മൈസൂരു: മൈസൂരുവിന് സമീപം പെരിയപട്ടണത്തില്‍ സ്ലീപ്പര്‍ ബസും ലോറിയും കൂട്ടിയിടിച്ച് രണ്ട് മലയാളികള്‍ ഉള്‍പ്പെടെ നാല് പേര്‍ ദാരുണമായി മരിച്ചു. കോഴിക്കോട് ബേപ്പൂര്‍ സ്വദേശി അഫ്താബ് (28), മാങ്കാവ് സ്വദേശി സജേഷ് (36), മൈസൂര്‍ സ്വദേശിയായ ബസ് ഡ്രൈവര്‍ സുനില്‍ എന്നിവരെ തിരിച്ചറിഞ്ഞിട്ടുണ്ട്. അപകടത്തില്‍ നിരവധി പേര്‍ക്ക് ഗുരുതരമായി പരിക്കേറ്റിട്ടുണ്ട്.
ബെംഗളൂരുവില്‍ നിന്ന് കോഴിക്കോട്ടേക്ക് വരികയായിരുന്ന കര്‍ണാടക ആര്‍ടിസിയുടെ കാവേരി എസി സ്ലീപ്പര്‍ ബസാണ് അപകടത്തില്‍പ്പെട്ടത്. പൂജ അവധിക്കാലമായതിനാല്‍ ബസില്‍ മുഴുവന്‍ സീറ്റുകളിലും യാത്രക്കാരുണ്ടായിരുന്നു.
ഇന്ന് പുലര്‍ച്ചെ 3:45-ഓടെയായിരുന്നു സംഭവം. വനമേഖലയിലൂടെ കടന്നുപോയ പ്രദേശത്ത് ഇന്നലെ രാത്രി കനത്ത മഴയുണ്ടായിരുന്നു. മഴയില്‍ റോഡിലേക്ക് മരം കടപുഴകി വീണത് ഗതാഗതം ഭാഗികമായി തടസ്സപ്പെടുത്തിയിരുന്നു. ഈ തടസ്സം ഒഴിവാക്കാന്‍ എതിര്‍ദിശയില്‍ വന്ന ലോറി പെട്ടെന്ന് വലതുവശത്തേക്ക് വെട്ടിച്ചതാണ് നിയന്ത്രണം വിട്ട് ബസിലേക്ക് ഇടിച്ചുകയറാന്‍ കാരണമായത്.
പരിക്കേറ്റവരെ പെരിയപട്ടണം സര്‍ക്കാര്‍ ആശുപത്രിയിലും മൈസൂരിലെ വിവിധ ആശുപത്രികളിലുമായി പ്രവേശിപ്പിച്ചിരിക്കുകയാണ്. പലരുടെയും നില അതീവ ഗുരുതരമായതിനാല്‍ മരണസംഖ്യ ഉയരാന്‍ സാധ്യതയുണ്ടെന്നാണ് ലഭിക്കുന്ന വിവരം. മൃതദേഹങ്ങള്‍ പെരിയപട്ടണം സര്‍ക്കാര്‍ ആശുപത്രി മോര്‍ച്ചറിയിലേക്ക് മാറ്റിയിട്ടുണ്ട്.
Related News
