ദോഹ: ഫിഫ അറബ് കപ്പ് മത്സരങ്ങളുടെ വിജയകരമായ നടത്തിപ്പിന് ശക്തമായ മെഡിക്കല് പിന്തുണ ഒരുക്കി ലോക്കല് ഓര്ഗനൈസിംഗ് കമ്മിറ്റി (LOC). കളിക്കാര്, ആരാധകര്, അതിഥികള് എന്നിവര്ക്കായി സ്റ്റേഡിയങ്ങള്, പരിശീലന കേന്ദ്രങ്ങള്, ടീമുകളുടെ ഹോട്ടലുകള് എന്നിവിടങ്ങളിലുടനീളം ഉയര്ന്ന നിലവാരത്തിലുള്ള ചികിത്സാ സൗകര്യങ്ങളാണ് വിന്യസിച്ചിരിക്കുന്നത്.
ലോകപ്രശസ്ത ഓര്ത്തോപീഡിക്, സ്പോര്ട്സ് മെഡിസിന് ആശുപത്രിയായ അസ്പേറ്റാര്, ടൂര്ണമെന്റിന്റെ ഔദ്യോഗിക മെഡിക്കല് പങ്കാളിയാണ്. കൂടാതെ രാജ്യത്തെ ദേശീയ ആരോഗ്യ സേവനദാതാവായ ഹമദ് മെഡിക്കല് കോര്പ്പറേഷന് എന്നിവരുടെ സഹകരണത്തിലൂടെയാണ് സേവനങ്ങള് നടപ്പാക്കുന്നത്. കളിക്കാര് മികച്ച പ്രകടനം കാഴ്ചവെക്കാനും ആരാധകര്ക്കും അതിഥികള്ക്കും ഉന്നത നിലവാരത്തിലുള്ള സുരക്ഷയും പിന്തുണയും ഉറപ്പാക്കാനും മെഡിക്കല് സേവനങ്ങള് നിര്ണായകമാണെന്ന് എല് ഒ സി മെഡിക്കല് ഡയറക്ടര് ഡോ. ഖാലിദ് അല് ഖുലൈഫി ചൂണ്ടിക്കാട്ടി.
ടൂര്ണമെന്റ് വേദികളിലായി ഏകദേശം 700 മെഡിക്കല് പ്രവര്ത്തകര്, ഡോക്ടര്മാര്, നഴ്സുമാര്, പാരാമെഡിക്കുകള് എന്നിവ സജ്ജമാണ്. പൂര്ണമായി സജ്ജീകരിച്ച ആംബുലന്സുകളും പ്രത്യേക ക്ലിനിക്കുകളും പ്രവര്ത്തിക്കുന്നു. പ്രഥമശുശ്രൂഷ, അടിയന്തര പ്രതികരണം ആവശ്യമായാല് ആശുപത്രിയിലേക്കുള്ള റഫറലുകള് എന്നിവ ഉറപ്പാക്കുന്ന സംവിധാനങ്ങളാണിവ.
ഫിഫ മാനദണ്ഡങ്ങള് പാലിച്ചുള്ള ഓണ്-ഫീല്ഡ്, ഓഫ്-ഫീല്ഡ് പ്രോട്ടോകോളുകളും ശക്തമായ ആശയവിനിമയ സംവിധാനങ്ങളും പ്രവര്ത്തനത്തിലുണ്ട്. ഫിഫ അറബ് കപ്പ് ഖത്തര് 2025ലെ മെഡിക്കല് ഒരുക്കങ്ങള്, അന്താരാഷ്ട്ര കായികമേളകള് ആതിഥേയത്വം വഹിക്കുന്നതിലെ ഖത്തറിന്റെ അനുഭവസമ്പത്തും ആരോഗ്യ സുരക്ഷയിലേക്കുള്ള തുടര്ച്ചയായ നിക്ഷേപവും പ്രതിഫലിപ്പിക്കുന്നു.
.jpg)
Related News
