ആലത്തൂര്: ഗ്ലോബല് കേരള പ്രവാസി അസോസിയേഷന് (പാലക്കാട് ജില്ല) ആലത്തൂര് താലൂക്ക് കമ്മിറ്റിയുടെ നേതൃത്വത്തില് 'പ്രവാസിക്ക് ഒരു കൈത്താങ്ങ്' സംഗമവും പുതിയ താലൂക്ക് കമ്മിറ്റി രൂപീകരണവും നടന്നു. ആലത്തൂര് ടൗണ് മസ്ജിദ് ഹാളില് നടന്ന കണ്വെന്ഷന് ജി.കെ.പി.എ. പാലക്കാട് ജില്ലാ പ്രസിഡന്റ് കെ.കെ.എം. ബഷീര് കാറല്മണ്ണ ഉദ്ഘാടനം ചെയ്തു.
ചടങ്ങില് താലൂക്ക് പ്രസിഡന്റ് ഷാജഹാന് കോട്ടായി അധ്യക്ഷത വഹിച്ചു. സാദിഖ് മൂപ്പന് തോണിപ്പാടം സ്വാഗതം പറഞ്ഞു. ജി.കെ.പി.എ. ജില്ലാ സെക്രട്ടറി കെ.സി. സൈഫുദ്ദീന് മങ്കര മുഖ്യപ്രഭാഷണം നടത്തി. തിരിച്ചുവന്ന പ്രവാസികള്ക്ക് ഒരു കൈത്താങ്ങാവാന് വിവിധ പ്രൊജക്റ്റുകളെക്കുറിച്ചുള്ള ചര്ച്ചകള് നടക്കുകയും, അവ സമയബന്ധിതമായി തുടങ്ങാന് തീരുമാനിക്കുകയും ചെയ്തു.
60 വയസ്സ് കഴിഞ്ഞ എല്ലാ പ്രവാസികള്ക്കും ഒറ്റപ്രീമിയം അടച്ച് പെന്ഷന് അര്ഹരാക്കുക, മിനിമം പെന്ഷന് 5000 രൂപയാക്കുക, മുടങ്ങിക്കിടക്കുന്ന പ്രവാസി പെന്ഷന് ഉടന് വിതരണം ചെയ്യുക, തിരിച്ചുവന്ന എല്ലാ പ്രവാസികള്ക്കും സബ്സിഡിയോട് കൂടി ചെറിയ പലിശയില് 5 ലക്ഷം രൂപ ലോണ് അനുവദിക്കുക, പ്രവാസികളുടെ യാത്രാ പ്രശ്നം ഉടന് പരിഹരിക്കുക, നോര്ക്ക ഇന്ഷുറന്സില് തിരിച്ചുവന്ന പ്രവാസികളെയും ഉള്പ്പെടുത്തുക തുടങ്ങിയ ആവശ്യങ്ങള് ഉന്നയിച്ചു.
ഇതുസംബന്ധിച്ച് സര്ക്കാരിനോട് വീണ്ടും ആവശ്യപ്പെടാന് യോഗം തീരുമാനിച്ചു. സൈഫുദ്ദീന് കുഴല്മന്നം (താലൂക്ക് സെക്രട്ടറി), അഷ്റഫ് പത്തനാപുരം, ജി. ബാലകൃഷ്ണന് പാലക്കാട് (ജില്ലാ ട്രഷറര്), പി.എസ്. സുബ്രമണ്യന് പാലക്കാട് (ജില്ലാ മെമ്പര്ഷിപ്പ് സെക്രട്ടറി), രാമനുണ്ണി കാറല്മണ്ണ എന്നിവര് ആശംസകള് നേര്ന്നു.
മെമ്പര്ഷിപ്പ് കാര്ഡ് വിതരണവും പുതിയ അംഗങ്ങളെ ചേര്ക്കലും നടന്നു. സര്ക്കാരിന്റെ ലഹരിവിരുദ്ധ ക്യാമ്പെയ്നായ 'തൂഫാന്' ജി.കെ.പി.എ. പിന്തുണയും പ്രഖ്യാപിച്ചു.
ആലത്തൂര് താലൂക്കിന്റെ പുതിയ ഭാരവാഹികള്: പ്രസിഡന്റ്: ഹൈദറോസ് പുതുക്കോട്, സെക്രട്ടറി: സൈഫുദ്ദീന് കുഴല്മന്നം, ട്രഷറര്: സാദിഖ് മൂപ്പന് തോണിപ്പാടം, വൈസ് പ്രസിഡന്റുമാര്: ഷാജഹാന് കോട്ടായി, യാകൂബ് പുതുക്കോട്, ജോയിന്റ് സെക്രട്ടറിമാര്: അഷ്റഫ് പത്തനാപുരം, അന്വര് ചുങ്കം.
ജില്ലാ ട്രഷറര് ജി. ബാലകൃഷ്ണന് നന്ദി പറഞ്ഞു.
