ചെന്നൈ- പ്രശസ്ത തമിഴ് ചലച്ചിത്ര സംഗീത സംവിധായകന്‍ ദേവ (75) അന്തരിച്ചു. തമിഴ് സിനിമാ ലോകത്തെ സൂപ്പര്‍സ്റ്റാര്‍ രജനികാന്തുമായി ദീര്‍ഘകാലത്തെ ബന്ധമുണ്ടായിരുന്ന അദ്ദേഹം വാര്‍ദ്ധക്യസഹജമായ അസുഖങ്ങളെ തുടര്‍ന്നാണ് മരണത്തിന് കീഴടങ്ങിയത്. ആശുപത്രിയില്‍ എത്തിച്ചപ്പോള്‍ തന്നെ ഹൃദയസ്പന്ദനം നിലച്ചിരുന്നുവെന്നും ജീവന്‍ രക്ഷിക്കാനുള്ള ശ്രമങ്ങള്‍ വിഫലമായെന്നും ആശുപത്രിവൃത്തങ്ങള്‍ അറിയിച്ചു.

1950 നവംബര്‍ 20-നായിരുന്നു ദേവയുടെ ജനനം. പ്രധാനമായും തമിഴ് സിനിമയില്‍ സജീവമായിരുന്ന അദ്ദേഹം നാനൂറിലധികം ചിത്രങ്ങള്‍ക്ക് സംഗീതം നല്‍കിയിട്ടുണ്ട്. തെലുങ്ക്, മലയാളം, കന്നഡ സിനിമകളിലും അദ്ദേഹം തന്റെ സംഗീതമുദ്ര പതിപ്പിച്ചു.

ചെന്നൈയുടെ തനത് 'ഗാന' ശാഖയെ മുഖ്യധാര സിനിമകളിലേക്ക് കൊണ്ടുവരുന്നതില്‍ അദ്ദേഹം നിര്‍ണ്ണായക പങ്കുവഹിച്ചു. രജനികാന്ത് നായകനായ അണ്ണാമലൈ, അരുണാചലം, ബാഷ തുടങ്ങിയ സൂപ്പര്‍ഹിറ്റ് ചിത്രങ്ങളിലെ അദ്ദേഹത്തിന്റെ പാട്ടുകളും പശ്ചാത്തല സംഗീതവും ജനലക്ഷങ്ങളെയാണ് ആവേശഭരിതരാക്കിയത്.

സ്‌ക്രീനില്‍ രജനികാന്തിന്റെ പേര് തെളിയുമ്പോള്‍ വരാറുള്ള ഐക്കണിക് ആയ 'സൂപ്പര്‍ സ്റ്റാര്‍' ടൈറ്റില്‍ കാര്‍ഡ് തീം മ്യൂസിക് സൃഷ്ടിച്ചത് ദേവയാണ്. രജനികാന്തിന്റെ സിനിമാ ജീവിതത്തിന്റെ തന്നെ അടയാളമായി മാറിയ ഈ ടൈറ്റില്‍ മ്യൂസിക് ഇപ്പോഴും അദ്ദേഹത്തിന്റെ ചിത്രങ്ങളില്‍ ഉപയോഗിച്ചു വരുന്നു.