റിയാദ്: സൗദി അറേബ്യയുടെ പ്രമുഖ പരിസ്ഥിതി സൗഹൃദ വിനോദസഞ്ചാര പദ്ധതിയായ 'അല്‍-ഉറുമ സീസണിന്റെ' (Al-Urumah Season) അഞ്ചാം പതിപ്പ് വന്‍ വിജയത്തോടെ സമാപിച്ചു. ആറുമാസം നീണ്ടുനിന്ന മേളയില്‍ സ്വദേശികളും വിദേശികളുമായ എട്ട് ലക്ഷത്തിലധികം സന്ദര്‍ശകരാണ് എത്തിയത്. പ്രകൃതി സംരക്ഷണത്തിന് മുന്‍ഗണന നല്‍കിയുള്ള വിനോദസഞ്ചാരത്തിന് രാജ്യം നല്‍കുന്ന പ്രാധാന്യത്തിന്റെ തെളിവാണ് ഈ വന്‍ പങ്കാളിത്തമെന്ന് അധികൃതര്‍ വ്യക്തമാക്കി.

റിയാദിന് വടക്കുകിഴക്കായി സ്ഥിതി ചെയ്യുന്ന 'ഇമാം അബ്ദുല്‍ അസീസ് ബിന്‍ മുഹമ്മദ് റോയല്‍ റിസര്‍വ്', 'കിംഗ് ഖാലിദ് റോയല്‍ റിസര്‍വ്' എന്നിവ കേന്ദ്രീകരിച്ചാണ് മേള സംഘടിപ്പിച്ചത്. പ്രാദേശിക സമൂഹങ്ങള്‍ക്ക് തൊഴിലവസരങ്ങള്‍ സൃഷ്ടിക്കുന്നതിനും പരിസ്ഥിതി ബോധവത്കരണത്തിനും മേള വലിയ സംഭാവന നല്‍കിയതായി ഇമാം അബ്ദുല്‍ അസീസ് ബിന്‍ മുഹമ്മദ് റോയല്‍ റിസര്‍വ് ഡെവലപ്മെന്റ് അതോറിറ്റി അറിയിച്ചു.

റിയാദിന് കിഴക്കായി 700 കിലോമീറ്റര്‍ നീളത്തില്‍ വ്യാപിച്ചുകിടക്കുന്ന അല്‍-ഉറുമ പര്‍വതനിരകളുടെ പേരില്‍ അറിയപ്പെടുന്ന ഈ മേള, നഗരങ്ങളിലെ വിനോദോത്സവങ്ങളില്‍ നിന്ന് തികച്ചും വ്യത്യസ്തമാണ്. മേളയുടെ തുടക്കത്തില്‍ 52,000 പേര്‍ മാത്രമാണ് എത്തിയിരുന്നത്. എന്നാല്‍ രണ്ടാം പതിപ്പില്‍ 2.3 ലക്ഷവും, മൂന്നാം പതിപ്പില്‍ 3 ലക്ഷവും, നാലാം പതിപ്പില്‍ 4 ലക്ഷവും കടന്ന് അഞ്ചാം പതിപ്പില്‍ എട്ട് ലക്ഷമെന്ന റെക്കോര്‍ഡിലേക്ക് സന്ദര്‍ശകരുടെ എണ്ണം ഉയര്‍ന്നു. ഇതുവരെ അഞ്ച് പതിപ്പുകളിലായി ഇരുപത് ലക്ഷത്തോളം പേരാണ് അല്‍-ഉറുമ സീസണ്‍ സന്ദര്‍ശിച്ചത്.

ഇത്തവണ 14 ടൂറിസം സേവന ദാതാക്കളുടെ പങ്കാളിത്തത്തോടെ ഹൈക്കിംഗ്, സൈക്ലിംഗ്, കുതിരസവാരി, ഒട്ടക സവാരി, നക്ഷത്രനിരീക്ഷണം, ഗൈഡഡ് പര്യവേക്ഷണ യാത്രകള്‍ തുടങ്ങി 14 വൈവിധ്യമാര്‍ന്ന പ്രവര്‍ത്തനങ്ങളാണ് സന്ദര്‍ശകര്‍ക്കായി ഒരുക്കിയിരുന്നത്. കടുത്ത ചൂടില്ലാത്ത ശരത്, ശീത, വസന്ത കാലങ്ങളിലാണ് മേള സംഘടിപ്പിക്കാറുള്ളത് എന്നതിനാല്‍ കുടുംബങ്ങള്‍ക്കും സാഹസിക സഞ്ചാരികള്‍ക്കും ഇത് മികച്ചൊരു അനുഭവമായി മാറി.

11,300 ചതുരശ്ര കിലോമീറ്റര്‍ വിസ്തൃതിയുള്ള ഇമാം അബ്ദുല്‍ അസീസ് ബിന്‍ മുഹമ്മദ് റോയല്‍ റിസര്‍വിലെ ദഹ്ന മരുഭൂമിയും 'റൗദത് ഖുറൈം' പോലുള്ള ഹരിത പ്രദേശങ്ങളും സന്ദര്‍ശകരെ ആകര്‍ഷിച്ചു. കിംഗ് ഖാലിദ് റോയല്‍ റിസര്‍വിലെ പര്‍വത-മരുഭൂമി കാഴ്ചകളും പുരാവസ്തു കേന്ദ്രങ്ങളും അറേബ്യന്‍ ഒറിക്‌സ് (ഒരിനം മാന്‍), ഗസലുകള്‍ തുടങ്ങിയ വന്യജീവികളും സഞ്ചാരികള്‍ക്ക് വേറിട്ട കാഴ്ചയായി.

ടൂറിസം മേഖലയുമായി ബന്ധപ്പെട്ട് പ്രാദേശികമായി 84-ലധികം പുതിയ തൊഴിലവസരങ്ങള്‍ സൃഷ്ടിക്കാന്‍ ഇത്തവണ സാധിച്ചു. സാമ്പത്തിക വൈവിധ്യവല്‍ക്കരണവും പരിസ്ഥിതി സുസ്ഥിരതയും ലക്ഷ്യമിട്ടുള്ള സൗദി വിഷന്‍ 2030-ന്റെ ഭാഗമായാണ് പദ്ധതി നടപ്പിലാക്കുന്നത്.

മേളയുടെ ആറാം പതിപ്പ് വരും വര്‍ഷം നവംബറില്‍ ആരംഭിക്കുമെന്ന് അധികൃതര്‍ പ്രഖ്യാപിച്ചു. കൂടുതല്‍ സുസ്ഥിരമായ പരിപാടികളും ജനപങ്കാളിത്തവും അടുത്ത പതിപ്പില്‍ ഉറപ്പാക്കും. നഗരങ്ങള്‍ക്കും പൈതൃക കേന്ദ്രങ്ങള്‍ക്കുമപ്പുറം, വന്യജീവി സംരക്ഷണത്തിനും ഉത്തരവാദിത്തമുള്ള ഔട്ട്‌ഡോര്‍ വിനോദങ്ങള്‍ക്കും പ്രാധാന്യം നല്‍കുന്ന സൗദി അറേബ്യയുടെ മറ്റൊരു മനോഹരമായ മുഖമാണ് അല്‍-ഉറുമ സീസണിലൂടെ ലോകത്തിന് മുന്നില്‍ തുറക്കപ്പെടുന്നത്.