ജിദ്ദ: സൗദി അറേബ്യയിലെ പ്രമുഖ ചിന്തകനും എഴുത്തുകാരനും നിരൂപകനുമായ ഡോ. സഈദ് അല് സുറൈഹി (73) അന്തരിച്ചു. വാര്ധക്യസഹജമായ അസുഖങ്ങളെത്തുടര്ന്ന് ചികിത്സയിലായിരുന്ന അദ്ദേഹം, സൗദി സാഹിത്യ-സാംസ്കാരിക ലോകത്ത് നികത്താനാവാത്ത വിടവ് ബാക്കിയാക്കിയാണ് വിടവാങ്ങിയത്. ദശാബ്ദങ്ങളോളം നീണ്ട അദ്ദേഹത്തിന്റെ സാംസ്കാരിക പ്രവര്ത്തനങ്ങള് സൗദി അറേബ്യയിലെ ആധുനിക സാഹിത്യ പ്രസ്ഥാനങ്ങള്ക്ക് ദിശാബോധം നല്കിയവയായിരുന്നു.
1953-ല് ജിദ്ദയില് ജനിച്ച സഈദ് അല് സുറൈഹി, സൗദിയിലെ സാഹിത്യരംഗത്തെ മുന്നിര തലമുറയിലെ പ്രമുഖനാണ്. മക്കയിലെ ഉമ്മുല് ഖുറാ സര്വ്വകലാശാലയില് നിന്ന് അറബി ഭാഷയില് ബിരുദാനന്തര ബിരുദവും ഡോക്ടറേറ്റും നേടിയ അദ്ദേഹം ഇരുപത് വര്ഷത്തോളം വിദ്യാഭ്യാസ മേഖലയില് പ്രവര്ത്തിച്ചു. ഒപ്പം പത്രപ്രവര്ത്തന രംഗത്തും സജീവമായിരുന്നു. വിവിധ പ്രാദേശിക പത്രങ്ങളില് കോളമിസ്റ്റായും എഡിറ്ററായും സേവനമനുഷ്ഠിച്ച അദ്ദേഹം തന്റെ മൂര്ച്ചയുള്ള എഴുത്തിലൂടെ വായനക്കാരുടെ ശ്രദ്ധ പിടിച്ചുപറ്റി.
'ദി അല്യൂര് ഓഫ് ദി നെയിം', 'ദി ബയോഗ്രഫി ഓഫ് കോഫി', 'അല്-റുവൈസ്', 'റൈറ്റിംഗ് ഔട്ട്സൈഡ് ദി ബ്രാക്കറ്റ്സ്' തുടങ്ങി ശ്രദ്ധേയമായ നിരവധി കൃതികള് അദ്ദേഹം രചിച്ചിട്ടുണ്ട്. അറബ് ലോകത്തെയും യൂറോപ്പിലെയും നിരവധി സെമിനാറുകളിലും പ്രഭാഷണങ്ങളിലും പങ്കെടുത്തു. പ്രശസ്തമായ തയ്യിബ് സാലിഹ് അവാര്ഡ് ഉള്പ്പെടെയുള്ള അന്താരാഷ്ട്ര സാഹിത്യ പുരസ്കാരങ്ങളുടെ ജൂറി അംഗമായും അദ്ദേഹം പ്രവര്ത്തിച്ചിട്ടുണ്ട്.
പരമ്പരാഗത ചട്ടക്കൂടുകള്ക്കും അതിര്വരമ്പുകള്ക്കും അപ്പുറത്തേക്ക് ചിന്തിക്കാന് ആഹ്വാനം ചെയ്ത എഴുത്തുകാരനായിരുന്നു അല് സുറൈഹി. മനുഷ്യന്റെ സ്വതന്ത്രമായ ചിന്തയ്ക്കും സര്ഗാത്മകതയ്ക്കും അദ്ദേഹം എന്നും മുന്ഗണന നല്കി. ഭാഷയുടെയും ചിന്തയുടെയും പുതിയ ചക്രവാളങ്ങള് തേടിയുള്ള അദ്ദേഹത്തിന്റെ യാത്രകള് പുതിയ തലമുറയിലെ എഴുത്തുകാര്ക്കും നിരൂപകര്ക്കും വലിയ പ്രചോദനമായിരുന്നു. ജിസാന് ലിറ്റററി ക്ലബ്ബ് പ്രസിദ്ധീകരിച്ച അദ്ദേഹത്തിന്റെ വിമര്ശനാത്മക പഠനങ്ങള് ഇന്നും സാഹിത്യ വിദ്യാര്ത്ഥികള്ക്ക് വലിയൊരു റഫറന്സാണ്.
സഈദ് അല് സുറൈഹിയുടെ നിര്യാണത്തില് സൗദിയിലെയും മറ്റു അറബ് രാജ്യങ്ങളിലെയും സാംസ്കാരിക ലോകം അനുശോചനം രേഖപ്പെടുത്തി. പുരോഗമനപരമായ ചിന്താഗതിയും നൂതനമായ നിരൂപണ ശൈലിയും അദ്ദേഹത്തെ സമകാലികരായ എഴുത്തുകാരില് നിന്ന് വ്യത്യസ്തനാക്കിയെന്ന് അവര് അഭിപ്രായപ്പെട്ടു.
.jpg)
Related News
