ജിസാന്‍: കെ.എം.സി.സി ജിസാന്‍ സെന്‍ട്രല്‍ കമ്മിറ്റി സംഘടിപ്പിച്ച പതിനഞ്ചാമത് വിന്റര്‍ സോക്കര്‍ ഫെസ്റ്റ് ചാമ്പ്യന്‍ഷിപ്പില്‍ ഇന്ത്യന്‍ ഹീറോസ് ജിസാനെ പരാജയപ്പെടുത്തി ലെജന്റ് എഫ്.സി ദബിയ ജേതാക്കളായി. നിശ്ചിത സമയത്തും പെനാല്‍റ്റി ഷൂട്ടൗട്ടിലും തുല്യത പാലിച്ചപ്പോള്‍ ടോസിലൂടെയാണ് ജേതാക്കളെ നിര്‍ണ്ണയിച്ചത്. ജിസാനിലെയും ഖമീസ്്മുഷൈത്തിലെയും പ്രമുഖ എട്ട് ടീമുകള്‍ മാറ്റുരച്ച അത്യന്തം വാശിയേറിയ പോരാട്ടങ്ങള്‍ക്കൊടുവില്‍ കലാശപ്പോരിന് അര്‍ഹത നേടിയ ലെജന്റ് എഫ്.സി ദബിയയും ഇന്ത്യന്‍ ഹീറോസ് ജിസാനും കാണികളെ ആവേശം കൊള്ളിച്ച പ്രകടനമാണ് കാഴ്ചവെച്ചത്.
ടൂര്‍ണ്ണമെന്റിന്റെ ഔദ്യോഗിക ഉദ്ഘാടനം കെ.എം.സി.സി സൗദി നാഷണല്‍ കമ്മിറ്റി സെക്രട്ടറി ഹാരിസ് കല്ലായി നിര്‍വഹിച്ചു. വിവിധ രാഷ്ട്രീയ സന്നദ്ധ സംഘടനാ പ്രതിനിധികളായ ഫൈസല്‍ മേലാറ്റൂര്‍ (ജല ജിസാന്‍), ജിലു ബേബി (ഒ.ഐ.സി.സി ജിസാന്‍), ഇസ്മായില്‍ മാനു (തനിമ ജിസാന്‍), ഷംസീര്‍ സ്വലാഹി (ഇസ്ലാഹി സെന്റര്‍ ജിസാന്‍) തുടങ്ങി നിരവധി വിശിഷ്ടാതിഥികളും ടൂര്‍ണ്ണമന്റ് വീക്ഷിക്കാന്‍ എത്തിയിരുന്നു.
അല്‍-ഫാരിസ് കോള്‍ഡ് സ്റ്റോര്‍ സ്‌പോണ്‍സര്‍ ചെയ്ത വിന്നേഴ്‌സ് ട്രോഫി സെന്‍ട്രല്‍ കമ്മിറ്റി പ്രസിഡണ്ട് ശംസു പൂക്കോട്ടൂരും, താജ് ജനൂബിയ ട്രേഡിംഗ് കമ്പനി സ്‌പോണ്‍സര്‍ ചെയ്ത റണ്ണേഴ്‌സ് ട്രോഫി സെന്‍ട്രല്‍ കമ്മിറ്റി ജനറല്‍ സെക്രട്ടറി ഖാലിദ് പട്‌ലയും കൈമാറി. ടൂര്‍ണ്ണമന്റ് ജേതാക്കള്‍ക്കുള്ള മുഗള്‍ റസ്റ്റോറന്റ് സ്‌പോണ്‍സര്‍ ചെയ്ത പ്രൈസ് മണി മുഗള്‍ ഗ്രൂപ്പ് മാനേജിംഗ് ഡയറക്ടര്‍ അബ്ദുല്‍ ഗഫൂര്‍ മൂന്നിയൂരും, റണ്ണേഴ്‌സിനുള്ള ഷിഫ ജസീറ പോളിക്ലിനിക് സ്‌പോണ്‍സര്‍ ചെയ്ത പ്രൈസ് മണി ഷിഫ മാനേജിംഗ് ഡയറക്ടര്‍ ഗഫൂര്‍ വാവൂരും സമ്മാനിച്ചു.
ടൂര്‍ണ്ണമെന്റിനോടനുബന്ധിച്ച് നടന്ന സ്‌കൂള്‍ കുട്ടികളുടെ മത്സരത്തില്‍ വിജയികളായ റിയാദ് സബിയ സ്‌കൂളിനുള്ള വിന്നേഴ്‌സ് ട്രോഫി സെന്‍ട്രല്‍ കമ്മിറ്റി ട്രഷറര്‍ ഡോ.മന്‍സൂര്‍ നാലകത്തും റണ്ണെഴ്‌സായ എജുനെറ്റ് അറേബ്യക്കുള്ള ട്രോഫി സെന്‍ട്രല്‍ കമ്മിറ്റി ഓര്‍ഗനൈസിംഗ് സെക്രട്ടറി സാദിഖ് മാഷ് മങ്കടയും കൈമാറി. ടൂര്‍ണ്ണമെന്റിന്റെ താരമായി ലെജന്റ് എഫ്.സി താരം ഷമീം, ടോപ്‌സ്‌കോറര്‍ ഫവാസ് (ഇന്ത്യന്‍ ഹീറോസ്), ബെസ്റ്റ് ഡിഫന്‍ഡര്‍ ജിന്‍ഷാദ് (ലെജന്റ് എഫ്.സി), ബെസ്റ്റ് ഗോള്‍ കീപ്പര്‍ സാദിഖ് (ഇന്ത്യന്‍ ഹീറോസ്) എന്നിവരെ ടൂര്‍ണ്ണമന്റ് കമ്മിറ്റി തെരഞ്ഞെടുത്തു. ഷൂട്ടൗട്ട് മത്സര വിജയിയായി മുഹമ്മദ് തഷ്രീഫ് തെരഞ്ഞെടുക്കപ്പെട്ടു.
സ്‌പോര്‍ട്‌സ് കണ്‍വീനര്‍ സിറാജ് പുല്ലൂരാമ്പാറയുടെ കോഡിനേഷനില്‍ നടന്ന ടൂര്‍ണ്ണമെന്റില്‍ സെന്‍ട്രല്‍ കമ്മിറ്റി ഭാരവാഹികളായ നാസര്‍ വി.ടി ഇരുമ്പുഴി, ജസ്മല്‍ വളമംഗലം, ബഷീര്‍ ആക്കോട്, കെ.പി ഷാഫി കൊടക്കല്ല്, മൂസ വലിയോറ, നാസര്‍ വാക്കലൂര്‍, സുല്‍ഫിക്കര്‍, വളണ്ടിയര്‍ വിംഗ് ക്യാപ്റ്റന്‍ സമീര്‍ അമ്പലപ്പാറ, സുബൈര്‍ ഷാ, അക്ബര്‍ പറപ്പൂര്‍, വിവിധ ഏരിയാ കമ്മിറ്റി പ്രതിനിധികള്‍, തെരഞ്ഞെടുക്കപ്പെട്ട വളണ്ടിയര്‍ ടീം അംഗങ്ങള്‍ തുടങ്ങി നിരവധി പേര്‍ പങ്കാളിത്തം വഹിച്ചു.
ഫോട്ടോ: ജേതാക്കളായ ലെജന്റ് എഫ്.സി ദബിയയും റിയാദ് സബിയ സ്‌കൂളും.
