കൊച്ചി: സി.എം.ആര്‍.എല്‍ (കൊച്ചിന്‍ മിനറല്‍സ് ആന്‍ഡ് റൂട്ടൈല്‍ ലിമിറ്റഡ്) ബന്ധമുള്ള കള്ളപ്പണം വെളുപ്പിക്കല്‍ കേസില്‍ മുന്‍ മുഖ്യമന്ത്രി പിണറായി വിജയനോട് ഒക്ടോബര്‍ 23ന് ചോദ്യം ചെയ്യലിന് ഹാജരാകാന്‍ എന്‍ഫോഴ്‌സ്‌മെന്റ് ഡയറക്ടറേറ്റ് (ഇ.ഡി) നിര്‍ദേശം നല്‍കി.
കള്ളപ്പണം വെളുപ്പിക്കല്‍ നിരോധന നിയമമായ (പി.എം.എല്‍.എ) പ്രകാരമാണ് ഇ.ഡി നോട്ടീസ് അയച്ചിരിക്കുന്നത്. കേസുമായി ബന്ധപ്പെട്ട് കേരള പൊലീസ് അടുത്തിടെ രജിസ്റ്റര്‍ ചെയ്ത എഫ്.ഐ.ആര്‍ അടിസ്ഥാനമാക്കിയാണ് കേന്ദ്ര ഏജന്‍സി അന്വേഷണം ആരംഭിച്ചത്.
സി.എം.ആര്‍.എല്‍-എക്‌സാലോജിക് ഇടപാടുകളുമായി ബന്ധപ്പെട്ട വിവാദത്തിന്റെ പശ്ചാത്തലത്തിലാണ് ഇ.ഡിയുടെ നടപടി.
കേസില്‍ രണ്ടു തവണ ഇ.ഡി നേരത്തെ റെയ്ഡ് നടത്തിയിരുന്നു. പിണറായി വിജയന്റെ മകള്‍ വീണക്ക് 2017 മുതല്‍ 2019 വരെ മാസം തോറും മൂന്നു ലക്ഷത്തിലധികം രൂപ ലഭിച്ചുവെന്നാണ് ഇ.ഡി റിപ്പോര്‍ട്ട്. പ്രത്യേകിച്ച് സേവനമൊന്നും നല്‍കാതതെ ഇത്രയധികം തുക നല്‍കിയത് പിണറായി വിജയനുള്ള കൈക്കൂലിയാണെന്നാണ് ഇ.ഡി ആരോപിക്കുന്നത്. ഇ.ഡി റിപ്പോര്‍ട്ടിന്റെ അടിസ്ഥാനത്തില്‍ വിജിലന്‍സ് കേസെടുത്തിട്ടുണ്ട്. വിജിലന്‍സ് രജിസ്റ്റര്‍ ചെയ്ത രണ്ട് എഫ്.ഐ.ആറുകള്‍ റദ്ദാക്കണമെന്നാവശ്യപ്പെട്ട് പിണറായി വിജയന്‍ സുപ്രീം കോടതിയെ സമീപിച്ചിട്ടുണ്ട്.
Related News
