കണ്ണൂര്‍: നിയമസഭാ തെരഞ്ഞെടുപ്പില്‍ സി.പി.എമ്മിനെ ഞെട്ടിച്ച പരാജയമുണ്ടായ പയ്യന്നൂരില്‍ പാര്‍ട്ടി ഏരിയ കമ്മിറ്റി പിരിച്ചുവിടുന്നു. വിഭാഗീയ പ്രവര്‍ത്തനങ്ങള്‍ അടക്കമുള്ള ആരോപണങ്ങള്‍ അന്വേഷിച്ച കമീഷന്റെ റിപ്പോര്‍ട്ട് പ്രകാരം ജില്ലാ കമ്മിറ്റിയാണ് ഏരിയ കമ്മിറ്റി പിരിച്ചുവിടാന്‍ ശുപാര്‍ശ ചെയ്തത്.

ഈ അന്വേഷണ കമ്മീഷന്റെ റിപ്പോര്‍ട്ട് കഴിഞ്ഞ ദിവസം ചേര്‍ന്ന ജില്ലാ കമ്മിറ്റി ചര്‍ച്ച ചെയ്തിരുന്നു. പിന്നാലെയാണ് ഏരിയ കമ്മിറ്റി പിരിച്ചുവിടാം എന്ന് ജില്ലാ കമ്മിറ്റി തീരുമാനത്തിലെത്തിയത്. രണ്ടംഗ കമ്മീഷന്‍ ജില്ലാ കമ്മിറ്റിക്ക് മുന്നില്‍ വെച്ചതും പിരിച്ചുവിടല്‍ തന്നെയായിരുന്നു.

2026-ലെ തിരഞ്ഞെടുപ്പില്‍ സംസ്ഥാനത്ത് മറ്റ് ജില്ലകളിലും മണ്ഡലങ്ങളിലും ഉണ്ടായതിനേക്കാള്‍ വലിയ തോല്‍വിയാണ് പയ്യന്നൂരില്‍ സിപിഎമ്മിനുണ്ടായത്. 50,000-ത്തോളം വോട്ടിന്റെ ഭൂരിപക്ഷം നിലനിര്‍ത്തിയിരുന്ന മണ്ഡലത്തില്‍ ടി.ഐ. മധുസൂദനന്‍ എന്ന പ്രമുഖ സി.പി.എം സ്ഥാനാര്‍ഥി തോല്‍ക്കുകയും തിരഞ്ഞെടുപ്പ് നടക്കുന്നതിന് ഏതാനും മാസം മുമ്പ് രക്തസാക്ഷി ഫണ്ട് തട്ടിപ്പിനെതിരെ നിലയുറപ്പിച്ചതിന്റെ പേരില്‍ പാര്‍ട്ടി വിടേണ്ടിവന്ന വി. കുഞ്ഞികൃഷ്ണന്‍ വിജയിക്കുകയും ചെയ്തു.

കുഞ്ഞികൃഷ്ണന്റെ വിജയം സ്വാഭാവികമായി സംഭവിച്ചതല്ലെന്നും സിപിഎം പയ്യന്നൂര്‍ ഏരിയ കമ്മിറ്റിയിലെ ചിലരുടെ പിന്തുണയോടെയാണ് നടന്നതെന്നും രണ്ടംഗ കമ്മീഷന്‍ കണ്ടെത്തിയിട്ടുണ്ട്. നിലവിലെ ഏരിയ കമ്മിറ്റിയിലുള്ള ചിലര്‍ കുഞ്ഞികൃഷ്ണനുവേണ്ടി പ്രവര്‍ത്തിച്ചു, രഹസ്യമായി വോട്ടുപിടിച്ചു, വോട്ട് മറിക്കുന്നതിനായി ശ്രമങ്ങള്‍ നടത്തി എന്നെല്ലാം അന്വേഷണത്തില്‍ വ്യക്തമായിട്ടുണ്ട്.

ജില്ലാ കമ്മിറ്റിയില്‍ ഇരുന്നുകൊണ്ടുതന്നെ പാര്‍ട്ടി വിരുദ്ധ പ്രവര്‍ത്തനങ്ങള്‍ നടത്തി പാര്‍ട്ടി സ്ഥാനാര്‍ഥിയെ തോല്‍പ്പിക്കുന്നതിനുവേണ്ടി അടിത്തട്ടില്‍ വരെയിറങ്ങി ചിലര്‍ പ്രവര്‍ത്തിച്ചു എന്നതുള്‍പ്പെടെയുള്ള ഞെട്ടിക്കുന്ന ഒട്ടേറെ കണ്ടെത്തലുകളാണ് കമ്മീഷന്‍ കണ്ടെത്തിയിട്ടുള്ളത്. ഇതിന്റെ അടിസ്ഥാനത്തിലാണ് പയ്യന്നൂര്‍ ഏരിയ കമ്മിറ്റി പിരിച്ചുവിടാനുള്ള തീരുമാനം എടുത്തിരിക്കുന്നത്.

താല്‍കാലികമായി രൂപീകരിക്കുന്ന കമ്മിറ്റിയുടെ സെക്രട്ടറിയായി പാനൂര്‍ സ്വദേശിയും സിപിഎം ജില്ലാ സെക്രട്ടേറിയറ്റ് അംഗവുമായ പി. ഹരീന്ദ്രനെയാണ് ചുമതലപ്പെടുത്തിയിരിക്കുന്നത്. പയ്യന്നൂരില്‍ നിന്നുള്ള ജില്ലാ കമ്മിറ്റി അംഗങ്ങള്‍, ഏരിയ കമ്മിറ്റിയിലെ ചില അംഗങ്ങള്‍ ഉള്‍പ്പെടെയുള്ളവരായിരിക്കും ഈ താല്‍കാലിക കമ്മിറ്റിയില്‍ ഉണ്ടായിരിക്കുക. പാര്‍ട്ടി തിരുത്തല്‍ നടപടികളുമായി മുന്നോട്ടുപോകുന്നതിന്റെ ഭാഗമാണ് ഈ നടപടി.