കണ്ണൂര്‍: ഹരിത രാഷ്ട്രീയത്തിന്റെ വഴികളില്‍ ന്യൂനപക്ഷ പിന്നാക്ക വിഭാഗങ്ങളുടെ താല്‍പ്പര്യങ്ങള്‍ സംരക്ഷിക്കുന്നതിന് തിരഞ്ഞെടുപ്പ് ഉള്‍പ്പെടെയുള്ള രാഷ്ട്രീയ പോരാട്ടങ്ങളില്‍ സജീവമായ സന്നദ്ധതയും സൂക്ഷ്മജാഗ്രതയും ആവശ്യമാണെന്ന് മുസ്ലിം യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവ്വറലി ശിഹാബ് തങ്ങള്‍ പറഞ്ഞു.

ഹരിതം ചരിത്ര പഠന കേന്ദ്രം സ്ഥാപക ജനറല്‍ സെക്രട്ടറിയും, സ്വതന്ത്ര കര്‍ഷകസംഘം സംസ്ഥാന ജനറല്‍ സെക്രട്ടറിയുമായിരുന്ന ടി.പി. മമ്മുവിന്റെ സ്മരണാര്‍ത്ഥം ഹരിതം ചരിത്ര പഠന കേന്ദ്രം പ്രസിദ്ധീകരിച്ച സ്മരണിക പ്രകാശനം ചെയ്ത് സംസാരിക്കുകയായിരുന്നു അദ്ദേഹം. സ്മരണിക മുസ്ലിം ലീഗ് ജില്ലാ പ്രസിഡന്റ് അഡ്വ. കരീം ചേലേരി ഏറ്റുവാങ്ങി.

പ്രസിദ്ധീകരണ സമിതി കണ്‍വീനര്‍ അഡ്വ. പി.വി. സൈനുദ്ദീന്‍ അധ്യക്ഷത വഹിച്ചു. സ്വതന്ത്ര കര്‍ഷകസംഘം സംസ്ഥാന ഓര്‍ഗനൈസിങ് സെക്രട്ടറി സി. മുഹമ്മദ് കുഞ്ഞി അനുസ്മരണ പ്രഭാഷണം നടത്തി. കണ്ണൂര്‍ ജില്ലാ മുസ്ലിം ലീഗ് സെക്രട്ടറി അഡ്വ. എം.പി. മുഹമ്മദലി, കണ്ണൂര്‍ കോര്‍പ്പറേഷന്‍ മുന്‍ മേയര്‍ മുസ്ലിഹ് മഠത്തില്‍, അഡ്വ. എം.ടി.പി. അബ്ദുള്‍ കരീം, കെ.വി. ഷമീം, എം.പി.എ. റഹീം, പി.കെ. ഇസ്മത്ത്, സി.കെ.പി. റഹീസ്, മുസ്ലിം യൂത്ത് ലീഗ് കണ്ണൂര്‍ ജില്ലാ ജനറല്‍ സെക്രട്ടറി ഷജീര്‍ ഇഖ്ബാല്‍, അഷറഫ് ബംഗാളി മുഹല്ല എന്നിവര്‍ സംസാരിച്ചു. ഹരിതം ജനറല്‍ സെക്രട്ടറി ഒ.കെ. സമദ് സ്വാഗതവും സെക്രട്ടറി എസ്.എല്‍.പി. മുഹമ്മദ് കുഞ്ഞി നന്ദിയും പറഞ്ഞു.

കഴിഞ്ഞ ദിവസം അന്തരിച്ച അവിഭക്ത കണ്ണൂര്‍ ജില്ലാ മുസ്ലിം ലീഗ് സെക്രട്ടറി ബി.പി. അബൂബക്കറിന്റെ ആത്മശാന്തിക്കായി ചടങ്ങില്‍ പ്രാര്‍ത്ഥന നടത്തി.