ഏദന്‍: യെമനില്‍ ഹൂതി സൈനിക ലക്ഷ്യങ്ങള്‍ക്ക് നേരെ യെമന്‍ സായുധ സേന നടത്തിയ കനത്ത ആക്രമണത്തില്‍ 430-ലധികം ഹൂതി മിലീഷ്യ അംഗങ്ങള്‍ കൊല്ലപ്പെട്ടതായി ഔദ്യോഗിക വക്താവ് അറിയിച്ചു. കഴിഞ്ഞ 24 മണിക്കൂറിനുള്ളില്‍ 1,292 വ്യോമാക്രമണങ്ങളാണ് നടത്തിയത്. ആക്രമണത്തില്‍ 100-ലധികം സൈനിക വാഹനങ്ങളും മറ്റ് ഉപകരണങ്ങളും തകര്‍ക്കുകയും പ്രവര്‍ത്തനരഹിതമാക്കുകയും ചെയ്തു.
'ഓപ്പറേഷന്‍ ഡോണ്‍ ഓഫ് യെമന്‍' ദൗത്യത്തിന്റെ ഭാഗമായി നടത്തിയ ഈ ആക്രമണങ്ങള്‍ ഹൂതികളുടെ പ്രതിരോധ പോസ്റ്റുകള്‍, ഫയറിങ് കേന്ദ്രങ്ങള്‍, സപ്ലൈ വാഹനങ്ങള്‍ എന്നിവ ലക്ഷ്യമാക്കിയായിരുന്നുവെന്ന് സൈനിക വക്താവ് വ്യക്തമാക്കി.
മരിബിലെ കിഴക്കന്‍ മുന്‍നിരയില്‍ സര്‍ക്കാര്‍ സേന മുന്നേറ്റം തുടരുകയാണെന്നും നിരവധി പ്രധാന ഉന്നത പ്രദേശങ്ങളുടെ നിയന്ത്രണം പിടിച്ചെടുത്തതായും പ്രസ്താവനയില്‍ പറയുന്നു. തെക്കന്‍, പടിഞ്ഞാറന്‍ മുന്‍നിരകളിലും ഹൂതികള്‍ക്ക് മേല്‍ സൈനിക സമ്മര്‍ദ്ദം ശക്തമാക്കിയിട്ടുണ്ട്. പിടിച്ചെടുത്ത പ്രദേശങ്ങളില്‍ സൈനിക എന്‍ജിനീയറിങ് യൂണിറ്റുകള്‍ മൈനുകളും സ്‌ഫോടകവസ്തുക്കളും നിര്‍വീര്യമാക്കുന്ന പ്രവര്‍ത്തനങ്ങള്‍ നടത്തിവരികയാണ്.
തൈസില്‍ ഹൂതികളുടെ റീഇന്‍ഫോഴ്‌സ്‌മെന്റ് വാഹനവ്യൂഹങ്ങള്‍ക്ക് നേരെ വ്യോമാക്രമണങ്ങള്‍ ഉണ്ടായതായും നിരവധി ഹൂതി ഫീല്‍ഡ് ഡിഫന്‍ഡര്‍മാരെ പിടികൂടിയതായും റിപ്പോര്‍ട്ടില്‍ വ്യക്തമാക്കുന്നു. ബാഹ്യതാല്‍പര്യങ്ങള്‍ക്കായി നടത്തുന്ന റിക്രൂട്ട്‌മെന്റ് കാമ്പെയ്നുകളില്‍ നിന്ന് സ്വന്തം മക്കളെ സംരക്ഷിക്കണമെന്ന് ഹൂതി നിയന്ത്രിത പ്രദേശങ്ങളിലെ ജനങ്ങളോട് സൈനിക വക്താവ് അഭ്യര്‍ത്ഥിച്ചു.
Related News
