റിയാദ്: കേരള നിയമസഭാ തിരഞ്ഞെടുപ്പ് ഫലം ഭൂരിപക്ഷ - ന്യൂനപക്ഷ വര്‍ഗീയ ശക്തികളെ കൂട്ടുപിടിച്ച് ഭരണതുടര്‍ച്ച നടത്താനുള്ള പിണറായി സര്‍ക്കാരിന്റെ വ്യാമോഹത്തിനേറ്റ കനത്ത തിരിച്ചടിയാണെന്ന് റിയാദ് - കോട്ടക്കല്‍ മണ്ഡലം കെ.എം.സി.സി അഭിപ്രായപ്പെട്ടു. വര്‍ഗീയതയോട് കേരള ജനത സന്ധി ചെയ്യില്ലെന്ന് ഈ ഫലം ഒരിക്കല്‍ കൂടി തെളിയിച്ചിരിക്കുകയാണ്. പിണറായി വിജയന്റെ ഏകാധിപത്യ - ജനവിരുദ്ധ നയങ്ങളെ തിരഞ്ഞെടുപ്പിലൂടെ കേരള ജനത പൂര്‍ണ്ണമായും തള്ളിക്കളഞ്ഞുവെന്നും യോഗം വിലയിരുത്തി.

വമ്പിച്ച ഭൂരിപക്ഷം നേടി വിജയിച്ച കോട്ടക്കല്‍ മണ്ഡലം യു.ഡി.എഫ് സ്ഥാനാര്‍ത്ഥി പ്രൊഫ. ആബിദ് ഹുസൈന്‍ തങ്ങളെ യോഗം അഭിനന്ദിച്ചു. തുടര്‍ച്ചയായി മൂന്നാമതും മികച്ച വിജയം കൈവരിച്ച അദ്ദേഹത്തെ പുതിയ മന്ത്രിസഭയില്‍ ഉള്‍പ്പെടുത്തണമെന്ന് കെ.എം.സി.സി ആവശ്യപ്പെട്ടു. മന്ത്രിസഭാ രൂപീകരണത്തില്‍ തിരഞ്ഞെടുപ്പിലെ ജനവികാരം യു.ഡി.എഫ് നേതൃത്വം പൂര്‍ണ്ണമായി ഉള്‍ക്കൊള്ളണമെന്നും യോഗം പ്രമേയത്തിലൂടെ ആവശ്യപ്പെട്ടു.

മലാസില്‍ നടന്ന യോഗത്തില്‍ മണ്ഡലം കെ.എം.സി.സി പ്രസിഡന്റ് ബഷീര്‍ മുല്ലപ്പള്ളി അധ്യക്ഷത വഹിച്ചു. ശുഐബ് മന്നാനി ഉദ്ഘാടനം ചെയ്തു. മൊയ്തീന്‍ കോട്ടക്കല്‍, ഇസ്മായില്‍ പൊന്‍മള, ഫൈസല്‍ എടയൂര്‍, ഹാഷിം കുറ്റിപ്പുറം, ഫര്‍ഹാന്‍ കാടാമ്പുഴ, ഫാറൂഖ് പൊന്‍മള, പി.കെ യൂനുസ്, ഹമീദ് ഇന്ത്യനൂര്‍, മുഹമ്മദ് കല്ലിങ്ങല്‍ തുടങ്ങിയവര്‍ ചര്‍ച്ചയില്‍ പങ്കെടുത്തു. ആക്ടിംഗ് സെക്രട്ടറി ഗഫൂര്‍ കോല്‍ക്കളം സ്വാഗതവും ട്രഷറര്‍ ഗഫൂര്‍ കൊന്നക്കാട്ടില്‍ നന്ദിയും പറഞ്ഞു.

പ്രൊഫ. ആബിദ് ഹുസൈന്‍ തങ്ങളുടെ വിജയത്തില്‍ സന്തോഷം പ്രകടിപ്പിച്ച് യോഗത്തില്‍ മധുരപലഹാര വിതരണവും നടത്തി.