ബെംഗളൂരു: ബെംഗളൂരു-മൈസൂരു എക്സ്പ്രസ് വേയില് ബിഡദിക്ക് സമീപം കെഎസ്ആര്ടിസി സ്വിഫ്റ്റ് ഡീലക്സ് ബസ് നിയന്ത്രണം വിട്ട് മറിഞ്ഞ് ഡ്രൈവറും കണ്ടക്ടറും മരിച്ചു. കോഴിക്കോട് ഡിപ്പോയില് നിന്ന് ബെംഗളൂരുവിലേക്ക് വരികയായിരുന്ന ബസാണ് അപകടത്തില് പെട്ടത്. അപകടത്തില് ഇരുപതോളം യാത്രക്കാര്ക്ക് പരിക്കേറ്റിട്ടുണ്ട്. പരുക്കേറ്റവരെ അടുത്തുള്ള ആശുപത്രികളില് പ്രവേശിപ്പിച്ചു. ഇന്ന് രാവിലെ 6:45 ഓടെയാണ് അപകടം. ഡ്രൈവര് ബിജിലേഷ് കണ്ടക്ടര് എന്എം അരുണ് എന്നിവരാണ് മരിച്ചത്.
കോഴിക്കോട് നിന്ന് യാത്ര തിരിച്ച് ബെംഗളൂരുവിലേക്ക് പോകുകയായിരുന്ന ബസ്, എക്സ്പ്രസ് വേയിലൂടെ സഞ്ചരിക്കവെ യാത്രാമധ്യേ നിയന്ത്രണം നഷ്ടപ്പെടുകയായിരുന്നു. തുടര്ന്ന് റോഡിനു നടുവിലെ സൈന്ബോര്ഡില് ഇടിച്ച ബസ് തലകീഴായി മറിയുകയായിരുന്നുവെന്ന് ദൃക്സാക്ഷികള് പറയുന്നു.
അപകടത്തെ തുടര്ന്ന് ബസിന്റെ മുന്ഭാഗം പൂര്ണ്ണമായി തകര്ന്നു. സംഭവസ്ഥലത്ത് ഉടനടി രക്ഷാപ്രവര്ത്തനം ആരംഭിക്കുകയും പരുക്കേറ്റ യാത്രക്കാരെ ആശുപത്രിയിലേക്ക് മാറ്റുകയും ചെയ്തു. അപകടത്തെ തുടര്ന്ന് എക്സ്പ്രസ് വേയില് ചെറിയ തോതില് ഗതാഗത തടസ്സവും അനുഭവപ്പെട്ടു. പോലീസ് സ്ഥലത്തെത്തി മേല്നടപടികള് സ്വീകരിച്ചു.
Related News
