിക്കും. നിയമവിരുദ്ധമായി പാര്‍ക്ക് ചെയ്യുന്ന വാഹനങ്ങള്‍ നീക്കം ചെയ്യുന്നതിനുള്ള ഫീസ് ചെറിയ വാഹനങ്ങള്‍ക്ക് 250 റിയാലും വലിയ വാഹനങ്ങള്‍ക്ക് 1,250 റിയാലുമായി നിശ്ചയിച്ചിട്ടുണ്ട്. കൂടാതെ പിടിച്ചെടുത്ത വാഹനങ്ങള്‍ തിരിച്ചെടുക്കാന്‍ വൈകിയാല്‍ ചെറിയ വാഹനങ്ങള്‍ക്ക് പ്രതിദിനം 20 റിയാലും വലിയ വാഹനങ്ങള്‍ക്ക് 50 റിയാലും പിഴ ഈടാക്കും.