മുംബൈ: ഇന്ത്യയും അമേരിക്കയും തമ്മിലുള്ള വ്യാപാരക്കരാര്‍ ചര്‍ച്ചകള്‍ക്ക് വേഗം പകരുന്നതിനും ഉഭയകക്ഷി ബന്ധം ശക്തിപ്പെടുത്തുന്നതിനുമായി യു.എസ് വിദേശകാര്യ സെക്രട്ടറി മാര്‍ക്കോ റൂബിയോ വിദേശകാര്യമന്ത്രി എസ്. ജയശങ്കറുമായി കൂടിക്കാഴ്ച നടത്തി. മുംബൈയില്‍ നടന്ന കൂടിക്കാഴ്ചയില്‍ വ്യാപാരം, നിക്ഷേപം, പ്രതിരോധം, ഊര്‍ജസുരക്ഷ, നിര്‍ണായക സാങ്കേതികവിദ്യകള്‍ തുടങ്ങിയ മേഖലകളിലെ സഹകരണം ചര്‍ച്ചയായി.
ഇന്ത്യയിലെ മൂന്ന് ദിവസത്തെ സന്ദര്‍ശനത്തിന്റെ ഭാഗമായി മുംബൈയിലെത്തിയ റൂബിയോ, 2008 നവംബര്‍ 26ലെ ഭീകരാക്രമണത്തില്‍ കൊല്ലപ്പെട്ടവര്‍ക്ക് ആദരമര്‍പ്പിച്ചു. ആക്രമണത്തിന്റെ പ്രധാന കേന്ദ്രങ്ങളിലൊന്നായ താജ് മഹല്‍ പാലസ് ഹോട്ടലില്‍ പുഷ്പചക്രം സമര്‍പ്പിച്ച അദ്ദേഹം, കൊല്ലപ്പെട്ടവരില്‍ ആറ് അമേരിക്കന്‍ പൗരന്മാരും ഉള്‍പ്പെട്ടിരുന്നുവെന്ന് അനുസ്മരിച്ചു.
ഭീകരാക്രമണത്തില്‍ ജീവന്‍ നഷ്ടപ്പെട്ടവരെ അമേരിക്ക സ്മരിക്കുന്നതായും അന്ന് രക്ഷാപ്രവര്‍ത്തനങ്ങളില്‍ ഏര്‍പ്പെട്ടവരുടെ ധീരതയെ ആദരിക്കുന്നതായും റൂബിയോ എക്‌സിലെ കുറിപ്പില്‍ വ്യക്തമാക്കി. ഭീകരവാദത്തിനെതിരായ പോരാട്ടത്തില്‍ ഇന്ത്യയും അമേരിക്കയും പങ്കുവെക്കുന്ന പ്രതിബദ്ധതയും അദ്ദേഹം ചൂണ്ടിക്കാട്ടി.
ഇന്ത്യ-അമേരിക്ക ബന്ധത്തില്‍ അടുത്ത കാലത്തുണ്ടായ അഭിപ്രായവ്യത്യാസങ്ങള്‍ക്കിടയിലാണ് റൂബിയോയുടെ സന്ദര്‍ശനം. ഇന്ത്യന്‍ ഉല്‍പന്നങ്ങള്‍ക്ക് അമേരിക്ക ഏര്‍പ്പെടുത്തിയ ഉയര്‍ന്ന തീരുവകളും വ്യാപാരതടസ്സങ്ങളും ഇരുരാജ്യങ്ങളും തമ്മിലുള്ള ചര്‍ച്ചകളില്‍ പ്രധാന വിഷയങ്ങളാണ്. 2025 മേയില്‍ ഇന്ത്യയും പാകിസ്താനും തമ്മിലുണ്ടായ സൈനിക സംഘര്‍ഷം അവസാനിപ്പിക്കുന്നതില്‍ താന്‍ പങ്കുവഹിച്ചെന്ന പ്രസിഡന്റ് ഡോണള്‍ഡ് ട്രംപിന്റെ അവകാശവാദവും ഇന്ത്യ-അമേരിക്ക ബന്ധത്തില്‍ അസ്വാരസ്യങ്ങള്‍ക്ക് ഇടയാക്കിയിരുന്നു.
ഇന്ത്യയുമായുള്ള വ്യാപാരക്കരാര്‍ ഏതാണ്ട് പൂര്‍ത്തിയായെന്ന് റൂബിയോ നേരത്തേ വ്യക്തമാക്കിയിരുന്നു. തീരുവകള്‍, വിപണിപ്രവേശനം, വ്യാപാരതടസ്സങ്ങള്‍ എന്നിവയുമായി ബന്ധപ്പെട്ട ചര്‍ച്ചകള്‍ പുരോഗമിക്കുകയാണ്. ഉടന്‍ ധാരണയിലെത്തുമെന്ന പ്രതീക്ഷ ഇന്ത്യയും പ്രകടിപ്പിച്ചിട്ടുണ്ട്. എന്നാല്‍, കരാര്‍ ഒപ്പുവെച്ചതായി ഔദ്യോഗിക പ്രഖ്യാപനം ഉണ്ടായിട്ടില്ല.
വ്യാപാരത്തിനു പുറമേ പ്രതിരോധം, ഊര്‍ജം, നിര്‍ണായകവും ഉയര്‍ന്നുവരുന്നതുമായ സാങ്കേതികവിദ്യകള്‍ എന്നിവയിലെ സഹകരണവും കൂടിക്കാഴ്ചയില്‍ പ്രാധാന്യം നേടി. അമേരിക്കയുടെ കുടിയേറ്റ നയങ്ങളും എച്ച്1ബി വിസ ഫീസിലെ വര്‍ധനയും ഇന്ത്യന്‍ ഐടി മേഖലയെ ബാധിക്കുന്ന നടപടികളും ഇരുരാജ്യങ്ങള്‍ക്കുമിടയിലെ ആശങ്കകളില്‍ ഉള്‍പ്പെടുന്നു.
അമേരിക്ക, റഷ്യ, ചൈന എന്നീ ആണവശക്തികള്‍ തമ്മില്‍ ഉന്നതതല ആയുധനിയന്ത്രണ ചര്‍ച്ചകള്‍ നടത്തുന്നതിനെ റൂബിയോ അനുകൂലിച്ചു. ലോകത്തെ ഏറ്റവും ശക്തമായ മൂന്ന് ആണവശക്തികളുടെ നേതാക്കള്‍ തമ്മില്‍ ആശയവിനിമയം നടത്തുന്നത് ഗുണകരമാണെന്ന് അദ്ദേഹം പറഞ്ഞു.
റഷ്യ-യുക്രെയ്ന്‍ യുദ്ധവുമായി ബന്ധപ്പെട്ട നയതന്ത്ര ചര്‍ച്ചകള്‍ പരാമര്‍ശിച്ച റൂബിയോ, അഭിപ്രായവ്യത്യാസങ്ങളുണ്ടെങ്കിലും എതിര്‍പക്ഷവുമായി സംവദിക്കേണ്ടത് നയതന്ത്രത്തിന്റെ ഭാഗമാണെന്ന് വ്യക്തമാക്കി.
മുംബൈയിലെ പരിപാടികള്‍ക്കുശേഷം റൂബിയോ ഗുജറാത്തിലെ ജാംനഗറിലേക്ക് പോകും. സാമ്പത്തിക സഹകരണം ശക്തിപ്പെടുത്തുന്നതിനൊപ്പം ഇന്ത്യ-അമേരിക്ക ബന്ധത്തിലെ പ്രധാന വിഷയങ്ങളില്‍ പുരോഗതി കൈവരിക്കുകയാണ് സന്ദര്‍ശനത്തിന്റെ ലക്ഷ്യം.
Related News
