ന്യൂഡല്‍ഹി: മൊബൈലില്‍ പരിചയമില്ലാത്ത നമ്പറില്‍നിന്ന് കോള്‍ വരുമ്പോള്‍ ആരാണ് വിളിക്കുന്നതെന്ന് ഇനി സംശയിക്കേണ്ടി വരില്ല. ഇന്ത്യയിലെ 4ജി, അതിനുമുകളിലുള്ള സാങ്കേതികവിദ്യയില്‍ പ്രവര്‍ത്തിക്കുന്ന മൊബൈല്‍ നെറ്റ്‌വര്‍ക്കുകളില്‍ വിളിക്കുന്നയാളുടെ പേരും ഫോണില്‍ പ്രദര്‍ശിപ്പിക്കുന്ന സംവിധാനം നവംബര്‍ ഒന്നുമുതല്‍ നടപ്പാക്കാന്‍ കേന്ദ്ര ടെലികോം വകുപ്പ് നിര്‍ദേശം നല്‍കി. കോള്‍ ചെയ്യുന്നയാളുടെ പേര് അറിയിക്കുന്ന കോളിങ് നെയിം പ്രസന്റേഷന്‍ (സി.എന്‍.എ.പി.) സംവിധാനമാണ് പ്രാബല്യത്തില്‍ വരുന്നത്.
ഒക്ടോബര്‍ 13ന് പുറത്തിറക്കിയ സര്‍ക്കുലര്‍ പ്രകാരം, എല്ലാ ടെലികോം സേവനദാതാക്കളും നവംബര്‍ ഒന്നുമുതല്‍ ഈ സംവിധാനം നടപ്പാക്കണം. ഉപയോക്താക്കള്‍ പ്രത്യേകമായി അപേക്ഷിക്കേണ്ടതില്ല. നിലവിലുള്ളതുപോലെ വിളിക്കുന്നയാളുടെ നമ്പറിനൊപ്പം പേരും പ്രദര്‍ശിപ്പിക്കും.
സ്വന്തം ഫോണില്‍ നമ്പര്‍ സേവ് ചെയ്തിട്ടുണ്ടെങ്കില്‍ കോണ്‍ടാക്ടില്‍ നല്‍കിയ പേരായിരിക്കും കാണിക്കുക. നമ്പര്‍ സേവ് ചെയ്തിട്ടില്ലെങ്കില്‍ ടെലികോം കമ്പനിയുടെ രേഖകളിലുള്ള പേരാണ് പ്രദര്‍ശിപ്പിക്കുക. വിദേശത്തുനിന്നുള്ള കോളുകളില്‍ വിളിക്കുന്നയാളുടെ പേരിനു പകരം 'ഇന്റര്‍നാഷനല്‍ കോള്‍' എന്നായിരിക്കും കാണിക്കുക. സ്വന്തം നമ്പര്‍ മറച്ചുവെച്ച് വിളിക്കുന്നതിനുള്ള കോളിങ് ലൈന്‍ ഐഡന്റിഫിക്കേഷന്‍ റെസ്ട്രിക്ഷന്‍ (സി.എല്‍.ഐ.ആര്‍.) സൗകര്യം ഉപയോഗിക്കുന്നവരുടെ പേരും പ്രദര്‍ശിപ്പിക്കില്ല.
ഓരോ ടെലികോം കമ്പനിയും ഉപയോക്താക്കളുടെ ഫോണ്‍ നമ്പറുകളും പേരുകളും ബന്ധിപ്പിച്ചുള്ള ഡാറ്റാബേസ് സൂക്ഷിക്കണം. ഒരു കോള്‍ എത്തുമ്പോള്‍ സ്വീകരിക്കുന്നയാളുടെ ടെലികോം കമ്പനി ഈ വിവരങ്ങള്‍ പരിശോധിച്ചാണ് പേര് പ്രദര്‍ശിപ്പിക്കുക.
ഉപയോക്താക്കളുടെ സ്വകാര്യത സംരക്ഷിക്കുന്നതിനായി 'സെക്യൂരിറ്റി ബൈ ഡിസൈന്‍' സമീപനം സ്വീകരിക്കണമെന്നും ടെലികോം വകുപ്പ് നിര്‍ദേശിച്ചിട്ടുണ്ട്. കോള്‍ അവസാനിച്ചശേഷം പേര് പരിശോധിക്കുന്നതിനായി നടത്തിയ വിവരാന്വേഷണത്തിന്റെ രേഖ നിലനിര്‍ത്തരുതെന്നാണ് നിര്‍ദേശം.
വാണിജ്യ ആവശ്യങ്ങള്‍ക്കായി ഉപയോഗിക്കുന്ന ബിസിനസ്, ബള്‍ക്ക് കണക്ഷനുകള്‍ക്ക് പ്രത്യേക ഇളവുമുണ്ട്. അത്തരം കണക്ഷനുകള്‍ക്ക് രേഖകളിലുള്ള പേരിനു പകരം വ്യാപാരമുദ്ര രജിസ്ട്രിയിലോ ജി.എസ്.ടി. പോര്‍ട്ടലിലോ രജിസ്റ്റര്‍ ചെയ്ത വ്യാപാരനാമം പ്രദര്‍ശിപ്പിക്കാന്‍ അനുമതി നല്‍കാം. ഇതിന് ആവശ്യമായ രേഖകള്‍ പരിശോധിച്ച് ഉറപ്പാക്കണം. പേരുമായി ബന്ധപ്പെട്ട പരാതികള്‍ പരിഹരിക്കാന്‍ നിശ്ചിത സമയപരിധിയുള്ള സംവിധാനവും കമ്പനികള്‍ ഒരുക്കണം.
ആദ്യഘട്ടത്തില്‍ 4ജി, 5ജി ഉള്‍പ്പെടെയുള്ള അനുയോജ്യമായ വയര്‍ലെസ് നെറ്റ്‌വര്‍ക്കുകളിലാണ് സംവിധാനം നടപ്പാക്കുന്നത്. 2ജി, 3ജി, ലാന്‍ഡ്‌ലൈന്‍ സേവനങ്ങളില്‍ ഇത് നടപ്പാക്കുന്ന കാര്യം പിന്നീട് പ്രത്യേകം പരിശോധിക്കുമെന്ന് ടെലികോം വകുപ്പ് വ്യക്തമാക്കിയിട്ടുണ്ട്.
ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) 2024 ഫെബ്രുവരിയില്‍ നല്‍കിയ ശുപാര്‍ശകളും 2025 നവംബറില്‍ കെ.വൈ.സി. നടപടികളുമായി ബന്ധപ്പെട്ട് വകുപ്പ് പുറപ്പെടുവിച്ച നിര്‍ദേശങ്ങളുമാണ് പുതിയ സംവിധാനത്തിന്റെ അടിസ്ഥാനം. വ്യാജ കോളുകളും തട്ടിപ്പുകളും തിരിച്ചറിയാന്‍ സഹായിക്കുമെന്ന പ്രതീക്ഷയോടെയാണ് ഈ സംവിധാനം നടപ്പാക്കുന്നത്.
Related News
