ന്യൂഡല്‍ഹി: കോക്രോച്ച് ജനതാ പാര്‍ട്ടി (സി.ജെ.പി) സ്ഥാപകന്‍ അഭിജീത് ദിപ്‌കെയെ ഡല്‍ഹിയിലെ വസതിയില്‍ നിന്ന് പോലീസും സുരക്ഷാ സേനയും കസ്റ്റഡിയിലെടുത്തു. ഡല്‍ഹിയില്‍ നടത്താന്‍ നിശ്ചയിച്ചിരുന്ന 'ലെഹരാ ദോ തിരംഗ' റാലി ആരംഭിക്കുന്നതിന് തൊട്ടുമുന്‍പായിരുന്നു നടപടി. ഒരാഴ്ചയ്ക്കിടെ ഇത് രണ്ടാം തവണയാണ് ദിപ്‌കെ കസ്റ്റഡിയിലാകുന്നത്.
വോട്ടര്‍ പട്ടിക പരിഷ്‌കരണത്തിലെ (എസ്.ഐ.ആര്‍) ക്രമക്കേടുകള്‍ക്കെതിരെ ചീഫ് ഇലക്ഷന്‍ കമ്മീഷണര്‍ ജ്ഞാനേഷ് കുമാറിനെതിരെ പ്രതിഷേധിക്കാനായി മുംബൈയില്‍ നിന്ന് വിമാനമിറങ്ങിയ ഉടന്‍ അദ്ദേഹത്തെ മുന്‍പും കസ്റ്റഡിയിലെടുത്തിരുന്നു. സമര കേന്ദ്രമായിരുന്ന ജന്തര്‍ മന്തറിനെ പ്രതിഷേധ സ്ഥലങ്ങളുടെ പട്ടികയില്‍ നിന്ന് നീക്കിയതിന് തൊട്ടടുത്ത ദിവസമായ ഒക്ടോബര്‍ 13-ന് ദേശീയ പതാകയേന്തി പ്രതിഷേധിച്ചതിന് സി.ജെ.പി പ്രവര്‍ത്തകരായ സൗരവ് ദാസ്, അശുതോഷ് റാങ്ക എന്നിവരെ അഞ്ച് ദിവസത്തെ ജുഡീഷ്യല്‍ കസ്റ്റഡിയില്‍ വിട്ടിരുന്നു. ഈ അറസ്റ്റില്‍ പ്രതിഷേധിച്ചാണ് പുതിയ മാര്‍ച്ച് പ്രഖ്യാപിച്ചത്.
കസ്റ്റഡിയിലെടുക്കുന്ന സമയത്ത്, 'നിങ്ങള്‍ക്ക് ന്യൂഡല്‍ഹിയിലേക്ക് പോകാന്‍ അനുമതിയില്ല, ഞങ്ങള്‍ നിങ്ങളെ കസ്റ്റഡിയിലെടുക്കുകയാണ്' എന്ന് ഡല്‍ഹി പോലീസ് ദിപ്‌കെയോട് പറഞ്ഞു. ഇതിന് മറുപടിയായി 'എനിക്ക് ന്യൂഡല്‍ഹിയില്‍ പോകാന്‍ കഴിയില്ലെങ്കില്‍ മറ്റെവിടെയെങ്കിലും പൊയ്ക്കൂടെ? ഞാന്‍ എന്ത് നിയമമാണ് ലംഘിച്ചത്?' എന്ന് ദിപ്‌കെ ചോദിച്ചു. അതേസമയം, കോക്രോച്ച് യുവജന പ്രസ്ഥാനത്തിന്റെ നേതൃത്വത്തിലുള്ള പ്രതിഷേധങ്ങളെ അടിച്ചമര്‍ത്തുന്നതിന്റെ ഭാഗമായി വിദ്യാര്‍ത്ഥി നേതാവും പ്രമുഖ ആക്ടിവിസ്റ്റുമായ നേഹാ ബോറയെ (29) ജന്തര്‍ മന്തറിന് സമീപത്തുനിന്ന് പോലീസ് കസ്റ്റഡിയിലെടുത്തു.
ഇന്ന് ദിപ്‌കെയെ കസ്റ്റഡിയിലെടുക്കുന്നതിന് തൊട്ടുമുന്‍പ്, ഡല്‍ഹി പോലീസ് അദ്ദേഹത്തിന്റെ വീട്ടിലെത്തി മാര്‍ച്ച് നടത്തുന്നതിനെതിരെ നോട്ടീസ് നല്‍കിയിരുന്നു. കണാട്ട് പ്ലേസ് മേഖലയില്‍ ഭാരതീയ നാഗരിക് സുരക്ഷാ സംഹിത (ബി.എന്‍.എസ്.എസ്) 163-ാം വകുപ്പ് പ്രകാരം നിരോധനാജ്ഞ നിലവിലുണ്ടെന്ന് നോട്ടീസില്‍ വ്യക്തമാക്കിയിരുന്നു. നിര്‍ദ്ദിഷ്ട 'തിരംഗ യാത്ര'യ്ക്ക് ന്യൂഡല്‍ഹി മുന്‍സിപ്പല്‍ കൗണ്‍സില്‍ (എന്‍.ഡി.എം.സി) അനുമതി നല്‍കിയിട്ടില്ലെന്നും, മാര്‍ച്ച് നടത്തിയാല്‍ അത് നിയമലംഘനമായി കണക്കാക്കുമെന്നും പോലീസ് മുന്നറിയിപ്പ് നല്‍കി.
ഗാന്ധിയുടെ ചിത്രമുള്ള വെള്ള ടീഷര്‍ട്ടും ഡെനിമും ധരിച്ച ദിപ്‌കെയോട് ദേശീയ പതാക വീശുന്നത് കുറ്റകരമല്ലെന്നും എന്നാല്‍ അനുമതിയില്ലാതെ റാലി സംഘടിപ്പിക്കുന്നതും ജനങ്ങളെ കൂട്ടുന്നതും നിയമലംഘനമാണെന്നും പോലീസ് വ്യക്തമാക്കി. ദേശീയ പതാകയുടെ മാന്യത ഉറപ്പാക്കുന്ന ഫ്‌ലാഗ് കോഡ് മാനദണ്ഡങ്ങള്‍ പാലിക്കണമെന്നും 31-കാരനായ നേതാവിനോട് പോലീസ് ആവശ്യപ്പെട്ടു.'നിങ്ങള്‍ എന്റെ മേല്‍ എന്തൊക്കെ ആരോപണങ്ങളാണ് ഉന്നയിച്ചിരിക്കുന്നത്?' എന്ന് ദിപ്‌കെ കസ്റ്റഡി നടപടികള്‍ക്കിടെ പോലീസിനോട് ചോദിക്കുന്നതിന്റെ വീഡിയോ ദൃശ്യങ്ങളും പുറത്തുവന്നിട്ടുണ്ട്. തോളില്‍ ദേശീയ പതാക അണിഞ്ഞ് ലിവിംഗ് റൂമിലെ കസേരയിലിരിക്കുന്ന ദിപ്‌കെ, ഗ്ലാസ് മേശപ്പുറത്തിരുന്ന പോലീസ് നോട്ടീസ് പരിശോധിച്ച് ഉദ്യോഗസ്ഥരോട് ചോദ്യങ്ങള്‍ ചോദിക്കുന്നത് വീഡിയോയില്‍ കാണാം.
Related News
