മക്ക- സൗദി അറേബ്യയുടെ സ്ഥാപകനായ അബ്ദുല് അസീസ് രാജാവിന്റെ ഭരണചരിത്രത്തിലെ ഏറ്റവും നിര്ണ്ണായകമായ ഒരു നിമിഷത്തെക്കുറിച്ചുള്ള വെളിപ്പെടുത്തലുമായി ചരിത്ര ഗവേഷകന് അബ്ദുള്ള അല്-ഒമ്രാനി രംഗത്തെത്തി. ഹിജ്റ വര്ഷം 1343-ല് (ക്രിസ്ത്വബ്ദം 1924) വിശുദ്ധ മക്കയിലെ മസ്ജിദുല് ഹറാമിലുള്ള 'ബാബ് അല്-സഫ'യില് വെച്ച് നടന്ന ചരിത്രപരമായ അധികാര കൈമാറ്റത്തെക്കുറിച്ചാണ് അദ്ദേഹം വിശദീകരിച്ചത്. ഖുര്ആനും പ്രവാചകചര്യയും (സുന്നത്ത്) മുന്നിര്ത്തി ജനങ്ങള് അബ്ദുല് അസീസ് രാജാവിന് നല്കിയ വിശ്വസ്തതാ പ്രതിജ്ഞ (ബൈഅത്ത്) സൗദി അറേബ്യയുടെ ചരിത്രത്തിലെ നാഴികക്കല്ലായിരുന്നുവെന്ന് അദ്ദേഹം ചൂണ്ടിക്കാട്ടി.
ശൈഖ് അബ്ദുല് മാലിക് മിര്ദാദ് ബൈഅത്ത് രേഖ വായിച്ചുകേള്പ്പിച്ച ആ ചടങ്ങില് പണ്ഡിതന്മാരും പ്രമുഖരും സാധാരണക്കാരുമടക്കം വന് ജനസഞ്ചയമാണ് അണിനിരന്നത്. ഹിജാസ് മേഖലയില് സൗദി ഭരണകൂടത്തിന്റെ ആധിപത്യം ഊട്ടിയുറപ്പിച്ച ആ നിമിഷം ഭക്തിസാന്ദ്രമായ അന്തരീക്ഷത്തിലാണ് നടന്നത്. 1319-ല് റിയാദ് തിരിച്ചുപിടിച്ച ശേഷം അബ്ദുല് അസീസ് രാജാവ് തന്റെ ജന്മനാടായ റിയാദിന് പുറത്ത് ആദ്യമായി റമദാന് നോമ്പ് അനുഷ്ഠിച്ചത് ആ വര്ഷം മക്കയിലായിരുന്നു എന്ന പ്രത്യേകതയുമുണ്ട്.
മക്കയിലെ ആ ആദ്യ റമദാന് കാലത്ത് രാജാവ് പുലര്ത്തിയിരുന്ന ലളിതവും ഭക്തിനിര്ഭരവുമായ ജീവിതചര്യയെക്കുറിച്ചും അല്-ഒമ്രാനി വിവരിക്കുന്നുണ്ട്. എല്ലാ ദിവസവും മസ്ജിദുല് ഹറാമില് മഗ്രിബ്, ഇഷാ നമസ്കാരങ്ങളില് അദ്ദേഹം പങ്കെടുക്കുമായിരുന്നു. സംസം കിണറിന് മുകളില് നോമ്പ് തുറന്ന ശേഷം അദ്ദേഹം തന്റെ ഭക്ഷണം കഴിച്ചിരുന്നത് അക്കാലത്തെ പ്രശസ്തമായ 'ദാര് ബനാജ'യിലായിരുന്നു (1369ലെ വിപുലീകരണ പ്രവര്ത്തനങ്ങളുടെ ഭാഗമായി പിന്നീട് ഈ കെട്ടിടം നീക്കം ചെയ്തു). തുടര്ന്ന് ഹറമിലെ മതാഫില് ശൈഖ് ഖലീല് അജ്മിയുടെ നേതൃത്വത്തില് നടന്ന തറാവീഹ് നമസ്കാരത്തിലും അദ്ദേഹം പങ്കുചേരുമായിരുന്നു.
ഭരണപരമായ കാര്യങ്ങളിലും ജനസമ്പര്ക്കത്തിലും രാജാവ് പ്രത്യേക ശ്രദ്ധ ചെലുത്തിയിരുന്നു. എല്ലാ വെള്ളിയാഴ്ചയും നമസ്കാരശേഷം 'അല്-ഹമിദിയ' എന്ന ഗവണ്മെന്റ് ഹൗസില് വെച്ച് അദ്ദേഹം ജനങ്ങളെ നേരിട്ട് കാണുകയും അവരുടെ പരാതികള് കേള്ക്കുകയും ചെയ്തിരുന്നു. ഹിജ്റ 1343-ലെ ആ റമദാന് മാസം മക്കയിലെ ജനങ്ങള്ക്ക് പുതിയൊരു യുഗത്തിന്റെ തുടക്കമായിരുന്നു. അതുവരെ നിലനിന്നിരുന്ന അശാന്തിയും ഭയവും മാറി, സ്ഥാപക രാജാവിന്റെ നേരിട്ടുള്ള മേല്നോട്ടത്തില് സമാധാനവും സുരക്ഷയും മക്കയില് പുനഃസ്ഥാപിക്കപ്പെട്ടുവെന്ന് അല്-ഒമ്രാനി കൂട്ടിച്ചേര്ത്തു.
