ഖമീസ് മുഷൈത്ത്- ഖമിസ് മുശൈത്, അബഹ നഗരങ്ങളില്‍ ഡ്രോണ്‍ ആക്രമണ ഭീഷണിയെത്തുടര്‍ന്ന് ഇന്ന് രണ്ട് തവണ ജാഗ്രതാ നിര്‍ദ്ദേശം നല്‍കി. പിന്നീട് അപായസൂചന നീങ്ങിയതായി അധികൃതര്‍ ഔദ്യോഗികമായി അറിയിച്ചു.

ശനിയാഴ്ച പുലര്‍ച്ചെ 2:00 മണിയോടെ ആദ്യ മുന്നറിയിപ്പും, തുടര്‍ന്ന് രാവിലെ 11:00 മണിയോടെ രണ്ടാമത്തെ മുന്നറിയിപ്പും നല്‍കിയിരുന്നു. സാഹചര്യം പൂര്‍ണ്ണമായും സുരക്ഷിതമാണെന്ന് സ്ഥിരീകരിച്ച ശേഷമാണ് അപായം ഒഴിഞ്ഞതായി അധികൃതര്‍ അറിയിച്ചത്.

മുന്നറിയിപ്പ് നിലനില്‍ക്കുന്ന സമയത്ത് പൗരന്മാരും താമസക്കാരും കര്‍ശനമായ സുരക്ഷാ മാര്‍ഗ്ഗനിര്‍ദ്ദേശങ്ങള്‍ പാലിക്കണമെന്ന് സിവില്‍ ഡിഫന്‍സ് അഭ്യര്‍ത്ഥിച്ചു. തുറസ്സായ സ്ഥലങ്ങളില്‍ നിന്നും ചില്ലു ജനലുകളില്‍ നിന്നും വിട്ടുനില്‍ക്കുക, മേല്‍ക്കൂരകളിലോ ബാല്‍ക്കണിയിലോ നില്‍ക്കാതിരിക്കുക എന്നിവയാണ് പ്രധാന നിര്‍ദ്ദേശങ്ങള്‍.

കെട്ടിടങ്ങള്‍ക്ക് പുറത്തുള്ളവര്‍ ഏറ്റവും അടുത്തുള്ള സുരക്ഷിത കെട്ടിടത്തിലോ ശക്തമായ തടസ്സത്തിന് പിന്നിലോ അഭയം പ്രാപിക്കണം. ആളുകള്‍ കൂട്ടംകൂടുന്നതും വീഡിയോ ദൃശ്യങ്ങള്‍ പകര്‍ത്തുന്നതും പൂര്‍ണ്ണമായി ഒഴിവാക്കണമെന്നും, സ്ഥിതിഗതികള്‍ ശാന്തമാകുന്നതുവരെ അപകടകരമായ സ്ഥലങ്ങളില്‍ നിന്ന് മാറിനില്‍ക്കണമെന്നും മുന്നറിയിപ്പില്‍ വ്യക്തമാക്കിയിട്ടുണ്ട്. അപൂര്‍ണ്ണമായ വിവരങ്ങളോ അഭ്യൂഹങ്ങളോ പ്രചരിപ്പിക്കരുതെന്നും കര്‍ശന നിര്‍ദ്ദേശമുണ്ട്.

മിസൈലുകളെയും ഡ്രോണുകളെയും പ്രതിരോധിക്കുന്നതുമായി ബന്ധപ്പെട്ട വിവരങ്ങളും അവ പതിച്ച സ്ഥലങ്ങളുടെ ദൃശ്യങ്ങളും ഫോട്ടോകളും ചിത്രീകരിക്കുന്നതും സമൂഹമാധ്യമങ്ങളില്‍ പ്രസിദ്ധീകരിക്കുന്നതും പ്രചരിപ്പിക്കുന്നതും കടുത്ത നിയമനടടികള്‍ക്ക് കാരണമാകും എന്ന് അധികൃതര്‍ ഓര്‍മ്മിപ്പിച്ചു.