ജിദ്ദ: കേരള നിയമസഭാ തെരഞ്ഞെടുപ്പില്‍ യുണൈറ്റഡ് ഡെമോക്രാറ്റിക് ഫ്രണ്ട് (യുഡിഎഫ്) നേടിയ ഉജ്ജ്വല വിജയത്തിന്റെ ആവേശത്തില്‍ ജിദ്ദ കെഎംസിസി സെന്‍ട്രല്‍ കമ്മിറ്റി ഇന്ന് (വെള്ളി) 'വിജയാരവം' സംഘടിപ്പിക്കുന്നു. പ്രവാസികളുടെ ഒഴിവുദിനമായ ഇന്ന് വമ്പിച്ച വിജയാഘോഷ പരിപാടികളോടെയായിരിക്കും മുന്നണിയുടെയും പാര്‍ട്ടിയുടെയും വിജയം ആഘോഷിക്കുകയെന്ന് കെഎംസിസി ഭാരവാഹികള്‍ അറിയിച്ചു.

അവഗണിക്കപ്പെട്ട വിവിധ വിഭാഗങ്ങളുടെയും പ്രവാസികളുടെയും രോഷമാണ് ഈ തെരഞ്ഞെടുപ്പ് ഫലത്തിലൂടെ പ്രതിഫലിച്ചതെന്ന് ജിദ്ദ കെഎംസിസി സെന്‍ട്രല്‍ കമ്മിറ്റി വിലയിരുത്തി. ഭൂരിപക്ഷ വര്‍ഗീയതയെ പ്രോത്സാഹിപ്പിക്കുകയും അധഃസ്ഥിതരെയും പ്രത്യേക പരിഗണന അര്‍ഹിക്കുന്നവരെയും അവഗണിക്കുകയും ചെയ്ത ഭരണകൂടത്തോടുള്ള ജനങ്ങളുടെ ശക്തമായ പ്രതികരണമാണിത്. എല്ലാ മേഖലകളിലും പ്രകടമായ ഭരണപരാജയവും സ്വജനപക്ഷപാതവും ജനങ്ങള്‍ക്ക് ബോധ്യപ്പെട്ടു. പ്രവാസി സമൂഹത്തെ പൂര്‍ണ്ണമായും അവഗണിച്ച ഇടതുപക്ഷ സര്‍ക്കാരിനെതിരെ പ്രവാസികളും അവരുടെ കുടുംബങ്ങളും ഒറ്റക്കെട്ടായി വോട്ട് രേഖപ്പെടുത്തിയതാണ് യുഡിഎഫിന്റെ വന്‍ വിജയത്തിന് കാരണമായതെന്നും കമ്മിറ്റി അഭിപ്രായപ്പെട്ടു.

വ്യക്തമായ വികസന അജണ്ട ഉയര്‍ത്തിക്കാട്ടുകയും എല്ലാ വിഭാഗം ജനങ്ങളെയും ചേര്‍ത്തുപിടിക്കുകയും ചെയ്ത യുഡിഎഫിന്റെ നിലപാടിനെ കേരളം നെഞ്ചേറ്റി. ജനാധിപത്യ-മതേതര ശക്തികളെ വീണ്ടും അധികാരത്തിലെത്തിച്ച കേരളത്തിലെ ജനങ്ങളോട് കെഎംസിസി നന്ദി രേഖപ്പെടുത്തി.

ജിദ്ദ കെഎംസിസി ആക്ടിങ് പ്രസിഡന്റ് സികെ റസാഖ് മാസ്റ്ററും ജനറല്‍ സെക്രട്ടറി ഇന്‍ചാര്‍ജ് ഇസ്ഹാഖ് പൂണ്ടോളിയുമാണ് 'വിജയാരവം' ആഘോഷത്തെക്കുറിച്ചും രാഷ്ട്രീയ നിലപാടുകളെക്കുറിച്ചും വിശദീകരിച്ചത്.