അങ്കമാലി: നെടുമ്പാശേരി എയര്‍പോര്‍ട്ട് റോഡില്‍ അമിതവേഗത്തിലെത്തിയ ആഡംബര കാര്‍ സ്‌കൂട്ടറിനു പിന്നിലിടിച്ച് മൂന്നുേപര്‍ മരിച്ച സംഭവത്തില്‍ പ്രതികളുടെ ജാമ്യാപേക്ഷ കോടതി തള്ളി. ഒന്നാം പ്രതി സുഹൈല്‍ സജീവ്, ഒപ്പംണ്ടായിരുന്ന നിനവ്, ജോയല്‍, അമീര്‍ എന്നിവരുടെ ജാമ്യാപേക്ഷയാണ് അങ്കമാലി മജിസ്ട്രേട്ട് കോടതി തള്ളിയത്.

കഴിഞ്ഞ മാസം 11ന് പുലര്‍ച്ചെ 1.45-ഓടെയായിരുന്നു നാടിനെ ഞെട്ടിച്ച ദാരുണമായ അപകടം. കൊച്ചിയിലെ ആന്റീക് ഷോപ്പിലെ ജീവനക്കാരായ വയനാട് സ്വദേശി ദേവിക (21), പാലക്കാട് സ്വദേശി ഗോപിക (21), സുള്ള്യ സ്വദേശി ഇയാസ് (21) എന്നിവരാണ് സംഭവസ്ഥലത്തുതന്നെ മരിച്ചത്. എയര്‍പോര്‍ട്ട് ഭാഗം സന്ദര്‍ശിച്ചശേഷം തൃക്കാക്കരയിലേക്ക് മടങ്ങുമ്പോഴാണ് മിനി കൂപ്പര്‍ കാര്‍ ഇവര്‍ സഞ്ചരിച്ച സ്‌കൂട്ടറിനു മേല്‍ പാഞ്ഞുകയറിയത്. അപകടത്തിന് ശേഷം 'എയര്‍പോര്‍ട്ട് റോഡില്‍ വേഗതയില്‍ ഓടിച്ചാല്‍ എന്താണ് കുഴപ്പം, അച്ഛന്‍ നോക്കിക്കൊള്ളും' എന്ന് കാറിലുണ്ടായിരുന്നവര്‍ നാട്ടുകാരോട് തര്‍ക്കിച്ചതായി ദൃക്‌സാക്ഷികള്‍ വെളിപ്പെടുത്തിയിരുന്നു.

കേസില്‍ ചുമത്തിയിരിക്കുന്ന 105-ാം വകുപ്പ് പ്രകാരമുള്ള കുറ്റകരമായ നരഹത്യ നിലനില്‍ക്കില്ലെന്ന് പ്രതിഭാഗം വാദിച്ചു. മൂന്നുപേര്‍ ഒരു സ്‌കൂട്ടറില്‍ സഞ്ചരിച്ചത് അപകടത്തിന് കാരണമായെന്നും, വാഹനത്തിന്റെ വേഗത തെളിയിക്കാന്‍ പൊലീസിന് ഇതുവരെ കൃത്യമായ തെളിവുകള്‍ ഹാജരാക്കാന്‍ കഴിഞ്ഞിട്ടില്ലെന്നും അവര്‍ കോടതിയില്‍ വാദിച്ചു. കാറില്‍ ഒന്നില്‍ക്കൂടുതല്‍ പേര്‍ക്ക് സഞ്ചരിക്കാമെന്നും, മുന്‍പ് ചെറിയൊരു പരാതി പോലും ഇല്ലാത്ത പ്രതിയെ കുറ്റവാളിയായി ചിത്രീകരിക്കുകയാണെന്നും പ്രതിഭാഗം വ്യക്തമാക്കി.

എന്നാല്‍ പ്രതികള്‍ അമിതമായി മദ്യപിച്ചിരുന്നുവെന്നും പ്രൊസിക്യൂഷന്‍ ശക്തമായി വാദിച്ചു. പരിശോധനയില്‍ ഒന്നാം പ്രതിയുടെ രക്തത്തില്‍ അനുവദനീയമായ അളവിന്റെ 5.3 മടങ്ങ് അധികം മദ്യത്തിന്റെ അംശം കണ്ടെത്തിയിരുന്നു. മദ്യപിച്ച് വാഹനമോടിച്ചാല്‍ മനുഷ്യജീവന് അപകടമുണ്ടാകുമെന്ന് അറിയാവുന്ന പ്രായപൂര്‍ത്തിയായവരാണ് പ്രതികളെന്നും, കൊല്ലപ്പെട്ടവരുടെ പ്രായവും സാഹചര്യങ്ങളും കണക്കിലെടുത്ത് ജാമ്യം നല്‍കരുതെന്നും പ്രൊസിക്യൂഷന്‍ ആവശ്യപ്പെട്ടു. അപകടത്തിന്റെ ഭീകരതയും പ്രതികള്‍ മദ്യപിച്ചിരുന്നതായി ശാസ്ത്രീയ പരിശോധനയില്‍ വ്യക്തമായതുള്‍പ്പെടെയുള്ള കാര്യങ്ങള്‍ പരിഗണിച്ചാണ് കോടതി ജാമ്യാപേക്ഷ തള്ളിയത്. കേസില്‍ ഡിജിറ്റല്‍ തെളിവുകളും സി.സി.ടി.വി ദൃശ്യങ്ങളും ഉടന്‍ ഹാജരാക്കുമെന്ന് പ്രൊസിക്യൂഷന്‍ അറിയിച്ചിട്ടുണ്ട്.