ജിദ്ദ- തീര്‍ത്ഥാടകര്‍ക്ക് മികച്ച സേവനം ഉറപ്പാക്കാന്‍ അത്യാധുനിക സാങ്കേതികവിദ്യകളും വിപുലമായ സൗകര്യങ്ങളുമൊരുക്കി ഹജ്ജ് ഗതാഗത-ലോജിസ്റ്റിക്‌സ് മന്ത്രാലയം സജ്ജമായതായി വക്താവ് അബ്ദുല്‍ അസീസ് അല്‍ ഉതൈബി അറിയിച്ചു. ഹജ്ജ് ഗതാഗത സംവിധാനത്തിന് കീഴിലുള്ള പതിനൊന്നിലധികം ഔദ്യോഗിക സ്ഥാപനങ്ങള്‍ തീര്‍ത്ഥാടകരുടെ യാത്ര സുഗമമാക്കുന്നതിനായി വിപുലമായ ക്രമീകരണങ്ങളാണ് പൂര്‍ത്തിയാക്കിയിരിക്കുന്നത്.

തീര്‍ത്ഥാടകരെ സ്വീകരിക്കുന്നതിനായി 46,000-ത്തിലധികം ജീവനക്കാരെയാണ് വിവിധ ഗതാഗത മേഖലകളിലായി വിന്യസിച്ചിരിക്കുന്നത്. വ്യോമമാര്‍ഗം എത്തുന്ന ദൈവത്തിന്റെ അതിഥികള്‍ക്കായി 12,000 സര്‍വീസുകളിലായി 30 ലക്ഷം സീറ്റുകള്‍ ക്രമീകരിച്ചിട്ടുണ്ട്. ഇതിനുപുറമേ, വിശുദ്ധ നഗരങ്ങളിലെ ആഭ്യന്തര യാത്രകള്‍ക്കായി 33,000-ത്തിലധികം ബസുകളും 5,000 ടാക്‌സികളും സജ്ജമാക്കിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

വിശുദ്ധ സ്ഥലങ്ങളിലേക്കുള്ള പ്രവേശന കവാടങ്ങള്‍ മുതല്‍ പ്രധാന റോഡ് ശൃംഖലകള്‍ വരെ പൂര്‍ണ്ണമായി സര്‍വേ നടത്തി സുരക്ഷിതമാക്കിയിട്ടുണ്ട്. ഏകദേശം 3,500 മീറ്റര്‍ ട്രാക്കുകളുടെ അറ്റകുറ്റപ്പണികള്‍ ഇതിനോടകം പൂര്‍ത്തിയായി. ഇത്തവണ ഹറമൈന്‍ അതിവേഗ റെയില്‍വേയുടെ ശേഷി 11 ശതമാനം വര്‍ദ്ധിപ്പിച്ചതിലൂടെ 22 ലക്ഷത്തിലധികം തീര്‍ത്ഥാടകര്‍ക്ക് യാത്ര ചെയ്യാനാകും. കൂടാതെ, അല്‍-മശാഇര്‍ മെട്രോ ട്രെയിന്‍ വഴി 20 ലക്ഷത്തിലധികം തീര്‍ത്ഥാടകരെ ലക്ഷ്യസ്ഥാനങ്ങളില്‍ എത്തിക്കാന്‍ സാധിക്കുമെന്നാണ് പ്രതീക്ഷിക്കുന്നത്.

ചരക്ക് നീക്കത്തിന്റെ ഭാഗമായി 12 ലക്ഷത്തിലധികം ടണ്‍ സാധനങ്ങളും 26 ലക്ഷം കന്നുകാലികളും എത്തിക്കാനുള്ള സൗകര്യങ്ങള്‍ ഒരുക്കിയിട്ടുണ്ട്. തീര്‍ത്ഥാടകര്‍ക്കായി അന്‍പതിലധികം അത്യാധുനിക സേവനങ്ങളാണ് മന്ത്രാലയം നല്‍കുന്നത്. ഇതില്‍ ഏറ്റവും പ്രധാനപ്പെട്ടതാണ് 'ലഗേജില്ലാത്ത ഹജ്ജ്' പദ്ധതി. ഈ പദ്ധതി പ്രകാരം തീര്‍ത്ഥാടകര്‍ക്ക് വിമാനത്താവളത്തില്‍ ഇറങ്ങിയ ശേഷം ലഗേജുകളെക്കുറിച്ച് ആശങ്കപ്പെടാതെ നേരിട്ട് ബസിലോ ട്രെയിനിലോ താമസസ്ഥലത്തേക്ക് പോകാം. അവരുടെ ലഗേജുകള്‍ സുരക്ഷിതമായി താമസസ്ഥലത്ത് എത്തിച്ചു നല്‍കും.

തീര്‍ത്ഥാടകരുടെ സുഖസൗകര്യങ്ങള്‍ക്കായി വിപ്ലവകരമായ സാങ്കേതിക വിദ്യകളാണ് ഇത്തവണ ഉപയോഗിക്കുന്നത്. ഇതിന്റെ ഭാഗമായി അല്‍-മശാഇര്‍ ട്രെയിന്‍ പരിസരത്തെ മൂന്ന് പുതിയ സ്ഥലങ്ങളിലായി 14,000 ചതുരശ്ര മീറ്റര്‍ റോഡ് ഉപരിതലം തണുപ്പിക്കുന്നതിനുള്ള പ്രത്യേക കോട്ടിംഗ് സംവിധാനം വികസിപ്പിച്ചു. സൂര്യപ്രകാശത്തെ പ്രതിഫലിപ്പിക്കുന്നതിലൂടെ റോഡിലെ താപനില 12 മുതല്‍ 15 ഡിഗ്രി സെല്‍ഷ്യസ് വരെ കുറയ്ക്കാന്‍ ഈ സാങ്കേതികവിദ്യയ്ക്ക് സാധിക്കുമെന്നും അബ്ദുല്‍ അസീസ് അല്‍ ഉതൈബി ചൂണ്ടിക്കാട്ടി.