റിയാദ്: സൗദി അറേബ്യയുടെ സൈനിക കരുത്ത് വര്‍ദ്ധിപ്പിക്കുന്നതിനായി 100% സ്വദേശി രൂപകല്പനയിലും നിര്‍മ്മാണത്തിലും തയ്യാറാക്കിയ 'ഹീറ്റ്' വീല്‍ഡ് കവചിത വാഹന പദ്ധതി ഉദ്ഘാടനം ചെയ്തു. രാജ്യത്തിന്റെ ബൗദ്ധിക സ്വത്തവകാശത്തോടെ വികസിപ്പിച്ച ഈ പദ്ധതി, സൗദി വിഷന്‍ 2030-ന്റെ ഭാഗമായി പ്രതിരോധ മേഖലയിലെ സ്വയംപര്യാപ്തത ലക്ഷ്യമിട്ടുള്ള സുപ്രധാന ചുവടുവെപ്പാണ്.

മേഖലയിലെ തന്നെ ഏറ്റവും വലിയ സംയോജിത വ്യാവസായിക സമുച്ചയത്തിലാണ് ഈ വാഹനങ്ങള്‍ നിര്‍മ്മിക്കുന്നത്. ഒരു ദശലക്ഷം ചതുരശ്ര മീറ്റര്‍ വിസ്തൃതിയുള്ള വ്യവസായ മേഖലയില്‍ 82,000 ചതുരശ്ര മീറ്ററിലായി വ്യാപിച്ചുകിടക്കുന്ന ഈ പ്ലാന്റ് നാലാം വ്യാവസായിക വിപ്ലവത്തിന്റെ ഭാഗമായ ആര്‍ട്ടിഫിഷ്യല്‍ ഇന്റലിജന്‍സ്, ഇന്റര്‍നെറ്റ് ഓഫ് തിംഗ്‌സ് , റോബോട്ടിക്‌സ് എന്നീ സാങ്കേതികവിദ്യകള്‍ ഉപയോഗിച്ചാണ് പ്രവര്‍ത്തിക്കുന്നത്.

4x4, 6x6, 8x8 എന്നിങ്ങനെ മൂന്ന് വ്യത്യസ്ത വിഭാഗങ്ങളിലായാണ് ഹീറ്റ് വാഹനങ്ങള്‍ പുറത്തിറങ്ങുന്നത്. ഇവയുടെ സവിശേഷതകള്‍ താഴെ പറയുന്നവയാണ്:

-മരുഭൂമികളിലും ദുര്‍ഘടമായ പാതകളിലും മികച്ച വേഗവും നിയന്ത്രണവും.

-അത്യാധുനിക ബാലിസ്റ്റിക് സംരക്ഷണം ഉറപ്പാക്കുന്ന രീതിയിലുള്ള ഡിസൈന്‍.

- 12.7 എംഎം തോക്കുകളുള്ള 'വിഷന്‍' ആംഡ് ടററ്റ് സിസ്റ്റം, രാത്രിയിലും പകലും കൃത്യമായ ലക്ഷ്യം കാണാനുള്ള സംവിധാനം.

-ആവശ്യാനുസരണം 105 എംഎം ടററ്റുകള്‍ ഘടിപ്പിക്കാനുള്ള സൗകര്യവും ഇതിലുണ്ട്.


വര്‍ഷത്തില്‍ 1,500 സൈനിക വാഹനങ്ങള്‍ നിര്‍മ്മിക്കാനും അറ്റകുറ്റപ്പണികള്‍ നടത്താനുമുള്ള ശേഷി ഈ പ്ലാന്റിനുണ്ട്. സൗദി യുവാക്കള്‍ക്കായി ആയിരത്തിലധികം മികച്ച തൊഴിലവസരങ്ങള്‍ ഈ പദ്ധതിയിലൂടെ സൃഷ്ടിക്കപ്പെടുമെന്ന് കമ്പനി സിഇഒ സാമി എം. മുഹമ്മദ് അല്‍ ഹുദൈബ് പറഞ്ഞു. അതിര്‍ത്തി സംരക്ഷണം, രഹസ്യാന്വേഷണം, ദ്രുത പ്രതികരണം എന്നിവയ്ക്കായി സൗദി എഞ്ചിനീയര്‍മാരുടെ നേതൃത്വത്തിലാണ് ഈ വാഹനം വികസിപ്പിച്ചത്.

സൗദി അറേബ്യയെ ഒരു ആഗോള പ്രതിരോധ നിര്‍മ്മാണ കേന്ദ്രമാക്കി മാറ്റുന്നതിനുള്ള തന്ത്രപരമായ നീക്കമായാണ് ഈ പ്രോജക്റ്റ് വിലയിരുത്തപ്പെടുന്നത്. വിദേശ സാങ്കേതികവിദ്യയെ ആശ്രയിക്കാതെ, സ്വന്തമായി രൂപകല്പന ചെയ്യാനും വികസിപ്പിക്കാനുമുള്ള രാജ്യത്തിന്റെ കഴിവ് വളര്‍ത്തുകയാണ് ലക്ഷ്യം.